←  Genesis (27/50)  →
1. Tin, heti hi a ni a, Isaaka chu a lo tar a, khaw hmu thei lo khawpa a mit a lo thim hnu chuan a fapa upa zawk Esauva chu a ko a, a hnenah, "Ka fapa," a ti a: tin, ani chuan a hnenah, "Heta hi ka awm," a ti a.
2. Tin, ani chuan, "Ngai teh, ka tar tawh em a, ka thih ni tur ka hre si lo a.
3. Chutichuan tunah hian khawngaih takin i hriamhrei, i thal bawm leh i thal ngul kha keng la, va ramchhuak la, sakhi mi va kahsak rawh:
4. tin, ka thih hmaa mal ka sawmsakna tur chein ka duhzawng takin chawhmeh tui takah mi siamsak la, ka ei turin ka hnenah rawn la rawh," a ti a.
5. Tin, Isaakan a fapa Esauva a biak lai chu Rebeki chuan a lo hria a. Tin, Esauva chu sakhi kapa rawn hawn turin ramah chuan a kal ta a.
6. Tin, Rebeki chuan a fapa Jakoba hnenah, "Ngai teh, i pa chuan i u Esauva hnenah,
7. 'Sakhi mi rawn lak la, ka eia, ka thih hmain LALPA hmaah mal ka sawmsakna tur chein chawhmeh tui takah mi siam rawh,' tia a sawi ka hria.
8. Chutichuan ka fapa, tunah hian thu ka pek che ang zelin ka thu zawm ang che.
9. Ran rual zingah va kal la, chuta ta chu kel no pahnih tha tak mi va lak rawh; tichuan chu mi chu a duhzawng takin i pa tan chawhmeh tui takah ka lo siam ang e:
10. tin, a thih hmaa mal a sawmsakna tur chein, a ei turin i pa hnenah i va kalpui tur a ni," tiin a sawi a.
11. Tin, Jakoba chuan a nu Rebeki hnenah, "Ngai teh, ka u Esauva chu mi hmul tak a ni a, kei zawng mi mam tak ka ni si a.
12. Ka pa chuan mi lo dap vel mahna, tichuan ama ngaihin bumtu ang ka lo ni ang a, malsawm ahnekin anchhia indawntir mai ka ni ang a sin," a ti a.
13. Tin, a nu chuan a hnenah, "Ka fapa, i anchhe dawn tur chu ka chungah awm rawh se: ka thu zawm la, mi va lak mai rawh," a ti a.
14. Tin, a kal a, a va la a, a nu hnenah a rawn kalpui a: tichuan a nu chuan a pa duhzawng takin chawhmeh tui takah a siam a.
15. Tin, Rebeki chuan a fapa upa zawk Esauva silhfen tha tak, ina a hnena awm chu a la a, a fapa naupang zawk Jakoba chu a thuam a;
16. tin, kel no vunte pawh chu a kutah leh a nghawng mam laiah chuan a bel bawk a:
17. tin, chawhmeh tui tak leh chhang a siamte chu a fapa Jakoba kutah a pe a.
18. Tin, ani chu a pa hnenah a kal a, "Ka pa," a ti a: tin, ani chuan, "Heta hi ka awm; ka fapa, tu zawk nge i nih?" a ti a.
19. Tin, Jakoba chuan a pa hnenah, "I fapa upa zawk Esauva ka ni; mi tirh ang khan, ka ti zo ta a: khawngaih takin tho la, mal mi sawmsakna turin thu la, ka sakhi sa hi ei rawh le," a ti a.
20. Tin, Isaaka chuan a fapa hnenahh, "Ka fapa, eng tizia nge i va rawn hmu hma teh thut ve le?" a ti a. Tin, ani chuan, "LALPA i Pathian chuan mi hlawhtlintir avang a ni," a ti a.
21. Tin, Isaaka chuan Jakoba hnenah, "Ka fapa, khawngaih takin lo hnai teh khai, ka lo dap vel teh ang che, ka fapa Esauva i ni meuh na emaw," a ti a.
22. Tin, Jakoba chuan a pa Isaaka chu a va hnaih a; tin, ani chuan a lo dap vel a, "A aw chu Jakoba aw a ni si a, a kutte erawh chu Esauva kut a ni si," a ti a.
23. Tichuan a u Esauva kut angin a kut a hmul avangin amah chu a hre loa: chutichuan mal a sawm ta a.
24. Tin, "Ka fapa Esauva ngei i ni maw? A ti a. Tin, ani chuan, "Ni e," a ti a.
25. Tin, ani chuan, "Mi han lak hnaih rawh, tichuan mal ka sawmsakna tur chein ka fapa sakhi sa chu ka lo ei ang e," a ti a. Tin, a rawn la hnai a, a ei ta a: uain pawh a laksak a, a in bawk a.
