←  Genesis (14/50)  →
1. Tin, Sinar khaw lal Amraphela te, Ellasar khaw lal Arioka te, Elam khaw lal Kedorlaomera te, Goiim khaw lal Tidala te dam lai chuan heti hi a ni a,
2. anni chuan Sodom khaw lal Bera chu an run a, Gomorra khaw lal Birsa te, Adma khaw lal Sinaba te, Zeboiim khaw lal Semebera te, Bela khaw lal te chu an run bawk a, (Bela khua chu Zoar khua a ni ta.)
3. Chungho zawng zawng chu Siddim ruamah chuan an tang tlang a (chu mi ruam chu Tuifinriat Al a ni ta)
4. kum sawm leh kum hnih chhungin Kedorlaomera hnuaiah an awm a, a kum sawm leh kum thumnaah erawh chuan an hel ta a.
5. Tichuan a kum sawm leh kum linaah chuan Kedorlaomera leh a hnena lal awmte chu an lo kal a, Asteroth-karnaim khuaah Rewphaim-hote an that a, Ham khuah Zuzim-hote an that a, Kiriathaim khuah Emim-hote an that a.
6. an awmna Seir tlangah, El-paran thlengin Hor-hote an that a, (El-paran chu thlaler depa awm a ni.)
7. Tin, an kir leh a, En-mispat an thleng a, (chu chu Kades a ni ta) Amalek-ho rama mi zawng zawng leh Amor-ho, Hazazontamar khuaa awmte pawh chu an that leh a.
8. Tichuan Sodom khaw lal te, Gomorra khaw lal te, Adma khaw lal te, Zeboiim khaw lal te, Bela khaw lal te an chhuak a (bela khua chu Zoar khua a ni ta;) tin, Siddim ruamah chuan anniho chu bei turin an tang tlat a;
9. Elam khaw lal Kedorlaomera te, Goiim khaw lal Tidala te, Sinar khaw lal Amraphela te, Ellasar khaw lal Arioka te chu bei turin; lal paliin lal panga an bei a.
10. Tin, Siddim ruam chu alkatra khurin a khat a; tin Sodom leh Gomorra khaw lalte chu an tlanchhia a, chutah chuan an tla a, a tla bangte chu tlangah chuan an tlan bo ta a.
11. Tichuan Sodom leh Gomorra mite sum zawng zawng leh an ei tur zawng zawng an la a, an haw ta a.
12. Lota, Adrama unaua fapa, Sodom khuaa awm chu, a sumte nen an la bawk a, an kal ta a.
13. Tin, mi pakhat tlan chhuak chu a lo kal a, Hebrai mi Abrama chu a hrilh a: ani chu Amor mi Mamrea sasaw kiangahte chuan a awm a. Mamrea chu Eskola unau leh Anera unau a ni a; chung mite chu Abrama te nena tang za an ni a.
14. Tin, Abraman a fa chu salah an hruai tih a hriat veleh, a ina piang, ama mi, zir thiam sa tawh, 318 a hruai chhuak a, Dan khaw thlengin a um ta a.
15. Tin, zanah chuan anmahni bei turin amah leh a bawihte chu an insem darh a, anniho chu an that a, Hoba khaw thlengin an um a, (Hoba chu Damaska khaw hmar lamah a awm a.)
16. Tin, sum zawng zawng chu a rawn la kir leh vek a, a fa Lota leh a sumte chu a rawn la leh vek bawk a, hmeichhiate pawh a rawn hruai leh a, mi dang zawng zawngte nen.
17. Tin, Kedorlaomera leh a hnena lal awmte thata a hawn hnuah chuan Sodom lal chu Save ruamah chuan Abrama hmuakin a chhuak a, (Save ruam chu Lal ruam a ni ta.)
18. Tin, Salem khaw lal Melkisedeka chuan chhang leh uain a rawn la a: ani chu Pathian Chungnungbera puithiam a ni a.
19. Tin, ani chuan Abrama chu mal a sawm a, "Lei leh van neitu Pathian Chungnungbera chuan Abrama malsawm rawh se.
20. I hmelmate i kuta petu, Pathian Chungnungbera chu fakin awm bawk rawh se," a ti a. Tin, Abrama chuan ani chu engkim chu sawma pakhat a pe a.
21. Tin, Sodom khaw lal chuan Abrama hnenah, "Mihringte hi mi pe la, sumte hi chu nangma'n nei rawh" a ti a.
22. Tin, Abrama chuan Sodom khaw lal hnenah chuan, "La zai khat te pawh, pheikhawk chilhna pakhat te pawh, i neih reng reng chu ka la lo ang,
23. tiin lei leh van neitu, LALPA, Pathian Chungnungbera lamah chuan ka kut ka phar tawh a ni, chutichuan 'Abrama chu keima tihhausak alawm,' i ti dah ang e:tlangvalho ei ral leh ka mi kalpuite chanvo chauh lo chu ka la lo ang; Anera te, Eskola te, Mamrea te chuan an chanvo chu la rawh se," a ti a.
24. tlangvalho ei ral leh ka mi kalpuite chanvo chauh lo chu ka la lo ang; Anera te, Eskola te, Mamrea te chuan an chanvo chu la rawh se," a ti a.
←  Genesis (14/50)  →