←  Genesis (33/50)  →
1. Tin, Jakoba chu a han dak a, tin, ngai teh, Esauva chu a hnena mi zalite nen an lo kal a. Tichuan a fate chu Leaii hnenah te, Rakili hnenah te, Bawihnu pahnih hnenah te a sem thliah a.
2. Tin, bawihnute leh an fate chu a hmatawng berah a dah a, Leaii leh a fate chu a dawtah a dah a, Rakili leh Josefa chu a hnung berah a dah a.
3. Tin, amah chu an hmaah chuan a kal a, a u bul a thlen hma chuan vawi sarih lei siin chibai a buk a.
4. Tin, Esauva chu amah lawm turin a tlan a, a pawm a, a ir a chuktuah a, a fawp a: tin, an tap dun ta a.
5. Tin, Esauva chu a han dak a, hmeichhiate leh naupangte chu a hmu a; tichuan "I hruaite saw tute nge ni?" a ti a. Tin, ani chuan, "Pathianin khawngaih taka i chhiahhlawh a pek a naupangte an nih saw," a ti a.
6. Chutichuan bawihnute chu, anmahni leh an fate nen chuan an lo kal hnai a, an kun a, chibai an buk a.
7. Tin, Leaii pawh a fate nen chuan an lo kal hnai a, an kun a, chibai an buk ve a; tin, chu mi hnuah chuan Josefa leh Rakili chu an lo kal hnai a, an kun a, chibai an rawn buk bawk a.
8. Tin, Esauva chuan, "Ran rual ka tawh zozaite kha eng tizia nge ni?" a ti a. Tin, ani chuan, "Ka lalpa, i mit ka tlun theihna'n ka ti a ni," a ti a.
9. Tin, Esauva chuan, "Kei pawhin ka ngah e; ka nau, i neih zawng zawng chu i ta ni rawh se," a ti a.
10. Tin, Jakoba chuan, "Ni lo e, i mit ka thlun chuan, khawngaih takin ka l awmman pek che kha mi pawmsak rawh: Pathian hmel hmu angin i hmel ka hmu a, ka chungah i lawm si a,
11. Pathianin min khawngaih avang leh, ka ngah avang hian khawngaih takin ka thil rawn pek che kha pawm rawh," a a ti a. Tichuan a thlem a thlem a, a pawm ta a.
12. Tin, Esauva chuan, "Hawh, i kal ang, hma ka hruaisak ang che," a ti a.
13. Tin, ani chuan a hnenah, "Naupangte hi an la tet leh, beram rual leh bawng rual ka hnena awmte hi no hruai an nih, ka lalpa, i hria e; ni khat chauh pawh an khalh chak lutuk chuan ran rual zawng zawng hi an thi mai ang.
14. Ka lalpa, khawngaih takin i chhiahhlawh hmaah hian kal la: kei chuan Seir tlangah, ka lalpa, i hnen ka thlen hma loh chuan, ka hmaa ran kal hi an kal theih tawk ang zel leh, naupangte kal theih tawk ang zelin, zawi muangin ka rawn chhawm zel ang e," a ti a.
15. Tin, Esauva chuan, "Ka hnena awm mi thenkhatte hi ka hnutchhiah tal ang che chu," a ti a. Tin, ani chuan, "Engah kher maw? Ka lalpa mit mi thluntir mai rawh," a ti a.
16. Chutichuan Esauva chu chu mi ni vek chuan Seir tlang lam panin a kir leh ta a.
17. Tin, Jakoba chu Sukloth hmunah chuan a kal a, ama tan in a sa a, a rante tan bukte a sa bawk a: chuvangin chu mi hmun hming chu Sukoth an ti ta a.
18. Tin, Jakoba chu Paddan-aram ram ata a lo kal chu thlamuang takin Sekem khua, Kanaan rama awm chu a thleng a, daikiangah chuan a puan in chu a zar ta a.
19. Tin, a puan in zarna hmun chu, Sekema pa Hamora fate lakah, tangka zain a lei a.Chutah chuan maicham a siam a, a hmingah chuan El-elohe-Israela a vuah a.
20. Chutah chuan maicham a siam a, a hmingah chuan El-elohe-Israela a vuah a.
←  Genesis (33/50)  →