←  Genesis (11/50)  →
1. Tin, leia mi zawng zawng chu tawng hmun khat leh thu sawi dan hmun khat an ni vek a.
2. Tin, heti hi a ni a, khaw chhak lama an insawn zel lai chuan Sinar ramah phaizawl an hmu a; chutah chuan awm hmun an khuar ta a.
3. Tin, "Hawh u, leirawhchan siam i la, tha takin i rawh ang u," an inti hlawm a. Tichuan lung aiah leirawhchan an hmang a, a charna'n alkatra.
4. Tin, "Hawh u, khawpui siam i la, in sang a chhipina van tawng turin sa bawk i la, kan hming i tithang ang u; chutilochuan lei chung zawng zawngah hian tihdarhin kan awm dah ang e," an ti a.
5. Tin, LALPA chu mihring faten khawpui leh in sang an siam vel chu en turin a zuk chhuk a.
6. Tin, LALPA chuan, "Ngai teh u, mite hi pum khat an ni a, an zain tawng hmun khat an nei si a; hei thil an ti tan a nih hi; tunah zawng an thiltih tum reng rengte pawh khapsak rual a ni tawh lo ang.
7. Hawh u, i zuk kal ang u khai, tawng an inhriat tawn theih lohna'n khutah khuan an tawng i zuk tihhransak ang u," a ti a.
8. Chutichuan LALPA'n anniho chu chuta tang chuan lei zawng zawngah chuan a tidarh a: tichuan an khawsiam chu an bansan ta a.
9. Chuvangin a hming chu Babel an ti a: LALPA'n chutah chuan leia mi zawng zawng tawng chu a a tihhransak tak avangin: chuta tang chuan LALPA'n anniho chu lei chung zawng zawngah chuan a tidarh ta bawk a.
10. Heng hi Sema thlahte chu an ni. Sema chu kum 100 mi a ni a, tui let hnu kum hnih chinah chuan fapa Arpaksada a nei a:
11. tin, Arpaksada a neih hnu chuan Sema chu kum 500 a la dam a, fanu leh fapate a nei leh hlawm a.
12. Tin, Arpaksada chuan kum 35 a nihin fapa Sela a nei a:
13. tin, Sela a neih hnu chuan Arpaksada chu kum 403 a la dam a, fanu leh fapate a nei leh hlawm a.
14. Tin, Sela chuan kum 30 a nihin fapa Ebera a nei a:
15. tin, Ebera a neih hnu chuan Sela chu kum 403 a la dam a, fanu leh fapate a nei leh hlawm a.
16. Tin, Ebera chuan kum 34 a nihin fapa Pelaga a nei a:
17. tin, Pelega a neih hnu chuan Eberra chu kum 430 a la dam a, fanu leh fapate a nei leh hlawm a.
18. Tin, Pelega chuan kum 30 a nihin fapa Reuva a nei a:
19. tin, Reuva a neih hnu chuan Pelega chu kum 209 a la dam a, fanu leh fapate a nei leh hlawm a.
20. Tin, Reuva chuan kum 32 a nihin fapa Seruga a nei a:
21. tin, Seruga a neih hnu chuan Reuva chu kum 207 a la dam a, fanu leh fapate a nei leh hlawm a.
22. Tin, Seruga chuan kum 30 a nihin fapa Nahora a nei a:
23. tin, Nahora a neih hnu chuan Seruga chu kum 200 a la dam a, fanu leh fapate a nei leh hlawm a.
24. Tin, Nahora chuan kum 29 a nihin fapa Tera a nei a:
25. Tin, Tera a neih hnu chuan Nahora chu kum 119 a la dam a, fanu leh fapate a nei leh hlawm a.
26. Tin, Tera chuan kum 70 a nihin fapa Abrama te, Nahora te, Harana te a nei a.
27. Tin, he'ng Tera thlahte chu an ni. Tera chuan fapa Adrama te, Nahora te, Harana te a nei a; tin, Harana chuan fapa Lota a nei a.
28. Tin, Harana chu a pianna rama, Kaldai-ho khua Ur-ah, a pa Tera hmaah chuan a thi a.
29. Tin, Abrama leh Nahora chuan nupui an nei a: Abrama nupui hming chu Saraii a ni a; Nahora nupui hming chu Harana fanu Milkaii a ni a, Harana chu Milkaii pa leh Iskaii pa chu a ni.
30. Tin, Saraii chu a ching a; fa reng a nei lo a.
31. Tin, Tera chuan a fapa Abrama te, a fapaa fapa (Harana fapa) Lota te, a mo, a fapa Abrama nupui Saraii te a hruai a; tin, Kanaan-a kal turin Kaldai-ho khua Ur atang chuan an chhuak ho ta a; tin Haran khua an lo thleng a, chutah chuan awm hmun an khuar ta a.Tin, Tera dam chhung chu kum 205 a ni a: tin, Tera chu Haran khuaah chuan a thi ta a.
32. Tin, Tera dam chhung chu kum 205 a ni a: tin, Tera chu Haran khuaah chuan a thi ta a.
←  Genesis (11/50)  →