←  Genesis (3/50)  →

---

1.

Tin, LALPA Pathianin ram sa a siam zawng zawngah chuan rul a fing ver vek ber a. Tichuan ani chuan hmeichhe hnenah chuan,"Pathianin, Huana thing rah reng reng hi in ei tur a ni lo, a ti elo maw?" a ti a.

2.

Tin, hmeichhia chuan rul hnenah chuan, "Ti lo e, huana thing rahte hi kan ei thei a sin:

3.

huan lai taka thing awm rah erawh chu Pathianin, In ei tur a ni lo, tawh pawh in tawk tur a ni lo, chutilochuan in thi ang, a ti a ni", a ti a.

4.

in, rul chuan hmeichhe hnenah chuan, "Thi teh suh e:

5.

in ei ni apang chuan in mit a lo var ang a, a chhia leh tha hriain Pathian ang in lo ni dawn tih Pathianin a hre reng a nih chu," a ti a.

6.

Tichuan hmeichhia chuan thing rah chu ei mi a ni tih leh, mit la tak a ni tih leh, mi tifing turin thing rah itawm tak a ni tih a hriat chuan thing a rah thenkhat chu a lo a, a ei ta a; tin, a pasal a pe ve a, a ni pawhin a ei ve ta a.

7.

Tichuan an pahnih chuan an mit a lo var a, saruak an nih an lo inhre ta a; tichuan theipui hnah an thui khawm a, pawnfen an insiam chawp a.

8.

Tin, LALPA Pathian chu huana tlai ni nema a leng thawm chu an lo hria a: tichuan Adama leh a nupui chuan huana thing zingah chuan LALPA Pathian chu an lo bihruksan ta a.

9.

Tin, LALPA Pathian chuan Adama chu a ko a, a hnenah, "Khawiah nge i awm?" a ti a.

10.

Tin, ani chuan, "Huana i thawm ka hria a, saruaka awm ka nih avangin ka hlau ta a; tichuan ka biru ta a ni," a ti a.

11.

Tin, a ni chuan, "Saruak i nih tuin nge hrilh che? Thing rah ei loh tur ka tih tlat che kha i ei ta a ni maw?" a ti a.

12.

Tin, Adama chuan, "Mi awmpui tura i hmeichhe mi pek ngei khan thing rah chu mi pe a, ka ei ta a ni," a ti a.

13.

Tin, LALPA Pathian chuan hmeichhe hnenah, "I thiltih hi eng tizia nge ni le?" a ti a. Tin, hmeichhia chuan, "Rulin mi tihder a, ka ei ta a ni," a ti a.

14.

Tin, LALPA Pathian chuan rul hnenah chuan, "Hetiang hi i tih avangin ran zawng zawng leh ram sa tinreng zingah chuan anchhe dawngin i awm bik ang a, bawkkhupin i Kal fo tawh ang a, i dam chhung zawngin vaivut i ei bawk tur a ni:

15.

tin, nang leh hmeichhia hi ka indotir ang che u a, i thlahte leh a thlahte pawh ka la indotir bawk ang: chu mi chuan i lu a la tithitling ang a, nangin a ke artui i la tithitling ang," a ti a.

16.

Hmeichhe hnenah chuan, "I hreawmna leh i nau paina chu nasa takin ka tipung ang a; hreawm takin fa i hring thin ang a; nimahsela i duhzawng chu i pasal lam a ni ang a, ani chuan i chungah thu a nei fo ang," a ti a.

17.

Tin, Adama hnenah chuan, "I nupui thu i zawm a, thing pakhat, A rah i ei tur a ni lo tia thu ka pek che kha, a rah i ei avangin lei hi nangmah avangin anchhe dawngin a awm ta a ni; i dam chhung zawngin rim taka thawkin a rah chu i ei tawh ang;

18.

hling leh buarte pawh a chhuaksak ang che; tin, leia thlai chu i ei tawh ang;

19.

tin, leia i kir leh hma loh chuan i hmaia thlantui luang zawih zawihin chaw i ei tawh ang; lei atanga lak chhuah i ni si a: vaivut i ni a, vaivutah i kir leh tur a ni," a ti a.

20.

Tin, Adama chuan a nupui chu mi nung zawng zawng nu a nih avangin a hmingah Evi a vuah a.

21.

Tin, LALPA Pathian chuan Adama tan leh a nupui tan chuan savun kawrfualte a siamsak a, a haktir ta a.

22.

Tin, LALPA Pathian chuan, "Ngai teh u, mihring chu a chhia leh a tha hriain keimahni ang a lo ni ta; tunah chuan a kuta banin nunna thing rah chu loa eiin, kumkhuain a nung dah ang e," a ti a:

23.

chuvangin LALPA Pathian chuan amah a lak chhuahna lei chu let turin Eden huan ata chu a tir chhuak ta a.Chutichuan mihring chu a hnawt chhuak ta a; tin, nunna thing kawng chu veng turin Eden huan chhak lampangah chuan Cherub-te leh mei khandaih vir tawn zawk zawk chu a awmtir ta bawk a.

24.

Chutichuan mihring chu a hnawt chhuak ta a; tin, nunna thing kawng chu veng turin Eden huan chhak lampangah chuan Cherub-te leh mei khandaih vir tawn zawk zawk chu a awmtir ta bawk a.

---

←  Genesis (3/50)  →