←  Exodus (26/40)  →

---

1.

"Tin, biak buk, puanzar sawm neiin i siam bawk tur a ni; la zai sin tak kawp, dum pawl te, sen duk te, sen lar te hmangin cherub lemte thiam taka siam chuantirin i siam tur a ni.

2.

Puanzar chu a sei lam tawng sawm hnih leh tawng riat theuh a ni ang a, puanzar chu a hlai lam tawng li theuh a ni ang: puanzar zawng zawng chu inchen vek tur a ni.

3.

Puanzar pangate chu inzawm tur a ni a; tin, puanzar panga vekte pawh chu inzawm bawk tur a ni.

4.

Tin, puanzar zawm khat hmawrtawng ber tlangah chuan a beng a dum pawlin i siam tur a ni a, chutiang bawkin puanzar zawm lehlam hmawrtawng ber tlangah chuan i siam bawk tur a ni.

5.

Puanzar pakhatah chuan beng sawmnga i siam tur a ni a, tin, zawm khat puanzar tlangah pawh chuan beng sawmnga i siam bawk tur a ni a; chung bengte chu a inep thiah tur a ni.

6.

Tin, rangkachak chilhbehnate sawmnga i siam tur a ni a, a chilhbehnate chuan puanzarte chu i chilh bet tur a ni a: tichuan biak buk chu pindan pakhat a lo ni tur a ni.

7.

Tin, biak buk chung khuhna'n kel hmul puanzarte i siam tur a ni: puanzar sawm leh pakhat i siam tur a ni.

8.

Puanzar chu a sei lam tawng sawmthum theuh a ni tur a ni a, tin, puanzar chu a hlai lam tawng li theuh a ni tur a ni: puanzar sawm leh pakhatte chu inchen vek tur a ni.

9.

Tin, puanzar pangate chu i thui zawm vek tur a ni a, tin, puanzar paruk pawh chu thui zawm bawk tur a ni a, puan in hma lama puanzar a parukna chuan a khuh tur a ni.

10.

Tin, puanzar zawm khat tlangah chuan beng sawmnga i siam tur a ni a, tin, puanzar zawm lehlam tlangah pawh chuan beng sawmnga siam bawk tur a ni

11.

Tin, dar chilhbehna sawmnga i siam tur a ni a, tin, chu mi chilhbehna chu puan tlanga a bengah chuan vuah tur a ni a, puan in chu chilh zawm vek tur a ni; pindan pakhat a lo nih theih nan.

12.

Puan in puanzar uai thla la chuang, a zatve la chuang chu biak buk kawmcharah a uai thla tur a ni.

13.

Tin, puan in puanzar a dung lam hmawr tuak ve vea tawng khat ve ve la chuanga chu biak buk bang lehlam lehlam khuhna'n a uai thla tur a ni.

14.

Tin, berampa vun chhum senin puan in chung khuhna te, savun tha chi vunin a chunga khuh lehnate i siam tur a ni.

15.

Tin, biak buk ban rem khawm turte chu ngil taka dingin thingri thingin i siam tur a ni.

16.

Tin, ban rem khawm sei lam chu tawng sawm ni se la, tin, a vang lam chu tawng khat leh a chanve ni theuh rawh se.

17.

Ban rem khawm tinah chuan ke pahnih inzawmin a awm tur a ni: chutiang chuan biak buk ban rem khawm zawng zawng chu i siam tur a ni.

18.

Tin, biak buk atan ban rem khawm chhim chhawng chhim lampang atan chuan ban rem khawm sawmhnih i siam tur a ni.

19.

Tin, chu mi ban rem khawm sawmhnih nghahchhan atan chuan tangkaraw tlang kerkuak sawmli i siam tur a ni; a ke pahnih atan ban rem khawm pakhat nghahchhan kerkuak pahnih i siam tur a ni:

20.

tin, biak buk sir lehlam hmar chhawng lam atan ban rem khawm sawmhnih i siam tur a ni:

21.

