←  Genesis (20/50)  →
1. Tin, Abrahama chu chuta tang chuan chhim ram lam panin a insawn a, Kades khua leh Sur karah chuan awm hmun a khuar a; Gerar khuaah chuan a awm ta rih bawk a.
2. Tin, Abrahama'n a nupui Sari chu "Ka farnu a ni," a ti a: tichuan Gerar Lal Abimeleka chuan mi a tir a, Sari chu a va hruaitir ta a.
3. Nimahsela Pathian chu zanah a mumangah Abimeleka hnenah a lo kal a, a hnenah, "Ngai teh, i hmeichhe hruai avang hian mitthi mai i ni ta; mi nupui a ni si a," a ti a.
4. Abimeleka erawh chuan a la pawl rih loa: tichuan "Lalpa, mi fel takte pawh i tihlum dawn em ni?
5. Amah ngei pawhin ka hnenah, 'Ka farnu a ni,' a ti lo'm ni? Tin, ani ngei pawhin, 'Ka nuta a ni,' a ti bawk si a: thinlung tha tak pu leh kut thianghlim tak nei chungin hei hi ka ti a ni," a ti a.
6. Tin, Pathianin a mumangah chuan, "Ni, hei hi thinlung tha tak pu chungin i ti a ni tih ka hria e, tichuan kei pawhin ka chunga i thil tihsual tur chu ka khap che a ni: chuvangin a ni, amah i khawih ka phal loh ni.
7. Chutichuan tunah mi nupui kha pe kir leh rawh; ani chu zawlnei a ni si a, a tawngtaisak ang chia, tin i dam dawn nia: i pek kir loh zawngin i thi ngei dawn tih hre rawh, nang leh i neih zawng zawngte nen," a ti a.
8. Tichuan Abimeleka chu zing takah a tho a, a chhiahhlawh zawng zawng a ko a, an beng hriatah chung thu zawng zawng chu a hrilh a: tin, mite chuan an hlau ta em em a.
9. Chutichuan Abimeleka chuan Abrahama a ko a, a hnenah, "Kan chunga i thiltih hi engtizia nge ni le? Eng kawngah nge i chungah thil ka tihsual a, kei leh ka khua leh tuite chungah thil sual nasa tak i rawn thlen hi le? Thil tih awm loh tak hi ka chungah i tih tak hi," a ti a.
10. Tin, Abimeleka vek chuan Abrahama hnenah, "Engnge i hmuh a, hetiang thil i tih le?" a ti leh a.
11. Tin, Abrahama chuan , "He mi khuaah hian Pathian tihna a awm hauh lo ngei ang a, ka nupui avang hian mi tihlum mai ang tih ka rin avang a ni.
12. Chuachhapah ka farnu a ni reng bawk si a, ka pa fanu a ni a, ka nu fanu erawh chu a ni lo; tin, ka nupuiah a lo awm ta a ni:
13. tin, heti hi a ni a, Pathianin ka pa in ata mi vahvaihtir lai khan, a hnenah, 'Hei hi i khawngaihna ka chunga i lantir tur chu a ni; kan thlenna hmun apiangah, Ka nuta a ni, ti zel ang che ka ti reng a ni," a ti a.
14. Tin, Abimeleka chuan beramte leh bawngpate leh bawihpate leh bawihnute a hruai a, Abrahama chu a pe a, a nupui Sari pawh chu a pe kir leh ta a.
15. Tin, Abimeleka chuan, "En teh, ka ram chu a awm duai a lawm i duhna apiangah hian awm rawh," a ti a.
16. Tin, Abimeleka chuan, "En teh, i nuta hi tangka sangkhat ka pe ta a: ngai teh, i hnena awm zawng zawngte lakah chuan i tan mit khuhna tur a nih hi; i chung thu reng rengah hian i fel leh tawh vek a ni," a ti a.
17. Tichuan Abrahama chuan Pathian hnenah a tawngtai a: tin, Pathianin Abimeleka leh a nupui leh a bawihnute chu a tidam leh a; tichuan fate an hring leh ta a.Abrahama nupui Sari avang chuan LALPA chuan Abimeleka chhungte zawng zawng chu a tiching ta tlat hlawm si a.
18. Abrahama nupui Sari avang chuan LALPA chuan Abimeleka chhungte zawng zawng chu a tiching ta tlat hlawm si a.
←  Genesis (20/50)  →