←  Ezekiel (11/48)  →
1. Tin, thlarauin mi chawikanga, LALPA in chhaklam luhna, khawchhak chhawngah chuan mi thlen a: tin, ngai teh, luhna kawngkhar bulah chuan mi sawmhnih leh panga an lo awm a; an zingah chuan Azura fapa Jaazania leh Benaia fapa Paltia, mipui hotute chu, ka hmu a.
2. Tin, a ni chuan ka hnenah, "Mihring fapa, he'ng hi khawlohna phiar chhuak tute an ni a, he khawpuiah hian sual rawtchhuaktute an ni;
3. In sak hun a la ni lo e; he khawpui hi saso bel a ni a, keini hi a sa chu kan ni,' titute chu.
4. Chuvangin thu sawi la, Aw mihring fapa, an chungah thu sawi rawh," a ti a
5. Tin, LALPA thlarau chu kan chungah a lo thleng a, ani chuan ka hnenah,"Sawi rawh, LALPA chuan heti hian a ti e:'Hetiangin in ti thin a, Aw Israel chhungte u, in rilrua thil lo thlengte chu ka hre fai vek si a.
6. He khawpuiah hian in thlahte chu in tipung tulh tulh a, a kawtthlerte chu in mi thahin in ti khat ta a.
7. Chuvangin LALPA PATHIAN chuan heti hian a ti a ni: I mi thah, a laia in dahte chu a sa chu a ni a; he khawpui hi a saso bel chu a ni, mahse a lai ata sawn chhuahin in awm ang.
8. Khandaih chu in hlau a, in chungah khandaih ka rawn thlen ang, LALPA PATHIAN chuan a ti a ni:
9. A lai ata ka tichhuak ang che u a, hnamdangte kutah ka mantir ang che u a, in chung thu an rel ang.
10. Khandaihin in thi ang a, Israel ramri lamah chuan in chungthu ka rel ang; Tichuan kei hi LALPA chu ka ni tih in hre tawh ang.
11. He khawpui hi in saso bel a ni lo ang a, nangni lah a chhunga sa in ni hek lo vang; Israel ramri lamah chuan in chungthu ka rel ang a,
12. LALPA chu ka ni tih in hre tawh ang; ka dan siam chu in zawh lo a, ka thu chhuak pawh in zawm hek lo; in vela hnamte tihdan chu in zawm ta zawk a,'a ti e," tiin.
13. Tin, heti hi a ni a, thu ka han sawi chuan Benaia fapa Palatia chu a lo thi ta mai a. Tichuan ka tlu bawkkhup a, aw ring takin ka au a,"A, LALPA PATHIAN! Israel awm chhunte chimihna i siam dawn em ni?" ka ti a.
14. Tin, LALPA thu chu ka hnenah a lo thleng a,
15. "Mihring fapa, i unaute, i chi i kuangte ngei leh Israel chhungte zawng zawng an zain, Jerusalem luahtuten'LALPA lak ata kal daih rawh u, he ram hi kan ta tura pek a ni tawh e,' an tihate kha an ni a.
16. Chuvangin LALPA PATHIAN chuan heti hian a ti a ni: Hla takah hnamte zingah ka sawn bo a, ram tam takah ka tidarh na a, rei lote chhungin an lo thlen na ramah chuan an tan hmun thianghlim ka ni ang, a ti a.
17. Chuvangin LALPA chuan heti hian a ti a ni: Hnamdangte lak ata chu ka hruai khawm leh ang che u a, Israel ram chu ka pe ang che u.
18. Tin, chutah chuan an lo kal ang a, thil bawlhhlawh zawng zawng leh thil tenawm zawng zawngte chuta ta chu an la bo ang.
19. Tin, thinlung hmunkhat ka siamsak ang che u a, rilru thar ka pe ang che u. Tin, an tisa ata thinlung sak chu ka la bo ang a, thinlung nem an hnenah ka pe ang;
20. ka dan siamte an zawma, ka thuruatte an vawna, an tih theihna'n. Tichuan ka mite an ni ang a, kei pawh an pathian ka ni ang.
21. An bawlhhlawhna leh an tenawmna rilmu thinlunga la zawmte erawh chu an sual mawh chu a burin ka khumtir ang," LALPA'n a ti.
22. Tichuan cherub-ho chuan an thlate an zar a, an kiangah chuan tawlailir kete a awm a; tin, Israelte Pathian ropuina chu an chungah a awm a.
23. Tin, LALPA ropuina chu khawpui lai atangin a chho a, khawpui chhak lampanga tlang sangah chuan a han ding ta a.
24. Tin, thlarau chuan mi chawikang ta a, inlarnaah chuan Pathian thlarauin Kaldai ram a sal tangte hnenah chuan mi thlen a. Chutichuan ka inlarna hmuh chuan mi chhohsan ta a.Tichuan sal tangteho hnenah chuan LALPA thil mi entir zawng zawng chu ka sawi ta a.
25. Tichuan sal tangteho hnenah chuan LALPA thil mi entir zawng zawng chu ka sawi ta a.
←  Ezekiel (11/48)  →