←  Ezekiel (31/48)  →
1. Tin, heti hi a ni a, kum sawm leh kum khatna, thla thumna, chumi thla ni khat niah chuan LALPA thu chu ka hnenah a lo thleng a,
2. "Mihring fapa, Aigupta lal Pharaoa leh a khua leh a mite hnenah sawi la: Ropuinaah tu nge i an le?
3. Ngai rawh, Lebanon zarmawi leh Buk, hlim chhah, sang mawi, A zik chhum kara leng i iang e.
4. Siktui thiang chawm, lipui siama thang tual tual, A phunna luiten an luan vel a, Ram thing tin, chawmna'n a luantir e.
5. Chutin ram thing zawng hnehin a sang zual e, A zar a thang a, a tang a sei, Tui tamtak chawm, hnianghnarin.
6. Bu an khuar e, a zarah, chungleng sava ten, A zar hnuaiah sa tinrengin nau an nei;A hlim hnuaiah hnam ropui zawng an cheng e.
7. Chutin a mawi, a ropuina, a zar sei zelin, A zung tan tui zawng a hnianghnar e.
8. Pathian huana sidar thingten an chhing lo e, a zar, far thingin a iang zo lo, a tang pawh thingsiain a iang hek lo, A mawinaah Pathian thing a chhing zo ve.
9. A tang titamin ka siam mawi a, Pathian huana Eden thing zawngten an itsik e," tiin.
10. Chuvangin LALPA PATHIAN chuan heti hian a ti a ni; A lo san em ema, chhumte zinga a zik a lena, a thinlungin a sanzia chu a chapopui avangin,
11. hnamte zinga mi chak tak kutah ka mantir ang: a suahsual zia ang zelin a hrem ang a, ka hnawtchhuak ang.
12. Tin, awze mi hnamte zinga tihbaiawm takte chuan an kit ang a, an hluihlawn ang: tlangahte, ruamahte a tangte a tla rem rum ang a, chu ram tui luankawr zawng zawngahte a zarte chu a tliak rem rum ang: khawvela mi zawng zawngte chu an hlim ata an chhuak ang a, amah chu an kalsan ang.
13. A chhiatnaah chuan chungleng sava zawng zawngte an cheng ang a, a tang chungahte chuan ramsate an awm ang.
14. Heng hi tuia chawm thing zawng zawng an intihsan loh a, an zik chhum kara leng lo a, tuia chawm thing reng rengin an sanzia an chhuan hek lohna tur a ni: lei hmun hnuaihnung bera khuarkhuruma chhuk ta, mihring fate zingah kal turin, thihnaa mantir an ni vek tawh si a.
15. "Lalpa PATHIAN chuan heti hian a ti a ni: Seola a chhuk ni-ah chuan tui thuk tak chu amah ka suntir a, a luite ka chawlhtir a tui tamtakte chu a luang lo a; Lebanon amah ka suntir bawk aram thing zawng zawngte amah avangin an chau zo ta.
16. Hnamte pawh a tlu thawmah chuan ka tikhur a, khuarkhuruma chhuk tawhte hnena seola ka paihthlak ni chuan; Eden thing zawng zawngte, Lebanon thing tha thate, tuia chawm zawng zawngte chu lei hnuaihnung berah chuan thlamuanin an awm ta.
17. Khandaiha thahte hnenah chuan Seolah an chhuk ta bawk a; ani hnamte zinga a hlim hnuaia cheng thin, a kut ke te ngei pawh chu.Eden thingte zingah ropuina leh lennaah tu nge nang ang awm? Mahse Eden thingte nen chuan lei hmun hnuaihnung berah paihthlak i ni ang; khandaiha thah, serhtan lohte zingah i mu tur a ni, Hei hi Pharaoa leh a khua leh tuite chu an ni, tih hi LALPA PATHIAN thu chhuak a ni.
18. Eden thingte zingah ropuina leh lennaah tu nge nang ang awm? Mahse Eden thingte nen chuan lei hmun hnuaihnung berah paihthlak i ni ang; khandaiha thah, serhtan lohte zingah i mu tur a ni, Hei hi Pharaoa leh a khua leh tuite chu an ni, tih hi LALPA PATHIAN thu chhuak a ni.
←  Ezekiel (31/48)  →