←  Genesis (4/50)  →

---

1.

Tin, Adama chuan a nupui Evi chu a pawl a; tichuan a rai a, Kaina a hring a, "LALPA tanpuiin mipa ka lo nei ta", a ti a.

2.

Tin, a nau Abela a rawn hring leh a. Tin, Abela chu beram vengtuah a awm a, Kaina erawh chu lei leituah a awm.

3.

Tin, nakinah chuan heti hi a ni a, Kaina chuan LALPA hnena hlan atan loa mi a rawn la a.

4.

Tin, Abela pawh chuan a beram rual zinga piang hmasa berte leh a thau chu a rawn la bawk a. Tin, LALPA chuan Abela leh a thil hlan chu a lawm a:

5.

Kaina leh a thil hlan erawh chu a lawm ve lo a. Tichuan Kaina chu a thinur em em a, a hmel chu a lo dur ta khup a.

6.

Tichuan LALPA chuan Kaina hnenah chuan, "Engati nge i thin a ur? Engati nge i hmel a lo dur tak?

7.

Thil i tih that chuan lawm i hlawh dawn lo em ni? i tih that loh erawh chuan sual chu kawngka bulah a bawk reng a ni: a duhzawng chu nangma hnen lam a ni ang a, a chungah thu i nei tur a ni", a ti a.

8.

Kaina chuan a nau Abela hnenah, "Lovah i feh ang," a ti a. Tin, heti hi a ni a, loa an awm laiin Kaina chuan a nau Abela chu a bei a, a that ta mai a.

9.

Tichuan LALPA chuan Kaina hnenah chuan, "I nau Abela kha khawiah nge a awm tak?" a ti a. Tin, a ni chuan, "Ka hre lo. Ka nau vengtu ka ni em ni?" a ti a.

10.

Tin, ani chuan, "Engnge i tih tak ni? I nau thisen aw chuan lei atangin mi au a sin.

11.

Chuvangin, lei, i kut ata i nau thisen dawng tura a ka lo angtu ata hi anchhe dawng i ni ta;

12.

lei i leh pawhin a thatna chu a pe phal tawh lo ang che; leiah hian tlan bo leh vakvai i lo ni tawh ang," a ti a.

13.

Tin, Kaina chuan LALPA hnenah, "I mi hremna hi a nasa em a, ka tuar zo lo ang.

14.

Ngai teh, nangin vawiinah hian lei chung ata mi hnawt chhuak ta si a; i mithmuh phak loha thurukin ka awm dawn ta a; leiah hian tlan bo leh vakvai ka lo ni dawn ta si a; tichuan heti hi a ni ang a, tupawh mi hmu apiangin mi that mai ang," a ti a.

15.

Tin, LALPA chuan a hnenah, "Chuti a nih chuan tupawh Kaina that apiang chu a leh sarihin a chungah phuba an la ang," a ti a. Tichuan miin amah an hmuha an thah lohna'n Lalpa'n Kaina chu a chhinchhiah ta a.

16.

Tichuan Kaina chu LALPA hnen ata chu a chhuak a, Eden chhak lama Nod ramah chuan a awm ta a.

17.

Tin, Kaina chuan a nupui a pawl a; tichuan a rai a, Enoka a hring a: tin, khua a siam a, a khaw hmingah chuan a fapa hming chawiin Enok a ti a.

18.

Tin, Enok chuan fapa Irada a nei a: Irada chuan fapa Mehujaela a nei a: Mehujaela chuan fapa Methusaela a nei a: Methusaela chuan fapa Lameka a nei a.

19.

Tin, Lameka chuan nupui pahnih a nei a: pakhat hming chu Adaii a ni a, pakhat hming chu Zillaii a ni.

20.

Tin, Adaii chuan Jabal a hring a: ani chu puan ina awm ran vulhtuho thlahtu a ni.

21.

A nau hming chu Jubala a ni a: ani chu tingtang leh phenglawng tumtuho zawng zawng thlahtu a ni.

22.

Tin, Zillaii pawh chuan Tubal-Kaina dar leh thir hriamhrei tinreng chhertu a hring a: tin, Tubal-Kaina farnu chu Naamaii a ni a

23.

Tin, Lameka chuan a nupuite hnenah chuan Adaii leh Zillaii te u, ka aw hria u la; Lameka nupui te u, ka thusawi hi ngaithla rawh u: Mi tihhliam avangin mi ka that a, Mi vuak thitlin avangin tlangval ka that a ni:

24.

Kaina phuba mah aleh sariha an lak dawn chuan Lameka phuba chu aleh sawmsarih leh pasarihin an la ngei ngei ang, a ti a.

25.

Tin, Adama chuan a nupui chu a pawl leh a: tichuan ani chuan fapa a hring leh a, a hmingah chuan Setha a sa a: Pathianin Abela aiah chi thlah dang mi ruatsak ta; Kaina chuan amah a that ta si a, a ti a.Tin, Setha chuan amah ngei pawh chuan fapa a nei ta a; a hmingah chuan Enosa a sa a; chu mi lai chuan miten LALPA hming an lo lam tan ta a.

26.

Tin, Setha chuan amah ngei pawh chuan fapa a nei ta a; a hmingah chuan Enosa a sa a; chu mi lai chuan miten LALPA hming an lo lam tan ta a.

---

←  Genesis (4/50)  →