←  Exodus (5/40)  →
1. Tin, chu mi hnuah chuan Mosia leh Arona chu an va kal a, Pharaoa hnenah, "LALPA, Israela-hote Pathianin heti hian a ti, 'Ka mite hi thlalerah ka hnenah lo kut turin rawn kaltir rawh,' tiin," an ti a.
2. Tin, Pharaoa chuan, "Tunge maw ni LALPA, a thu ka han zawm a, Israel-hote ka han chhuahtirna tur chu ni le? LALPA chu ka hre lo e, tin, Israela-hote lah ka chhuahtir hek lo ang," a ti a.
3. Tin, anni chuan, "Hebraite Pathianin mi rawn tlawh ta mai a: thlaler ni thum kalah LALPA kan Pathian hnena kan va inthawi theihna turin khawngaih takin kan va kal ang e; chutilochuan kan chungah hian hri emaw khandaih emaw a rawn lentir mai dah ang e," a ti a.
4. Tin, Aigupta lal chuan an hnenah, "Engtizia nge nangni Mosia leh Arona hi, mipuite hnathawk lai in dawngdahtir ni? In hna chu va thawk reng reng tawh u," a ti a.
5. Tin, Pharaoa chuan, "Ngai teh u, he mi rama mite hi in lo tam ta hle mai a, tin, nangnin an phurrit phur chu in chawlhtir mai a," a ti a.
6. Tin, chu ni ngei chuan Pharaoan hnathawk vengtute leh an hotute hnenah chuan,
7. "Tun achinah zawng tun hma ang khan mite hi leirawhchana siam tur buhpawl in pe tur a ni tawh lo e, anmahni ngeiin buhpawl chu thiar khawm rawh se.
8. Tin, leirawhchan tun hmaa an siam zat bawk kha anmahni lakah chuan in phut tur a ni a; in tihtlemsak hlek tur a ni lo e; an thatchhia a nih hi; chuvangin alawm, 'Kan Pathian hnenah kan va inthawi ang e,' an tih ni.
9. Mite hi hnathawh hautak lehzual tuk rawh u khai, chung chu thawk se la; dawt thu mai maite hi ngaisang suh se," tiin thu a pe a.
10. Tin, hnathawk vengtute leh an hotute chu an kal chhuak a, mite hnenah chuan, "Pharaoan, 'Buhpawl zawng ka pe dawn tawh lo a che u,' a ti a ni.
11. Nangmahniin buhpawl chu in hmuh theih ang ang va thiar khawm rawh u: in hnathawh hi an tihtlemsak chuang dawn hlek lo che u a nia," an ti a.
12. Chutichuan mite chu Aigupta ram chhung zawng zawngah chuan buhpawl aiah buh bul zawng khawmin an vak darh chum chum a.
13. Tin, hnathawk vengtute chuan, "Tun hmaa buhpawl awm lai ang bawk khan, in hnathawh, in ni tin hnathawhte hi thawk zo thuai thuai rawh u," tiin an tur hmanhmawh chhen thin a.
14. Tin, Pharaoa hnathawk vengtuten Israela thlahte zinga hotu atana an ruatte chu an vuaa, "Engati nge niminah te leh vawiinah te pawh tun hma ang bawka leirawhchan siam hi in zawh loh ni?" tiin a chhang a.
15. Tichuan Israela thlahte hotute chu Pharaoa hnenah an va kal a, "I chhiahhlawhte hi engati nge heti taka min tih le?
16. I chhiahhlawhte buhpawl reng reng min pe ta lo a, anni chuan, 'Leirawhchan siam rawh u, min ti si a: tin, ngai teh, i chhiahhlawhte hi min vua a; nimahsela nangma mite ngei thiam loh a ni zawk a ni," tiin an mangan thu an va sawi a.
17. Nimahsela ani chuan, "In thatchhia a ni, in thatchhia a ni: chuvangin a ni, 'LALPA hnenah kan va inthawi ang e,' in tih ni.
18. Chuvangin kal u la, va thawk rawh u; buhpawl zawng kan pek dawn loh che u hi, amaherawhchu leirawhchan an tuk zat che u kha chu in siam reng reng tur a ni," a ti a.
19. Tin, "In ni tin hnathawh, in lei rawh chan siam hi in titlem chuang hlei lo ang e," an tih veleh chuan Israela thlahte hotute chuan, an chan a chhe em em a ni tih an lo inhre ta a.
20. Tin, Pharaoa hnen atanga an lo chhuak chuan, Mosia leh Arona kawnga lo ding an rawn hmu a:
21. tin, an hnenah, "LALPA'n en che u se la, rorelsak che u rawh se; keimahni min thahna tura an kuta khandaih kentirin Pharaoa mithmuhah leh a chhiahhlawhteho lakah hian huat min phuttir tak avang hian," an ti a.
22. Tichuan Mosia chuan LALPA lam a hawi a, "Lalpa, eng tizia nge he mite hi tha lo taka i tih le? Eng vangin nge mi tirh ni?Pharaoa hnena i hminga thu sawi tura ka lo kal achin he mite hi tha lo takin a ti a; nang lah chuan i mite hi i la chhan chhuak hauh si lo a," a ti a.
23. Pharaoa hnena i hminga thu sawi tura ka lo kal achin he mite hi tha lo takin a ti a; nang lah chuan i mite hi i la chhan chhuak hauh si lo a," a ti a.
←  Exodus (5/40)  →