←  Genesis (8/50)  →
1. Tin, Pathianin Nova leh lawnga a hnena thil nung tinreng leh ran zawng zawng awmte chu a hre reng a: tin,Pathianin lei chung lamah hian thli a tlehtir a, tichuan tui chu a lo kam tan ta a;
2. tui thuk tak hnate leh van tukverhte pawh chu a lo inkhar a, van atanga ruah lo sur chu tihbanin a awm ta bawk a;
3. tichuan tui chu lei chung ata a kam ta deuh deuh va: tichuan ni za leh ni sawmnga chu a ral hnu chuan tui chu a lo tlem ta deuh a,
4. Tichuan lawng chu thla sarihna ni sawm leh ni sarih niah chuan Ararat tlangah chuan a lo innghat ta a.
5. Tin, tui chu thla sawmna thlengin a tlem ta deuh deuh zel a: tin, thla sawmna ni khat niah chuan tlang chhipte chu a lo lang ta a.
6. Tin, ni sawmli hnuah chuan hei hi a ni a, Nova chuan lawng tukverh a siam kha a hawng ta a:
7. tin, choak pakhat a thlawh chhuahtir a; chu chu a chhuak a, lei ata tui chu a kang zawh hma loh chuan a thlawk vel a thlawk vel a.
8. Tin, lei chungah tui a tlem tawh nge tawh lo tih hriatna'n thuro a thlawh chhuahtir leh a;
9. nimahsela thuro chuan fukna reng reng a hmu lo a, a hnenah lawngah a kir leh ta a, tui chu lei chung zawng zawngah chuan a la awm si a: tichuan a kut a han zen chhuak a, a man a, lawng chhungah a hnenah a la lut leh ta a.
10. Tin, ni sarih dang a nghak leh rih a; tin thuro chu lawng atangin a thlawh chhuahtir leh a;
11. thuro chu tlai lamah chuan a hnenah a lo lut leh a; tin, ngai teh, a hmuiah chuan oliv hnah tihthlawn hlim a rawn pu a: chutichuan Nova chuan leiah tui a tlem ta tih a hre ta a.
12. Tin, ni sarih dang a nghak leh pek a; tin, thuro chu a thlawh chhuahtir leh a; tin, a hnenah a lo kir leh ta lo a.
13. Tin, heti hi a ni a, a kum 601-na ah, a thla khatna ni khat niah chuan tui chu lei ata a kang zo ta a: tichuan Nova chuan lawng khuhna chu a sawn a, a en a, tin, ngai teh, lei chung chu a lo hil ta tlung a.
14. Tin, a thla hnihna ni sawmhnih leh ni sarih niah chuan lei chu a ro zo ta a.
15. Tin, Pathianin Nova hnenah chuan,
16. "Lawng ata chhuak rawh, nang leh i nupui leh i fapa leh i fapate nupuite pawh i hnenah chhuak ve rawh se.
17. Tisa zawng zawng zinga mi thil nung tinreng i awmpuite kha, sava te, ran te, rannung lei chunga bawkvaka kal tinreng te nen khan i hnenah hruai chhuak rawh, leiah hian no nei theuhin, chi tam tak thlaha an lo punna turin," tiin a sawi a.
18. Tichuan Nova chu a chhuak a, a fapate leh a nupui leh a fapate nupuite pawh a hnenah an chhuak ve a:
19. sa tinreng te, rannung tinreng te, sava tinreng te, lei chunga che thei apiang te chu anmahni chi awm dan ang theuhin lawng ata chu an chhuak a.
20. Tin, Nova chuan Lalpa tan maicham a siam a; tin, sa thiang tinreng zinga mi leh sava thiang tinreng zinga mi a la a, maichamah chuan halral thilhlante a hlan ta a.
21. Tin, LALPA'n rimtui chu a hria a; tin, LALPA chuan a rilruin, "Lei chu mihring avangin anchhia ka lawh leh tawh lo ang, mihring rilru ngaihtuahnate chu an naupan tet ata a sual si a; tuna ka hrem ang hian thil nung tinreng ka hrem leh tawh hek lo ang.Lei awm chhung zawng buh tuh leh buh lak te, khaw vawt leh khaw lum te, nipui leh thlasik te, chhun leh zan te chu a bo lo ang," a ti a.
22. Lei awm chhung zawng buh tuh leh buh lak te, khaw vawt leh khaw lum te, nipui leh thlasik te, chhun leh zan te chu a bo lo ang," a ti a.
←  Genesis (8/50)  →