Chung atan chuan tangkaraw tlang sawmli kerkuak nen, ban rem khawm pakhat atan nghahchhan kerkuak pahnih keh, ban rem khawm dang pakhat atan nghahchhan kerkuak pahnih i siam bawk tur a ni.

22.

Tin, biak buk kawmchar khawtlang chhawng lam atan chuan ban rem khawm paruk i siam tur a ni.

23.

Tin, biak buk kawmchar kil ve ve atan chuan ban rem khawm pahnih i siam tur a ni.

24.

Tin, a hnuai lamah chuan thlawp tur a ni, chutiang bawkin a chhip lam khang hmasa ber thlengin tih vek tur a ni: chutiang chuan a pahnih chuan tih ve ve tur a ni; chung chu a kil pahnih atan a ni tur a ni.

25.

Tin, ban rem khawm pariat, a nghahchhan tur tangkaraw tlang kerkuak sawm leh paruk nen a awm tur a ni; ban rem khawm pakhat atan nghahchhan kerkuak pahnih zel.

26.

Tin, thingri thingin bangrel, biak buk bang lehlam ban remkhawm atan panga, biak buk bang lehlam ban rem khawm atan panga,

27.

tin, biak buk kawmchar khawthlang chhawng lam ban rem khawm atan pawh panga i siam tur a ni.

28.

Tin, bangrel laita, ban rem khawm lai taka mi chuan ban rem khawm hmawrtawng ber atangin a lehlam hmawrtawng ber thlengin a thil tlang tur a ni.

29.

Tin, ban rem khawmte chu rangkachak tiin i luan tur a ni a, tin, bangrelte thil nan rangkachak khangte i siam tur a ni: tin, chung bangrelte chu rangkachak tiin i luan bawk tur a ni.

30.

Chutichuan tlanga ka entir dan ang chiah che khan biak buk chu i sa tur a ni.

31.

Tin, puanzar tur la zai sin tak kawp te, a dum pawl te, a sen duk te, a sen larte hmangin cherub lemte mi thiam tak siam chuantirin i siam tur a ni.

32.

Chu chu thingri ban pali rangkachak tia luanah chuan i zar tur a ni, a banna chu rangkachaka siam tur a ni, tin, tangkaraw tlang kerkuak palia inphun tur a ni.

33.

Tin, chu mi puanzar chu puanzar chilhbehnate hnuai lamah chuan i zar a ni a, tin, chu mi puanzar chhung lamah chuan thuthlunna bawm chu i dah lut tur a ni: tichuan puanzar chuan hmun thianghlim leh hmun thianghlim ber chu a daidansak dawn che u nia.

34.

Tin, zahngaihna thutphah chu hmun thianghlim berah thuthlunna bawm chhungah chuan i dah tur a ni.

35.

Tin, puanzar pawn lamah chuan dawhkan i hung tur a ni a, tin, biak buk chhim chhawng lam dawhkan epah chuan khawnvar dahna i hung tur a ni: tichuan dawhkan chu hmar lampangah chuan i dah tur a ni.

36.

Tin, Puan in kawngkaa zar tur la zai sin tak kawp te, a dum pawl te, a sen duk te, a sen lar te hmangin, puan zeh mawi thiam taka zeh nen i siam tur a ni.Tin, puanzar zarna tur chuan thingri ban panga i siam tur a ni a, chung chu rangkachak tiin i luan tur a ni; a bannate chu rangkachaka siam tur a ni: chung hunna atan chuan dar tlang kerkuak panga i chhung tur a ni.

37.

Tin, puanzar zarna tur chuan thingri ban panga i siam tur a ni a, chung chu rangkachak tiin i luan tur a ni; a bannate chu rangkachaka siam tur a ni: chung hunna atan chuan dar tlang kerkuak panga i chhung tur a ni.

---

←  Exodus (26/40)  →