←  Ezra (9/10)  →
1. Tin, chung thiltih zawh chuan miliante chuan, "Israel mite leh puithiamte leh Levi chite chu he ram mite lakah hian inthiarfihlim chuang loin, Kanaan-ho te, Hit-ho te, Periz-ho te, Jebus-ho te, Amon-ho te, Moab-ho te, Aigupta ho te, Amor-hote thiltih tenawm tak an tih ang zel an ti ve a.
2. An fanute chu anmahni leh an fapaten an nei ta mai a; chutichuan chi thianghlim chu he ram mite nen hian an chawhpawlh a: a ni, mi liante leh roreltute chu he mi bawhchhiat thuah hian a tupa berte an ni," tiin mi rawn hrilh a.
3. Tin, chu thil chu ka hriat chuan ka kawr leh ka puan ka pawt thler a, ka sam leh ka khabe hmul ka pawt thla a, a ngaihna hre loin ka thu ta ngawih ngawih mai a.
4. Chutichuan sal chhuakho bawhchhiatna avanga Israelte Pathian thua khur apiangte chu ka hnenah an lo kal khawm a; tlai lam inthawi hun thlengin a ngaihna hre loin ka thu ta ngawih ngawih a.
5. Tin, tlai lam inthawi hun chuan ka lungngaihna ata ka kawr leh ka puan thler chung chuan ka tho a; tin, ka thingthi a, LALPA ka pathian lamah ka thingthi a, LALPA ka pathian lamah ka ban ka phar a;
6. tin, "Aw ka Pathian, i lam lo hawi hi ka zak a, ka hmai te a sen tawn tawn a ni, ka Pathian; kan bawhchhiatnate chu min chimpil khawpin a pung a, kan thiam lohna chuan van a tawng a.
7. Kan pi leh pute chenin tun thleng hian kan thiam lo let der a ni; kan bawhchhiatna avangin kan lalte, kan puithiamte nen ram dang lal man te, khandaiha thah te, sala tan te, rawk te, mualphonate kan tawk a, vawiina kan awm ang hian.
8. Tin, tunah hian kan pathian chuan kan mitte a tihvara, sala kan awm min tihhraha, a hmun thianghlimah chuan min awm nghehtlattirna turin a la awm chhunte chu min chhuahtirin, LALPA kan Pathian khawngaihna kan dawng rih mai a ni a.
9. Chhiah khua zawng kan ni ngei mai a; nimahsela kan pathian chuan chhiah khua kan nih chhung pawhin min thlahthlam chuang lo a, min tiharh tur leh kan Pathian in din tur leh a chhe hnu chei leh tur leh Judai ram leh Jerusalem-a kulh nei turin Persia lalte mithmuhah chuan kan chungah khawngaihna a zam zautir ta zawk a.
10. Aw kan pathian, tunah hian eng nge kan sawi tak ang? I thupekte chu kan hawisan ta si a.
11. i chhiahhlawh zawlneite hmanga, In va kalna tur, in ram luah tur chu a rama mi awmte bawlhhlawhna avangin a bhawlhhlawh a, kil tin, kil tang an tenawmnain a titenawm vek a ni.
12. Chuvangin in fanute chu an fapate neihtir suh u la, an fanute chu in fapate neihtir hek suh u la, an thawvenna leh an hmuingilna reng reng zawnsak hek suh ula, in lo chak a, chu mi rama thil tha chu in ei a, kumkhuaa in fate in in rochun theihna'n, tia thu i pekte chu.
13. Tin, kan thiltih sual avang leh kan thiam lohna nasa tak avanga kan chunga hetiang thil a lo awm a, nang kan pathian in kan bawhchhiatnain a phu aia nepa min hrem hnua la awm cheute min la nei tih hre reng chung siin,
14. i thupekte chu kan bawhchhe lehin he'ng thil tenawm titute nen hian kan la inneih pawlh cheuhdawn em ni? A bak reng awm lo leh pumpelh reng pawh awm loa min tiboral khawpin kan chungah i thinur hial dawn lo'm ni?Aw LALPA, Israelte Pathian, nang chu i fel a; a la awm chhuakte kan ni a, vawiinah keini ang hi , ngai teh, thiam loin i hmaah kan awm a, he mi avang hian tumah i hmaa ding thei reng reng kan awm lo a ni," ka ti a.
15. Aw LALPA, Israelte Pathian, nang chu i fel a; a la awm chhuakte kan ni a, vawiinah keini ang hi , ngai teh, thiam loin i hmaah kan awm a, he mi avang hian tumah i hmaa ding thei reng reng kan awm lo a ni," ka ti a.
←  Ezra (9/10)  →