←  Genesis (24/50)  →
1. Tin, Abrahama chu a lo upa a, a lo tar ta hle a: tin, LALPA chuan Abrahama chu thil engkimah mal a sawmsak tawh a.
2. Tin, Abrahama chuan a chhiahhlawh, a chhungte zinga upa ber, a neih zawng zawng chunga thuneitu hnenah chuan, "Khawngaih takin i kut kha ka malpui hnuaiah rawlh rawh:
3. tichuan LALPA van Pathian leh lei Pathian chu chhalin, ka awmna Kanaan-ho nula zinga mi hi ka fapa nupuia neihsak lo turin chhia ka chhamtir dawn che a ni:
4. kan ram lamah, ka laichinte hnena kalin ka fapa Isaaka hi nupui i neihsak zawk tur ani," a ti a.
5. Tin, chhiahhlawh chuan a hnenah, "Hmeichhia chuan he mi ram lamah hian mi zui duh kher lo mahna: i fapa hi i lo chhuahna ram lamah chuan ka hruai kir leh tur em ni ang?" a ti a.
6. Tin, Abrahama chuan a hnenah, "Ka fapa hi chutah chuan hruai kir leh lo turin fimkhur rawh.
7. LALPA, van Pathian, ka pa in ata leh ka pianna ram ata mi hruai chhuaktu leh mi betu leh, 'He ram hi i thlahte ka la pe ang,' tia, ka hnena chhechhamtu chuan, amah ngeiin a vantirhkoh chu i hmaah a kaltir ang a, chuta tang chuan ka fapa hi nupui i rawn neihsak dawn nia.
8. Tin, hmeichhia chuan a zui duh loh che chuan ka hnena i chhechham kawngah hian i thiang mai ang; engpawh ni rawh se, ka fapa hi chutah chuan i hruai kir leh tur ani lo," a ti a.
9. Tichuan chhiahhlawh chuan a kut chu a pu Abrahama malpui hnuaiah chuan a rawlh a, chu mi thu-ah chuan a hnenah chhia a chham ta a.
10. Tin, chhiahhlawh chuan a pu sanghawngsei zinga mi sanghawngsei sawm a hruai a, a pu thil tha tinreng kengin a chhuak ta a: tichuan a tho a, Mesopotamia rama Nahora te khuaah chuan a kal a.
11. Tin, tlai lama hmeichheho tui chawi tura an chhuah hun lai tak chuan, daikianga tuichhunchhuah kiangah chuan a sanghawngseite chu a thingthittir a.
12. Tin, "Aw LALPA, ka pu Abrahama Pathian, khawngaih takin vawiinah hian mi hlawhtlintir la, ka pu Abrahama chungah chuan khawngaihna lantir ang che.
13. En teh, tuikhur kiangah ka ding a, khuaa mite fanuho pawh tui chawi tura an lo kal hi:
14. tichuan heti hian ni rawh se, nula tu hnenah pawh, 'Khawngaih takin ka in turin i tui bel kha tihniam teh khai,' ka tiha, tin aniina, 'In rawh, i sanghawngseite pawh hi in tur ka pe ang e,' titu apiang; chu mi ngei chu i chhiahhlawh Isaaka tana i mi ruat chu ni rawh se; tin, chu miah chuan ka pu chungah khawngaihna i lantir tih ka hre dawn nia," a ti a.
15. Tin, heti hi a ni a, a sawi zawh hma chuan, ngai teh, Abrahama nau Nahora nupui Milkaii fapa Bethuela fanu Rebeki chu a kokia tui bel puin a lo chhuak a.
16. Chu nula chu a hmel a tha em em a, nula thianghlim a ni a, mipa reng rengin an la pawl ngai hauh lo. Tin, tuikhurah chuan a chhuk a, a tui bel chu a tikhat a, a chho leh a.
17. Tin, chhiahhlawh chu a tawk turin a tlan a, "Khawngaih takin i tui bela tui kha tlem te mi intir teh khai," a ti a.
18. Tin, ani chuan, "In ta che, ka pu," a ti a: tin, rang takin a tui bel chu a kutah a chawi thla a, a intir ta a.
19. Tin, a intir hnuin, "I sanghawngseite tan pawh an in kham hma loh chun ka chawi zel ang e," a ti a.
20. Tin, rang takin a tui bel chu a ran thlengah chuan a ruak a, tui chawi turin tuichhunchhuah lamah chuan a tlan leh a, a sanghawngseite zawng zawng tan chuan a chawi ta zel a.
21. Tin, chhiahhlawh chuan ani chu a en reng a; LALPA'n a va zinna chu a hlawhtlintir leh tir loh hriatna'n a ngawi reng mai a.
22. Tin, heti hi a ni a, sanghawngseite chuan an in kham veleh, chhiahhlawh chuan rangkachak hnarvuah duli buk leh a kut atan banbun pahnih rangkachak tangka sawm buk a phawrh a;
23. tin, a hnenah, "Tu fanu nge i nih? Khawngaih takin mi hrilh teh. i pa inah kan riahna tur hmun a awm ang em?" a ti a.
