←  Genesis (13/50)  →
1. Tin, Abrama chu Aigupta ram atang chuan a chhuak a, chhim ramah chuan a chho ta a, a hnenah chuan a nupui te, a neih zawng zawng te, Lota te an chho ve a.
2. Tin, Abrama chu ran te, tangka te, rangkachak tein a hausa em em a.
3. Tin, chhim ram atang chuan Bethel thleng zakin a kal zel a, Bethel leh Ai khaw inkara atira a puan in awmnaah khan:
4. atira a maicham siamna ngeiah khan; tin, chutah chuan Abrama chuan LALPA hming a lam a.
5. Tin, Lota, Abrama hnena kal vea pawh khan beram rual te, bawng rual te, puan in te a nei ve a.
6. Tin, an awm dunna turin ramin a daih ta lo a: an thil neih chu a nasa em si a. Chutichuan, an awm dun thei ta hlawl lo a.
7. Tichuan Abrama ran pute leh Lota ranpute karah chuan inhnialna a lo chhuak ta a: chu mi lai chuan Kanaan-hote leh Periz-hote chu, chu mi ramah chuan an awm a.
8. Tichuan Abraman Lota hnenah, "Khawngaih takin, nang leh keia karah, i ran pute leh ka ran pute karah pawh inhnialna awm suh se; unau kan ni si a,
9. Ram chu a pum puiin a awm duai lo em ni? Khawngaih takin ka hnen ata hi intihrang mai rawh: nang vei lama i kal chuan kei ding lamah ka kal ang a; a nih loh leh, nang ding lama i kal chuan kei vei lamah ka kal ang e," a ti a.
10. Tichuan Lota chu a dak a, Zoar khaw lam pan zawng chuan Jordan Phaizawl zawng zawng chu LALPA huan ang, Aigupta ram ang khan ram tina tui tam tak awm chukna a ni tih a hria a, LALPA'n Sodom leh Gomorra khua a tihchhiat hma kha a ni si a.
11. Chutichuan Lota chuan Jordan Phaizawl zawng zawng chu a thlang ta a; tin, Lota chu chhak lamah chuan a insawn a: tichuan an inthen ta a.
12. Abrama chu Kanaan ramah chuan a awm a, Lota chu Phaizawl khuaahte chuan a awm a, a puan in chu Sodom khaw thlengin a sawn zel a.
13. Tin, Sodom mite chu LALPA mithmuhin nasa taka suaksual leh mi sual an ni a.
14. Tin, a hnan ata Lota a awm hran hnu chuan LALPA'n Abrama hnenah, "Dak la, i awmna atang khan hmar lam te, chhim lam te, chhak lam te, thlang lam te en rawh:
15. I ram hmuh zawng zawng hi nang leh i thlahte kumkhua atan ka pe dawn che u a ni.
16. Tin, i thlahte chu leia vaivut ang maiin ka la siam ang: chutichuan miin leia vaivut hi an chhiar sen chuan i thlahte pawh chhiar sen an ni bawk ang.
17. Tho la, ram hi a dung a vang fang chhuak rawh; ka pe dawn che a ni," a ti a.Tichuan Abrama chuan a puan in chu a sawn a, Hebrona awm Mamre sasaw kiangahte chuan awm hmun a va khuar a, chutah chuan LALPA tan maicham a siam a.
18. Tichuan Abrama chuan a puan in chu a sawn a, Hebrona awm Mamre sasaw kiangahte chuan awm hmun a va khuar a, chutah chuan LALPA tan maicham a siam a.
←  Genesis (13/50)  →