←  Genesis (34/50)  →
1. Tin, Leaii fanu Dinaii, Jakoba a hrinsak chu, chu mi ram nulate hmu turin a va leng chhuak a.
2. Tin, Hiv mi Hamora, chu mi ram lal fapa Sekema chuan ani chu a lo hmu a; tin, a man a, a mutpui a, a tlawm ta a.
3. Tin, a rilru chu Jakoba fanu Dinaii chungah chuan a awm tlat a, chu nula chu a hmangaih a, ani chu tawngkam tha takin a bia a.
4. Tin, Sekema chuan a pa Hamora chu a bia a, "Chu nula chu nupuiah mi neihsak rawh," a ti a.
5. Tin, Jakoba chuan a fanu Dinaii chu Sekeman a tibawrhbang tih a lo hria a; a fapate chu phulah a ran zingah an awm a: tichuan an lo hawn hma loh chuan Jakoba chu a ngawi reng a.
6. Tin, Sekema pa Hamora chu Jakoba be turin a hnenah a kal a.
7. Tin, Jakoba fapate chuan an hriat veleh phul atang chuan an lo hawng ta a: tin, Jakoba fanu mutpuiin Israel-ho zinga thil sual atthlak tak, thil tih hauh loh tur chu a tih tak avangin an lungngai a, an thinur ta em em a.
8. Tin, Hamora chuan anmahni a bia a, "Ka fapa Sekema rilru chu in fanu chungah a awm tlat a: khawngaih takin nupuiah neihtir ta che u.
9. Tichuan i innei tawn ang u; in fanute min neihtir u la, kan fanute pawh nei bawk rawh u.
10. Tichuan kan hnenah in awm ang a; ram pawh hi a awm duai fo ang: hengah hian awmin sumdawng u la; hengah hian lo intimuk rawh u," a ti a.
11. Tin, Sekema chuan nula pa leh a nutate hnenah, "Mi khawngaih rawh u, ka hnena in sawi apiang ka pe zel ang che u.
12. Man leh thilpek chu engzat pawh ngen u la, in tih ang zelin ka pe ang che u: engpawh ni se la, nula chu nupuiah mi neihtir phawt mai rawh u," a ti a.
13. Tin, Jakoba fapate chuan an farnu Dinaii chu a tihbawrhbansak avangin, Sekema leh a pa Hamora chu ngamthlemnain an chhang a, an sawi ve a,
14. an hnenah, "He thilserh tan lo mi, kan farnu pek hi-kan ti thei lo ang; chu chu kan tan hmingchhiatna tur a ni si a:
15. hetianga in tiam chauh hian in thu ang chu kan remti ang: in zinga mipa tawh phawt chuan serh tanin keimahni angin awm u la;
16. chutichuan kan farnute kan neihtir ang che u a, keini pawhin in fanute kan nei bawk ang a, tin, in hnenah kan awm ang a, chi khat kan lo ni dawn nia.
17. Nimahsela serh tan kawnga kan thu in zawm dawn loh chuan kan fanu chu kan hruai ang a, kan kal mai ang," an ti a.
18. Tin, an thu chuan Hamora leh Hamora fapa Sekema chu a tilawm a.
19. Tichuan tlangval chuan Jakoba fanu chu a duh hle avangin, chu thil chu rei rial loin a ti ta mai a: ani chu a pa chhungte zawng zawng zinga mite zah ber a ni a.
20. Tin, Hamora leh a fapa Sekema chuan an khaw kulh kawngkhar chu an thleng a, an khuate chu an bia a,
21. "Saw mite saw min rem takin an awm a, chuvangin he ramah hian awmin, hengah hian sumdawng rawh se; ngai teh u, an tan pawh ram hi a zau tawk si a; an fanute saw nupuiahte nei i la, kan fanute pawh i neihtir bawk ang u.
22. Nimahsela chi khat kan lo nihna tura kan hnena awm chu hetianga kan tiam chauh hian saw mite sawn min remtihpui dawn a ni, serh tan an ni angin kan zinga mipa tawh phawt chu serh tan lo ni ve i la.
23. An ran te, an sum te, an sa zawng zawng te kan ta a ni vek dawn lo'm ni? An thu hi i remtihpui mai ang u, tichuan kan hnenah an awm dawn nia," an ti a.
24. Tin, Hamora leh a fapa Sekema thu chu a khaw kulh kawngkhara chhuak zawng zawngte chuan an zawm a; a khaw kulh kawngkhara chhuak zawng zawng, mipa tawh phawt chuan serh an tantir ta vek a.
25. Tin, heti hi a ni a, a ni thum niah, an nat lai tak chuan Jakoba fapate zinga mi pahnih, Dinaii nuta Simeona leh Levia chuan, an khandaih keng ve vein, a rukin khua chu an bei a, mipa zawng zawng chu an that zo piar a.
26. Tichuan Hamora leh a fapa Sekema chu khandaih hriamin an that a, Sekema in ata Dinaii chu an hruai chhuak ta a.
27. Jakoba fapateho chuan an mi thahte chu an va nangching a, an farnu chu an tihbawrhbansak avangin khua chu an rawk ta a.
28. An beram rualte, an bawng rualte, an sabengtungte, an khuaa thil awm te, an loa thil awmte chu an laksak a;
29. an sum zawng zawng leh an fanau te tete leh an nupuite zawng zawng in chhunga awm apiangte chu an man a, an rawk bawk a.
30. Tin, Jakoba'n Simeona leh Levia hnenah chuan, "Nangnin he rama awmte zinga Kanaan-ho leh Periz-hote zingah hian, huat mi phurhtirin mi timangang hle a ni: kei tlem te ka nih avang hian mi bei turin an inpunkhawm ang a, mi that mai ang; kei leh ka chhungte nen hian," a ti a.Tin, anni chuan, "Kan farnu hi nawhchizuar tih angin a ti tur em ni ang?" an ti a.
31. Tin, anni chuan, "Kan farnu hi nawhchizuar tih angin a ti tur em ni ang?" an ti a.
←  Genesis (34/50)  →