24. Tin, ani chuan a hnenah, "Bethuela, Milkaii fapa, Nahora tan a hrinsaka fanu ka ni," a ti a.
25. Tin, amah vekin a hnenah, "Buhpawl leh ran chaw kan ngah ve ve a, riahna hmun pawh kan nei," a ti bawk a.
26. Tichuan chhiahhlawh chuan a lu a kun a, LALPA chu chibai a buk a.
27. Tin, "Ka pu chunga a khawngaihna leh a takna bang chuang lo, LALPA, ka pu Abrahama Pathian chu fakin awm rawh se: kei pawh hi LALPA chuan ka pu unaute in lamah mi hruai a lo nih hi," a ti a.
28. Tin, nula chu a tlan a, chung thu chu a nu chhungte a va hrilh a.
29. Rebeki chuan nuta a nei a, a hming chu Labana a ni a: tichuan Labana chu a chhuak a, tuikhur lamah mi hnenah chuan a tlan ta a.
30. Heti hi a ni a, hnarvuah leh a farnu kuta banbunte chu a hmu a, "Mi chuan chutin khatin mi ti a," tia, a farnu Rebeki thu sawite chu a hriat veleh chuan, mi hnenah chuan a kal ta a; tin, ngai teh, ani chu tuikhura sanghawngseite kiangah chuan a lo ding reng a.
31. Tin, Labana chuan, "Nang LALPA malsawm dawngtu lo kal la, ka inah lut rawh; engah nge pawna i din reng? In leh sanghawngseite tan hmun ka buatsaih tawh a sin," a ti a.
32. Tin, mi chu inah chuan a lut a, tin, Labana chuan sanghawngsei thuamhnaw chu a phelh a; tin, sanghawngseite tan Buhpawl leh ran chaw a pe a, a ke leh a thiante ke silna'n tui a pe bawk a.
33. Tin, Abrahama chhiahhlawh hmaah chuan ei tur an hlui a: nimahsela abu chuan, "Ka rawn kal chhan thu ka sawi hma loh chuan ka ei lo ang," a ti a. Tin, ani chuan, sawi ta che," a ti a.
34. Tin, ani chuan, "Abrahama chhiahhlawh ka ni.
35. Tin, LALPA chuan ka pu chu nasa takin mal a sawm a, mi lian tak a lo ni a: LALPA chuan a hnenah beram rual te, bawng rual te, tangka te, rangkachak te, bawihpa te, bawihnu te, sanghawngsei te a pe bawk a.
36. Ka pu nupui Sari'n a tar hnuin ka pu tan fapa a hring a: ama hnenah chuan a neih zawng zawng a pe vek a.
37. Tin, ka pu chuan, "Ka awmna rama Kanaan-ho nula zinga mi hi ka fapa nupuiah i neihsak tur a ni lo:
38. ka pa in lamah, ka laichinte hnena kalin ka fapa tan nupui i neihsak zawk tur a ni,' tiin chhia mi chhamtir a.
39. Tin, keiin ka pu hnenah chuan 'Hmeichhia chuan mi zui duh kher lo mahna' ka ti a.
40. Tin, ani chuan ka hnenah, 'LALPA, a hmaa ka awm thinna chuan a vantirhkoh chu i hnenah a tir ang a, i kalna turah chuan a hlawhtlintir ang che; tichuan ka fapa tan ka laichinte leh ka pa chhungte zinga mi nupuiah i neihsak dawn nia:
41. ka laichinte hnen ngei i thlen hunah chuan ka hnena i chhechham lakah hian i thiang ang; nula chu an pek loh che chuan ka hnena i chhechham lakah hian i thiang ang," a ti a.
42. Tichuan vawiinah hian tuikhur chu ka lo thleng a, 'Aw LALPA, ka pu Abrahama Pathian, ka kalnaah hian mi hlawhtlintir dawn chuan,
43. en teh, tuikhur kiangah ka din hi; tin, heti ni rawh se, nula tui chawi tura lo chhuak tu hnenah pawh, khawngaih takin in atan i tui bela tui kha tlemte mi pe teh, ka tiha,
44. tin, aniin ka hnenah, In rawh, i sanghawngseite tan pawh hian ka chawi ang e, titu apiang, chu mi ngei chu ka pu fapa atana LALPA hmeichhe ruat chu ni rawh se,' ka ti a.
45. Tin, ka rilrua ka sawi zawh hma chuan ngei teh, Rebeki hi tui bel puin a lo chhuak a, tin, tuikhurah chuan a chhuk a, tui a zuk chawi a: tin, a hnenah, 'Khawngaih takin tui mi intir teh khai,' ka ti a.
