←  Ezekiel (23/48)  →
1. Tin, LALPA thu chu ka hnenah a lo thleng a,
2. "Mihring fapa, hmeichhe pahnih, nu pakhat fa an awm a,
3. Aigupta ramah an hur bo a, an tleirawl teta hur an ni a, chutah chuan an hnute an dek a, an tleirawl hnute chu an hmehsak hrep a.
4. Pakhat a upa zawk hming chu Oholahi a ni a, a laizawn chu Oholihabi a ni a; ka ta an lo ni ta a, fapa te, fanu te an hring a. tin, an hmingah chuan Oholahi chu Samaria a ni a, Oholihabi chu Jerusalem a ni
5. Tin, Oholahi chu ka ta a nih hnuin a hur bo leh ta a, a ngaihzawng, a thenawm, Assuria chu a hak hiam a;
6. awptute, roreltute, tlangval itawm tak hlir, sakawr chung chuang mi, puan senduka in thuamte chu.
7. Heng Assuria tlangval thate zawng zawng lakah hian an inphalrai a, tin, a hak hiamate milim zawng zawng chuan a intibawlhhlawh leh nghal a.
8. A tleirawl tet ata a hnute an dehsak fo thin leh an mutpui thin avangin Aigupta atang khan a hur a bang chuang hek lo, anni pawhin an hurna a chungah an tlingtla a,
9. A ngaihzawngte, Assuria, a hak hiamte kut ngeiah ka mantir a ni.
10. Hengte hian a saruakna chu an hlim lansak a, a fanu leh a fapate an laksak a, a ni pawh chu khandaihi an that a, hmeichhiate zingah insawithaihna ber a lo ni ta, a chunga rel ang chu an hlen ta.
11. Tin, a laizawn Oholihabi chuan heihi a hmu a, mahse a u ai mahin a ngaihzawng haknaah chun a zual zawkin, a hurna pawh chu a u hurna aiin a zual leh sauh bawk a.
12. Assuria mi, a thenawm ram awptu leh roreltu tlangval itawm tak hlir, sakawr chung chuang mi, mawi taka in cheite chu a hak hiam a.
13. Tihbawlhhlawhin a awm tih ka hmu a, an pahnih kawng thuhmun an zawh mai a ni.
14. Tin, a hurnate chu a tizualkai a, mipa lem banga chuang, Kaldai mite thla, senlar taka chei,
15. a kawnga kawnghren hreng, diar mawi tak khim, an vaia lal hmel putak, Kaldai ram, an pianna rama Babulon mite ang takte chu a hmuh avangin.
16. Tin, anmahni a hmuh veleh a hak hiam a, an hnenah kaldai thlengin mi a tir a.
17. Tin, Babulon mite chu a hnenah, in ngaihna khumah an lo kal a, an hurnain a tibawlhhlawh a, an intitenawm zo ta a, anmahni chu a ngei em em a.
18. Chutichuan a hurna a tilang a, a saruak a hlim lang a, a laizawnnuin mi ngei ang maiin ani pawh chuan mi ngei ta a.
19. Mahse a tleirawl laia Aigupta rama a hur lai a hriat reng avangin a hur zual ta deuh deuh a.
20. Tin, a uiretu, a tisa sabengtung tisa ang mai, a thil chhuak, sakawrte thil chhuak ang mai chu a hak em em a.
21. Hetiangin a tleirawl lai hurna, Aigupta miin a tleirawl lai hnute a dehsak hrep lai che kha i hre chhuak leh ta a ni.
22. Chuvangin, aw Oholibah, hetiangin LALPA PATHIAN chuan a ti a ni: Ngai rawh, a ngai tu che, i rilruin a ngei hle tawh te kha ka pun ang a, kiltin ata ka hruai khawm ang.
23. Babulon mite leh Kaldai mi zawng zawngte, Pekod te, Soa te, Koa te leh an hnena Assuria mi zawng zawng nen; tlangval itawm tak takte awptute, roreltute, an zain miliante leh hmingthangte, an zain sakawr chung chuangin an lo kal ang.
24. Tin, hriamhreite, indona tawlailirte, tawlailirte leh mipui pungkhawmin an rawn bei ang che; phaw lian leh phaw te, darlukhumte nen i velin an hual ang che; tin, an hnenah rorelna ka kawltir ang a, an thurel ang zelin i chungah an hlen ang.
25. Tin, in chungah ka thikthu ka thlen ang a, thinrim takin an bei ang che; i hnarte leh i bengte an help ang a, a la damte chu khandaihin an thi ang a, i fanu leh i fapa te an laksak ang chia, a la damte chu meiin a kang hlum ang.
