←  Genesis (9/50)  →
1. Tin, Pathianin Nova leh a fapate chu mal a sawmsak a, an hnenah, "Chi tam tak thlaha lo pungin, lei hi luah khat rawh u.
2. Nangmahni tihna leh hlauhna leia sa tinreng leh chungleng sava tinrengin an nei ang; chungte leh leia bawkvaka kal zawng zawng leh tuifinriat sangha zawng zawngte chu, in kuta pek an ni vek tawh.
3. Thil nung che thei tinrengte chu in tan ei tur an ni ang a; thlai hring ka pek che u ang khan engkim ka pe vek a che u.
4. Amaherawhchu sa a nunna (a thisen) chawpin in ei tur a ni lo.
5. Tin, in thisen, in nunnate thisen phuba chu ka la ngei ngei ang: sa tinreng lakah ka la ang: mihring lakah pawh, mi tin an unaute lakah chuan, mihring nunna phuba chu ka la theuh ang.
6. Tupawh mihring thisen chhuahtu chu mihring vekin ama thisen chu an chhuah ve tur a ni: Pathian anpuiin mihring a siam si a.
7. Tin, nangni chu chi tam tak thlahin lo pung rawh u; leiah hian fa tam tak hring ula, a chungah hian lo pung rawh u," a ti a.
8. Tin, Pathianin Nova hnenah leh a hnena awm a fapate hnenah chuan,
9. "Tin, ngai teh u, keimah ngeiin in hnenah leh in hnua in thlahte hnenah pawh ka thuthlung chu ka tinghet a ni;
10. in hnena thil nung tinreng awm, in awmpui sava te, ran te, ram sa tinreng hnenah lam chuan.
11. Tin, in hnenah ka thuthlung chu ka tinghet ang; tisa zawng zawng tuileta tihboralin an awm tawh hek lo ang a; lei tichhe turin a let tawh hek lo ang," tiin a sawi a.
12. tin, Pathian vekin, "Hei hi kei leh nangni leh in hnena thil nung tinreng awmte kara chhuan tawp nei loa awm zelte tan, ka thuthlung chhinchhiahna chu a ni ang.
13. Chhumah ka chhimbal ka zamtir a, chu chu kei leh lei kara thuthlung chhinchhiahna tur a ni ang.
14. Tin, heti hi a ni ang a, lei chunga chhum ka zamtirin chhimbal chu chhumah chuan a lang ang a,
15. kei leh nangni leh tisa zawng zawng zinga mi thil nung tinrengte kara ka thuthlung awm hi ka hre reng ang; tichuan tui chu tisa zawng zawng tiboral turin a lo let leh tawh lo ang.
16. Tin, chhimbal chu chhumah a zam thin ang; tichuan Pathian leh lei chunga tisa awm zawng zawng zinga mi thil nung tinrengte kara kumkhaw thuthlung awm chu ka hriat reng theihna turin ka en thin ang," a ti a.
17. Tin, Pathian vekin Nova hnenah chuan, "Chu chu kei leh lei chunga tisa awm zawng zawng kara ka thuthlung tihngheh chhinhhiahna a ni," a ti leh a.
18. Tin, Nova fapa lawng atanga chhuakte chu Sema te, Hama te, Japhetha te an ni: Hama chu kanaana pa a ni.
19. Chu mite laka chhuakte chuan lei zawng zawng hi an dap zo ta a ni.
20. Tin, Nova chu lo neituah a awm tan a, grep hrui huan a siam a:
21. uain chu a in a, a rui a; tichuan a puan inah chuan a mu sual ta a.
22. Tin, Hama, Kanaana pa chuan a pa mu sual chu a hmu a, pawna a unaute pahnih chu a hrilh a.
23. Tichuan Sema leh Japhetha chuan puan an la a, kokia inzawnin hnung tawlhin an kal a, an pa mu sual chu an khuh ta a; an hmai chu lehlam hawiin a awm a, an pa mu sual chu an hmu lo a.
24. Tin, Nova chu a uain rui chu a lo harh a, a fapa naupang berin a chunga a tihzia chu a lo hre ta a.
25. Tichuan, "Kanaana chu anchhe dawngin awm rawh se; A unaute chhiahhlawhte chhiahhlawh a ni ang," a ti a.
26. "LALPA, Sema Pathian chu fakin awm rawh se; Kanaana chu a chhiahhlawhah awm rawh se.
27. Pathianin Japhetha chu tilian se la, Sema puan inahte awm rawh se; Tin, Kanaana chu a chhiahhlawhah awm rawh se," a ti bawk a.
28. Tin, Nova chu tui let hnu chuan kum 350 a dam a.Tichuan Nova dam chhung zawng zawng chu kum 950 a ni a, tin, a thi ta a.
29. Tichuan Nova dam chhung zawng zawng chu kum 950 a ni a, tin, a thi ta a.
←  Genesis (9/50)  →