46. Tin, ani hian rang takin a koki ata chu a tui bel a chawi thla a, 'In rawh, i sanghawngseite pawh hi in tur ka pe ang e,' a ti a: chutichuan ka in a, sanghawngseite pawh a intir bawk a,
47. Tin, keiin, 'Tu fanu nge i nih?' tiin ka zawt a. Tin, ani hian, 'Bethuela, Nahora fapa, Milkaiin a hrinsaka fanu,' a ti a: tin, hnarvuah chu a hnarah ka vuah a, banbunte chu a kutah ka buntir bawk a.
48. Tin, ka lu ka kun a, LALPA chu chibai ka buk a, LALPA, ka pu Abrahama Pathian, ka pu naua fanu hi a fapa atan nupuia neihsak turin kawng dik taka mi hruaitu chu ka fak bawk a.
49. Tichuan tunah ka pu in khawngaih a, a chunga tih tak zeta in tih dawn chuan mi hrilh rawh u: in tih dawn loh pawhin mi hrilh rawh u; chutichuan ding lam emaw vei lam emaw ka hawi thei ang," a ti a.
50. Tin, Labana leh Bethuela chuan an chhang a, "He thil hi LALPA hnen atanga chhuak a nih hi: a chhia a tha pawh i hnenah kan sawi thei lo e.
51. En teh, Rebeki chu i hmaa hi a awm alawm, hruai la, kal ta che, LALPA'n a sawi tawh angin i pu fapaa nupuiah awm rawh se," an ti a.
52. Tin, heti hi a ni a, Abrahama chhiahhlawh chuan an thu chu a hriat veleh lei siin LALPA chibai a buk ta a.
53. Tin, Abrahama chhiahhlawh chuan tangkarua incheinate leh rangkachak incheinate leh silhfente a la chhuak a, Rebeki chu a pe a: a nuta leh a nu pawh chu thil hlu takte a pe bawk a.
54. in, amah leh a thiante chuan an eiin an in a, an riak ta a; tin, zingah an tho a, "Ka pu hnenah mi kaltir tawh rawh u," a ti a.
55. Tin, a nuta leh a nu chuan "Chemtei hi ni rei lo te, ni sawm lek tal kan hnenah awm rih rawh se; chu mi hnuah chuan a kal dawn nia," an ti a.
56. Tin, ani chuan an hnenah, "Mi tikhawtlai suh u khai, LALPA chuan ka kalnaah hian mi hlawhtlintir ta si a; ka pu hnena ka hawn theihna turin mi kaltir zawk teh u khai," a ti a.
57. Tin, anni chuan, "Chemtei chu kan ko ang a, ama ka ngei kan bia ang," an ti a.
58. Tichuan Rebeki chu an ko a, a hnenah, "He mi hnenah hian i kal duh ang em?" an ti a. Tin, ani chuan, "Duh ang chu," a ti a.
59. Tichuan an farnu Rebeki leh a awmtu leh Abrahama chhiahhlawh leh a hote chu an kaltir a.
60. Tin, Rebeki chu mal an sawmsak a, a hnenah, "Kan farnu, nang chu sing hlira sang tam tak nu lo ni la, i thlahte chuan anmahni hawtute kulh kawngkhar chu neihsak rawh se," an ti a.
61. Tichuan Rebeki chu a tho a, a bawihnute nen, sanghawngsei chungahte chuan an chuang a, mi chu an zui ta a: tichuan Abrahama chhiahhlawh chuan Rebeki chu a hruai a, a kal ta a.
62. Tin, Isaaka chu Beer-lahai-roi lam atang chuan a lo kal a, chhim rama awm a ni si a.
63. Tin, Isaaka chu tlai lamah phulah inngaihtuah turin a va leng chhuak a: tin, a han dak a, a en a, tin, ngai teh, sanghawngseite an lo kal a.
64. Tin, Rebeki chu a han dak a, Isaaka a hmuh veleh chuan sanghawngsei ata a chhuk ta a.
65. Tin, Abrahama chhiahhlawh hnenah chuan, "Phula min hmuak tura lo kal saw tu nge ni?" a ti a. Tin, chhiahhawh chuan, "Ka pu a nih saw," a ti a: tichuan a inkhuhna puan a la a, a inkhuh ta a.
66. Tin, chhiahhlawh chuan a thiltih zawng zawng chu Isaaka a hrilh a.Tin, Isaaka chuan Rebeki chu a nu Sari puan inah chuan a hruai lut a, tin, Rebeki chu a nei a, a nupui a lo ni ta a; tin, amah chu a hmangaih hle a: tichuan Isaaka chu a nu thih thuah pawh chuan a lo thlamuang thei ta a.
67. Tin, Isaaka chuan Rebeki chu a nu Sari puan inah chuan a hruai lut a, tin, Rebeki chu a nei a, a nupui a lo ni ta a; tin, amah chu a hmangaih hle a: tichuan Isaaka chu a nu thih thuah pawh chuan a lo thlamuang thei ta a.
←  Genesis (24/50)  →