←  Genesis (16/50)  →
1. Tin, Abrama nupui Saraii chuan fa reng reng a hrinsak loa: tin, Saraii chuan Aigupta mi bawihnu pakhat a nei a, chu mi hming chu Hagari a ni a.
2. Tin, Saraii chuan Abrama hnenah, "Ngai teh khai, LALPA'n fa mi neihtir phal loh hi; khawngaih takin ka bawihnu pawl rawh; ama lakah chuan fate ka nei mahna," a ti a. Tichuan Abrama chuan Saraii thu chu a zawm ta a.
3. Tichuan Abrama nupui Saraii chuan Abrama chu Kanaan rama kum 10 a awm hnu chuan a bawihnu Aigupta mi Hagari chu a hruai a, a pasal Abrama hnenah chuan a nupuia awm turin a pe a.
4. Tin, Hagari chu a lo pawl a; tin, ani chu a rai ta a: tin, a rai tih a inhriat veleh a pi chu a lo hmusit ta mai a.
5. Tichuan Saraii chuan Abrama hnenah, "Ka thil tuar hi nangin a mawh phur rawh: ka bawihnu chu i pawm atan ka pe chia; tin, a rai tih a inhriat veleh mi hmusit ta mai a; LALPA chuan nang leh keia thu hi ngaihtuah rawh se," a ti a.
6. Abrama erawh chuan Saraii hnenah, "Ngai teh, i bawihnu chu i kuta awm alawm; i remtih ang apiang chu a chungah ti ta che," a ti a. Tichuan Saraii chuan a tirethei ta hle a, chuvangin a tlan bosan ta a.
7. Tin, LALPA vantirhkoh chuan thlalerah tuikhur kiangah, Sur panna kawnga tuikhurah chuan a lo hmu a.
8. Tin, a hnenah, "Hagar, Saraii bawihnu, khawi atangin nge i lo kal a, khawiah nge i kal dawn?" a ti a. Tin, ani chuan, "Ka pi Saraii hnen ata ka tlan bo a ni," a ti a.
9. Tin, LALPA vantirhkoh chuan a hnenah, "I pi hnenah kir leh la, a thu thuin awm rawh," a ti a.
10. Tin, LALPA vantirhkoh vek chuan a hnenah, "I thlahte chu chhiarsen loh khawp hiala tamin ka la tipung ang," a ti leh a.
11. Tin, LALPA vantirhkoh vek chuan a hnenah, "Ngai teh, nau i pai ta a, fapa i hring ang a; LALPA chuan i hreawmzia hi a hriat tak avang hian a hmingah chuan Ismaela i sa tur a ni.
12. Ani chu mihring zinga ram sabengtung ang a ni ang; ani chuan mi tin a do ang a, mi tinin a ni pawh an do bawk ang; a unau zawng zawng depah a awm bawk ang," a ti leh pek a.
13. Tin, Hagari chuan amah betu LALPA hming chu "Nang hi hmu theitu Pathian i ni," tiin a vuah a, "Hetah ngei hian mi hmutu chu ka en zui zel em ni aw?" a ti a ni.
14. Chu mi avangin tuichhunchhuah chu "Beer-lahai-roi" vuah a ni ta a; Ngai teh, Kades leh Bered khaw inkarah a awm.
15. Tin, Hagari chuan Abrama chu fapa a hrinsak a: tin, Abrama chuan a fapa Hagari hrin chu a hmingah Ismaela a sa ta a.Tin, Hagarin Abrama tan Ismaela chu a hrin lai chuan Abrama chu kum 86 mi a ni a.
16. Tin, Hagarin Abrama tan Ismaela chu a hrin lai chuan Abrama chu kum 86 mi a ni a.
←  Genesis (16/50)  →