←  Exodus (22/40)  →
1. Tin, miin sebawngpa emaw beram emaw ru se la, tin, talhin emaw lo zuar ta se la, sebawngpa pakhat aiah chuan sebawngpa panga a chawi ang a, beram pakhat aiah chuan beram pali a chawi ang.
2. Rukru, mi ina lut chu lo manin lo vawhlum ta se la,a thisen chhuah ve tur a ni lo ve.
3. Niin a rawn chhuah hnan hman erawh chuan a thisen chhuah ve tur a ni ang: (kimchang takin a pe kir leh tur a ni; pek tur a neih loh erawh chuan ruk a ruk avangin amah chu an zuar tur a ni.)
4. Rukruin a thil ruk - sebawngpa emaw, sabengtung emaw, beram emaw - a nungin lo la nei reng se la, a leh hnih a chawi tur a ni.
5. Miin lo emaw grep huan emaw lo ei zawhtir ta se la, a ran chu lo thlah se la, mi lo chu lo pehtir se la, ama lo tha ber leh, ama grep huan tha ber chuan a rul leh tur a ni.
6. Mei chhuahin hling tawmte emaw lo manin, buhphalte emaw, buh ding lai emaw, lo emaw lo kang ta vek se la, mei chhuahtu ngeia chuan a rul ngei tur a ni.
7. Miin a tangka emaw a bungrua emaw a thenawm vawntir se la, tin, chu mi in ata chu miin lo ru ta se la, rukru chu an man chuan a leh hnih a chawi tur a ni.
8. Rukru chu an man si loh chuan, chu mi in neitupa chu Pathian kiangah va kal sela, a thenawmpa bungrua chu aman a lo lak a nih leh nih loh va fiah rawh se.
9. Bawhchhiatna tawh phawt chu - sebawngpa thu-ah emaw, beram thu-ah emaw, silhfen thu-ah emaw, thil engpawh bo chungchang thu-ah reng reng - miin, hei chu ka ta a ni, lo ti ta se la, an pahniha thubuai chu Pathian hnenah thlen tur a ni; Pathianin thiam loh a chantir zawk apiang chuan a thenawmpa lakah chuan a leh hnih a chawi ang.
10. Miin sabengtung emaw, sebawngpa emaw, beram emaw, ran engpawh a thenawmpa lo enkawltir se la; tin, lo thiin emaw, lo silin emaw, suamin emaw lo awm se la, tuma'n hmu si suh se la,
11. ani chuan a thenawmpa ran chu a khawih leh khawih loh thu-ah, an pahnih karah chuan LALPA hming chhalin chhia a chham tur a ni; tichuan a neitu chuan chu chu a lo pawm ang a, ani chuan a rul lo ang.
12. Amaherawhchu ruksak ngei a nih chuan a neitu chu a rul tur a ni.
13. Sain seh se la, a them chu hriattirna'n rawn keng rawh se; chu mi sa seh ai chu a rul tur a ni lo.
14. Miin a thenawmpa ran lo hawhsak se la, lo silin emaw lo thi emaw ta se la, tin, a neitupa chu awm lo se la, a rul ngei tur a ni.
15. A neitupa chu a awm ve reng erawh chuan a rul tur a ni lo: man neia hawh a nih erawh chuan an inhawh dan dana thu a ni ang.
16. Miin nula, nupuia la hual loh chu lo thlemin lo mutpui se la, a man pein a nupui atan a nei ngei tur a ni.
17. A pain a neihtir phal lul loh chuan nula man zah sum chu a pe reng reng tur a ni.
18. Dawithiamnu reng reng i zuah tur a ni lo.
19. Tupawh ran mutpui apiang chu tihhlum ngei tur a ni.
20. Tupawh LALPA hnenah chauh tih loh, pathian dang reng reng hnena inthawi chu tihboral hlauh tur a ni.
21. Hnam dang i sawisa tur a ni lo a, i hnehchhiah tur a ni hek lo: nangni pawh Aigupta ramah khan hnam dang in nih kha.
22. Hmeithai emaw fahrah emaw in tirethei tur a ni lo.
23. Anmahni chu in tiretheih vaih a, mi rawn auh phawt chuan, an mi auhna aw chu ka lo ngaithla ngei ang a;
24. tichuan ka thinur chu a ling phut mai ang a, khandaihin ka rawn tihlum ang che u a; tin, in nupuite chu hmeithai an ni ang a, in fate pawh fahrahin an awm mai ang.
25. Ka miteho zinga mi in hnena awm retheite tangka i puktir chuan i leibatu angah i ngai tur a ni lo a; a lakah a pung i phut tur a ni hek lo.
26. I thenawm silhfen chu lo hrensak ta ang la, ni tlak hmain i pe leh tur a ni:
27. inthuam nana a neih chhun a ni a, a taksa tihlum nana a puan a ni si a: eng sinin nge a mut ang? Tin, heti hi a ni ang a, mi rawn auh chuan ka lo ngaithla ngei ang a; kei zawng mi khawngaih thei tak ka ni si a.
28. Pathian chu i hau tur a ni lo a, i mite zinga roreltute chu anchhia i lawh tur a ni hek lo.
29. I thlai thar hmasa ber leh i uain tui tla hmasa ber chu i hlan var tur a ni. I fapa upa ber chu mi pe tur a ni.
30. Chutiang bawkin i sebawngpate leh i beramte pawh chu i ti tur a ni: ni sarih chu a pui hnenah a awm ang a, a ni riat ni chuan mi pe tur a ni.Tin, ka tan mi thianghlim in ni tur a ni: chuvangin rama sa seh reng rengte chu in ei tur a ni lo a; ui hnenah in teh mai tur a ni.
31. Tin, ka tan mi thianghlim in ni tur a ni: chuvangin rama sa seh reng rengte chu in ei tur a ni lo a; ui hnenah in teh mai tur a ni.
←  Exodus (22/40)  →