←  Exodus (34/40)  →
1. Tin, LALPA'n Mosia hnenah, "Lung phek pahnih hmana mi ang kha chher leh rawh: tin, lung phekah chuan hmana i tihkeh tak lung pheka thu chuang ang kha ka ziak leh ang e.
2. Naktuk zingah inpeih chhuah tum ang che, tin, zingah chuan Sinai tlangah lo chho la, tlang chhipah ka hmaan lo ding ang che.
3. i hnenah tumah lo kal ve suh se, tlangah reng reng chuan tumah a lanin lo lang hauh su se; beram rualte leh bawng rualte pawh tlang pangah chuan tla hlek bawk suh se," a ti a.
4. Chutichuan lung phek pahnih hmana mi ang kha a chher a, tin, Mosia chu zing takah a tho a, LALPA'n thu a pek angin Sinai tlangah chuan a han lawn a, tin, lung phek pahnih a a keng a.
5. Tin, LALPA chu chhumah chuan a lo chhuk a, tin, a kiangah a va ding a, LALPA hming chu a lam ta a.
6. Tin, LALPA chuan a hma lamah chuan a kal pel a, "LALPA chu, LALPA chu, PATHIAN lainatnaa khat, mi khawngaih thei tak, thin nel tak, ngilneihna leh thu tak ngah,
7. mi sang tam tak chua khawngaihna lantir thin, khawlohna te, bawhchhiatna te, suahsualna te ngaidam thin; thiam loa ruatte chhuah mai ngai lo; pate khawlohna avanga fa te, fate fa leh te, chchuan thumna leh chuan lina thleng pawha hrem thin chu," tiin a puang ta a.
8. Tichuan Mosia chu a kaikun ta thuai a, chibai a buk ta a.
9. Tin, ani chuan, "Tunah hian i mittlung ka nih chuan, aw Lalpa, Lalpa chu ka hnenah khawngaih takin kal ve ang hmiang; hnam luhlul tak an ni si a; tichuan kan khawlohna leh kan sualna ngaidam la, i rochan atan min nei ang che," a ti a.
10. Tin, ani chuan, "Ngai teh, thu ka thlung e: khawvel zawng zawng leh tu hnam zing maha la tih ngai loh, i mite zawng zawng mithmuhah hian thil mak ka ti dawn e: tichuan i vela awmho zawng zawngte hian LALPA thilti chu an hmu ang, i tana ka thiltih tur hi rapthlak tak a ni dawn si a.
11. vawiina ka thupek tur che hi pawm rawh: ngai teh, i hmaah chuan Amor-ho te, Kanaan-ho te, Hit-ho te, Periz-ho te, Hiv-ho te, Jebus-ho te ka hnawt chhuak dawn e.
12. Fimkhur rawh, chutichuan i kalna tur rama chengte hnenah thu i thlung ang a, in zingah hian thang a lo ni dah ang e:
13. amaherawhchu an maichamte chu in tichim vek tur a ni a, an lungphunte chu tikeh sawm vekin, an Asera-te chu in kit vek tur a ni:
14. Pathian dang reng reng chu i be tur a ni si lo va: LALPA chu a hming reng pawh thikthuchhiaa a ni a, Pathian thikthuchhia a ni si a:
15. chutilochuan chu mi rama mite hnenah chuan thu i thlung ang a, an pathiante lakah an uire ang a, an pathiante hnenah an inthawi ang a, an rawn sawm chein an inthawina chu i ei dah ang e;
16. tin, i fapate tan an fanute i nei ang a, an fanute chu an pathiante lakah an uire ang a, i fapate pawh an pathiante lakah an uiretir dah ang a.
17. Milem chhun pathiante chu i siam tur a ni lo.
18. Chhang dawidim telh loh Kut i nei tur a ni. Thu ka lo pek tak che ang khan, ni sarih chhung chu chhang dawidim telh loh Abib thlaa hun ruatah khan i ei tur a ni. Abib thla khan Aigupta ram ata chu i lo chhuak a ni si a.