26. I silhfente an hlihsak bawk ang chia, i incheina mawi tak tak te chu an la bo ang.
27. I hurna leh Aigupta ram atanga i nawhchi zawrhna chu an tihban sak ang chia, chutichuan an lamah i mit i len tawh lo ang a, Aigupta ram chu i hre reng ngai tawh lo ang.
28. LALPA PATHIAN chuan heti hian a ti si a: ngai rawh. i huat tak, i rilrua i mi ngei zawng takte kut ngeiah chuan ka mantir ang che.
29. Huat tak tein an hua ang chia, i thawhrim rah zawng zawng an laksak ang chia, saruakin a lawng maiin an hnutchhiah ang che; i nawhchizawrh saruakna, i hurna leh i nawhchizawrhna ngei chu tihlanin a awm ang.
30. Heng thilte hi i chungah a lo thleng ang, hnamdangte umin i hur bo a, an milim tea i in tihbawlhhlawh avanngin.
31. I laizawnni kawng i zawh ve a, chuvangin a no chu i kutah ka pe ang che.
32. LALPA PATHIAN chuan heti hian a ti a ni: I laizawnnu no tung lianpui mai chu i in ang a, Nuihsan leh cheksawlhin i awm ang: a dawng hnem nasa a ni!
33. Ruihna leh lungngaihnain i khat ang a, mak tihna leh chhiatna no, I laizawnnu samari no nen chuan i in fai kelh ang a;
34. I in ang a, a no pawh chu i fawp fai vek ang, I hnute i ham thler ang; Keiin ka sawi tawh si a, tih hi LALPA PATHIAN thu chhuak a ni.
35. Chuvangin LALPA PATHIAN chuan heti hian a ti a ni: Mi theihnghilha mi hnuchhawn avangin i hurna leh i nawhchizawrhna mawh chu i phur mai tur a ni.
36. Chu lo pawh chu LALPA'n ka hnenah a sawi leh a,"Mihring fapa, Oholahi leh Oholihabi chu i khing dawn em? An tenawmnate chu an hnenah puang ang che.
37. An uire ta si a, thisen chu an kutah a kai a, an milim hnenah chuan an uire ta a ni; An fapate ka tana an hrin chu an hnena kangral turin meiah an paih a.
38. Chulovah pawh chuan, ka hnenah heihi an ti a ni; anni vekin ka hmun thianghlim chu an tibawlhhlawh a, ka chawlhnite pawh an bawhchhia a ni.
39. An milimte tana an fate an thah hnuah, anni vek chuan ka hmun thianghlim tibawlhhlawh turin an lut si thin a; tin, ngai rawh hetiang hian ka in chhung ngeiah an ti thin a ni.
40. Tin, chu lo pawh chu, hla taka mi lo kal turin in chah a, mi in tir a, ngai rawh an lo kal a, anmahni elin i in bual fai a, i mit i hnawih a, cheimawina dangte i in bel a,
41. khum ropui takah i lo thu a, a hmaah dawhkan i buatsaih a, ka rimtui leh ka hriakte tah chuan i hlui thin a ni.
42. Tin, tahchuan mipui nuamtawl thawm hriat a ni a, mi naran chang lo pawh thlaler atangin zurite an rawn hruai a, an pahnihin banbunte an bun a, lukhum mawite an khum a.
43. Tin, kei chuan, Uire tar hnu hi an pawl duh dawnin anin a peih dawn em ni aw? Ka ti a.
44. Tin, nawhchizuar hnena ka kalin a hnenah an lut ta tho a; tichuan hmeichhe hur Oholahi hnenah chuan an lut ta a ni.
45. Mahse mifelte chuan uirenute leh thisen chhuah ching hmeichhiate ro an relsak angin an relsak ang, uirenute an niha, an kutahte thisen a kai avangin.
46. LALPA PATHIAN chuan hetiangin a ti si a: In chungah mipui ka pun ang a, ka rawktir ang a, ka sawisak tir hrep ang.
47. Tin, puipungho chuan lungin an deng ang a, an khandaihin an sat hlum ang a, an fanute an fapate an that ang a, an inte an halsak ang.
48. Hetiang hian hurna chu ram ata ka tibo ang a, hmeichhia zawng zawngin in hurna hi chin tawp loh tur a ni tih in hriatna'n .Tin, in chungah in hurna chu an thungrul ang a, in milim sualnate chu in tuar ang, tin, kei hi LALPA PATHIAN ka ni tih in hria ang," a ti a.
49. Tin, in chungah in hurna chu an thungrul ang a, in milim sualnate chu in tuar ang, tin, kei hi LALPA PATHIAN ka ni tih in hria ang," a ti a.
←  Ezekiel (23/48)  →