26. Tin, a pa Isaaka chuan a hnenah, "Ka fapa, lo hnai la, mi fawp rawh," a ti a.
27. Tin, a va hnaih a, a fawp a: tin, ani chuan a silhfen rim chu a hria a, mal a sawmsak a, "Ngai teh, ka fapa rim hi LALPA malsawm ram rim ang a ni:
28. Tichuan Pathianin van daifim leh Lei thatna leh, Buh tam tak leh uain tam tak pe che rawh se:
29. Hnam hrang hrangten i rawng bawl se la, Chi hrang hrangten chibai buk che rawh se: i unaute chungah lalah awm langin; i nu faten chibai buk che rawh se: Anchhe lawhtu apiang che chu anchhe lawhin awm se la, Malsawmtu apiang che chu malsawmin awm rawh se," a ti a.
30. Tin, heti hi a ni a, Isaakan Jakoba mal a sawm zawh veleh Jakoba chu a pa Isaaka hnen ata a chhuak hman chauh a, a u Esauva chu a sa pel a lo hawng a.
31. Tin, ani pawh chuan chawhmeh tui takah a siam a, a pa hnenah a rawn la ve a; tin, a pa hnenah chuan, "Ka pa, tho la, mal mi sawmsakna turin i fapaa sakhi sa hi ei rawh le," a ti a.
32. Tin, a pa Isaaka chuan a hnenah, "Tunge i nih?" a ti a. Tin, ani chuan, "I fapa, i fapa upa zawk, Esauva ka ni," a ti a.
33. Tichuan Isaaka chu nasa takin a khur chiam a, "Sakhi kapa ka hnena a sa rawn laa, i lo thlen hmaa ka ei zawh veka, mal ka sawm taka kha tu nge ni le? A ni, amah chu malsawmin a awm tawh tho tho ang," a ti a.
34. Esauva chuan a pa thusawi chu a hriatin nasa tak leh lungchhe takin a tap ta rawih a, a pa hnenah chuan "Aw ka pa, kei hi, kei pawh hi mal mi sawm ve lul rawh," a ti a.
35. Tin, ani chuan, "I nau chuan mi rawn bum a, i malsawmna chu a laksak ta che a ni," a ti a.
36. Tin, ani chuan, "A hmingah Jakoba an vuah dik hle lo em ni? Hei vawi hnih mi lan tak hi: ka fa tir nihna chu mi laksak a; tin, ngai teh, tunah hian ka malsawmna mi laksak leh tak hi," a ti a. Tin, amah vekin, "Malsawmna mi la zuahsak lo'm ni? a ti a.
37. Tin, Isaaka chuan a chhang a, Esauva hnenah, "Ngai teh, amah chu i lalah ka siam a, a unau zawng zawngte pawh a chhiahhlawh atan ka pe vek a; buh leh uainin ka chawm ta bawk a: ka fapa, nang atan eng nge ka tihsak ang che le?" a ti a.
38. Tin, Esauva chuan a pa hnenah, "Ka pa, malsawmna pakhat chauh em ni i neih? Aw ka pa, kei hi, kei pawh hi mal mi sawm ve lul rawh," a ti a. Tin, Esauva chu ring takin a tap ta a.
39. Tin, a pa Isaaka chuan a chhang a, a hnenah, "Ngai teh, i awmna tur chu lei thatna hlatah leh, Chung lam ata van daifim hlatah a ni, a awm dawn ni;
40. I khandaihin a ni, i nun dawn ni, i nau rawng pawh i bawl dawn a ni; Tin, heti hi a ni ang a, i tal chhuah hunah chuan, A nghawngkawl chu i nghawng ata i thing thla tawh ang," a ti a.
41. Tin, a pain mal a sawmsakna avang chuan Esauva chuan Jakoba a haw ta a: tin, Esauva chuan a rilruin, "Ka pa sun ni tur chu a hnai tawh a, chu mi hunah chuan ka nau Jakoba chu ka that mai ang," a ti a.
42. Tin, a fapa upa zawk Esauva thu sawi chu Rebeki an hrilh a; tichuan mi a tir a, a fapa naupang zawk Jakoba chu a ko a, a hnenah, "Ngai teh, i u Esauva chuan i chungchang thuah, nangmah tihhlum tumin a inhnem a ni.
43. Chutichuan ka fapa tunah ka thu hi awih rawh, tho la, Haran khuaa ka nuta Labana hnenah tlan bo rawh;
44. i u thinrimna hi a reh hma loh chuan a hnenah ni engemaw zat lai va awm rih rawh;
45. i u thinurna hi i chunga a reh a, a chunga i thiltih hi a theihnghilh hunah chuan mi ka tir ang a, chuta ta chu ka rawn hruai chhuahtir ang che: eng atan nge ni khatah in pahnihin ka chan ang che u?" a ti a.Tin, Rebeki chuan Isaaka hnenah, "Hetha fanute avang hian nun hi ka ning em mai: Jakoba hian he mi ram nula, he'ng ang Hetha fanuteho zinga mi hi nupui a neih leh ve lek phei chuan ka tan nun hi eng nge sawt ang?" a ti a.
46. Tin, Rebeki chuan Isaaka hnenah, "Hetha fanute avang hian nun hi ka ning em mai: Jakoba hian he mi ram nula, he'ng ang Hetha fanuteho zinga mi hi nupui a neih leh ve lek phei chuan ka tan nun hi eng nge sawt ang?" a ti a.
←  Genesis (27/50)  →