19. Chhul keu hmasa ber apiang chu ka ta a ni; tin, i ran pa zawng zawng sebawngpa leh berampa piang thla hmasa berte pawh.
20. Tin, sabengtung piang thla hmasa ber chu beram noin i tlan tur a ni: tin, i tlan duh loh leh a ring chu i ulh tliak tur a ni. I fapa piang hmasa zawng zawng chu i tlan tur a ni. Tichuan ka hmaah tumah hi kut ruakin in lo lang tur ani lo.
21. Ni ruk chhungin hna i thawk tur a ni a, a ni sarih ni erawh chuan i chawl tur a ni: lei leh lai leh bu seng lai pawhin i chawl tur a ni.
22. Chawlhkar Kut, buh thar tirh Kut chu, kum a lo ral a, buh kchhung vek hnua pawl Kut nen i nei tur a ni.
23. i mipa zawng zawngte chu kum khatah vawi thum, Lalpa Pathian, Israelte Pathian hmaah chuan an rawn inlan thin tur a ni.
24. i hmaah hnam tin, ka hnawt chhuakin, i ramrite chu ka zauh dawn si a: kum khatah vawi thum LALPA i Pathian hmaa inlan tura i han kal huna chuan tumah in i ram hi an rawn ti hek lo ang.
25. Ka tan inthawina sa thisen chu chhang dawidim telh nen chuan i rawn hlan tur a ni lo; Kalhlen Kut inthawina pawh chu a tuk thlengin awmtir tur a ni hek lo.
26. i loa thlai thar hmasa ber chu LALPA i Pathian inah i rawn dah tur a ni. Kel no sa, a pui hnutetuiin i chhum tur a ni lo," a ti a.
27. Tin, LALPA'n Mosia hnenah, "Heng thute hi ziak rawh khai: he'ng ang thute hian ania, i hnenah leh Israelte hnena thu ka thlun ni,"
28. Tin, chutah chuan LALPA hneah ni sawmli leh zan sawmli a awm a; chaw reng reng a ei lo a, tui pah a in hek lo. Tin, lungphekahte chuan thuthlunna thu, thu sawm pekte chu a ziak ta a.
29. Tin, heti hia ni a, Mosia chu thu hriattirna lung phek pahnih chu a kuta kengin Sinai tlang ata chu a chhuk a, tlang ata a chhuk chuan, Mosia chuan chutia an inbiakna avang chuan a hmai vun chu a lo eng ta tih a hre hauh lo a.
30. Tin, Arona leh Israela thlah zawng zawngten Mosia an han hmun chuan, ngai teh, a hmai vun chu a lo eng a; an rawn hnaih ngam lo a.
31. Tin, Mosia'n anmahniho chu a han au a; tin, Arona leh pungkhawmho roreltu zawng zawngte chu a hnenah an lo kir leh a: tin, Mosia'n anniho hu a lo bia a.
32. Chumi hnuah chuan Israela thlahte zawng zawng chuan an rawn hnaih a: tichuan Sinai tlanga LALPA nena an inbiakna zawng zawngte chu thu pein a lo hrilh chhawng a.
33. Tin, Mosia'n anmahni chu a biak zawh chuan a hmai chu hmai khuhnain a khu ta a.
34. Amaherawhchu Mosia LALPA be tura a hmaa a luh hun apiang chuan, a lo chhuah leh hma loh chuan hmaikhuhna chu a hlip thin a; tin, a lo chhuak leh thin a, a thupekte chu Israela thlahte a hrilh chhawng thin a;Tin, Israela thlahte chuan Mosia hmai chu an han en a, Mosia hmai vun chu a lo eng thin a: tin, Mosia chu Pathian be tura a luh leh hma chuan hmaikhuhna chuan a hmai a khuh leh thin a.
35. Tin, Israela thlahte chuan Mosia hmai chu an han en a, Mosia hmai vun chu a lo eng thin a: tin, Mosia chu Pathian be tura a luh leh hma chuan hmaikhuhna chuan a hmai a khuh leh thin a.
←  Exodus (34/40)  →