←  Exodus (2/40)  →
1. Tin, mi pakhat, Levia chhungte zinga mi a va chhuak a, Levia fanu nupuiah a va nei a.
2. Tin, hmeichhia chu a rai a, tin, fapa a hring a: tin ani chuan naute chu hmel tha a ti em a, thla thum a thukru a.
3. Tin, a lo thukru reng thei ta lo a, a tan luang lawng a la a, chu chu chirh leh alkatra-in a char a, tin, naute chu chutah chuan a muttir a, tichuan lui kama phairuang zingah chuan a dah ta a.
4. Tin, a chungah eng tak la thleng ang maw tia hriat tumin a farnu chu hla feah a ding a.
5. Tin, Pharaoa fanu chu luia inbual turin a zu kal a; tin, a bawihnute chu lui kamah chuan an kal ve a; tin, phairuang zinga bawm a han hmuh chuan a bawihnu a va laktir a.
6. Tin, a han hawn chuan naute chu a hmu ta a: tin, ngai teh, nausen chu a tap ta a. Tin, a khawngaih ta em em a, "Hei Hebrai fa a nih hi le," a ti a.
7. Tichuan a farnu chuan Pharaoa fanu hnenah chuan, "He naute awmsaktu tur che Hebrai hmeichhia nau awmtu ka kohsak ang che chu?" a ti a.
8. Tin, Pharaoa fanu chuan a hnenah, "Kal rawh," a ti a. Tin, nula chu a kal a, chu nausen nu chu a ko ta a.
9. Tin, Pharaoa fanu chuan a hnenah, "He naute hi kalpui ta la, mi awmsak ang che, tichuan i hlawh ka pe ang che," a ti a. Chutichuan hmeichhia chuan naute chu a la a, a pawm ta a.
10. Tin, naute chu a lo thang lian a, Pharaoa fanu hnenah a hruai a, tichuan a fapaah a awm ta a. Tin, "Tui ata ka lak chhuah avangin," a ti a, a hmingah chuan Mosia a sa a.
11. Tin, heti hi a ni a, chung laia Mosia a lo puitlin chuan, a unaute a va kan a, an phurritte chu a va hmu a: tin, Aigupta mi pakhat hian a unau pakhat Hebrai mi hi a vaw lai a han hmu a.
12. Tin, Mosia chu a hawi vel ruai a, tin, tumah an awm lo tih a hriat veleh, Aigupta mi chu a vawhlum a, leiah a phum ta a.
13. Tin, atukah a va chhuak leh a, tin, ngai teh, Hebrai mi pahnih an lo insual a: tin, a thiam lo zawka hnenah chuan, "Engati nge i thian i vuak le?" a ti a.
14. Tin, ani chuan, "Kan chungah hotuah leh roreltuah tuin nge siam che? Aigupta mi i tihhlum ang khan mi tihhlum i tum elo?" a ti a. Tin, Mosia chuan a hlau ta a, "An hre ta ngei zuk nia le" a ti a.
15. Tichuan Pharaoan chu chu a lo hriat veleh, Mosia chu thah a tum ta a. Nimahsela Mosia chu Pharaoa hnen ata a tlan bo a, Midian ramah a awm ta a: tin, tuichhunchhuah sirah hian a thu a.
16. Tin, Midian rama puithiam chuan fanu pasarih a nei a: tin, anni chuan tui an rawn chawi a, an pa beram rual in turin tui inna thlengte chu an tikhat a.
17. Tin, beram vengtute an lo kal a, an rawn hnawt darh a: nimahsela Mosia chu a tho a, anmahni chu a rawn tanpui a, an beram rual chu tui a intir ta a.
18. Tin, an pa Reuela hnen an va thlenin ani chuan, "Engtizia nge vawiin chu in va lo haw hma ve le?" a ti a.
19. Tin, anni chuan, "Aigupta mi pakhatin beram vengtute lak ata min chhanhim a ni, tin, chu chang ni loin, tui te min thalsak a, beram rual tui a intir a ni," an ti a.
20. Tin, ani chuan a fanute hnenah chuan, "Chu, khawiah nge a awm le? Eng tizia nge in rawn hawnsan mai ni le? Va ko ta che u, chaw te rawn ei ang hmiang," a ti a.
21. Tin, Mosia chuan chu mi hnena awm chu rem a ti a: tin, a fanu Zipori chu Mosia a pe a.
22. Tin, fapa a hring a, tin, Mosia'n a hmingah Gersoma a sa a; "Mi rama pem ka nih avangin," a ti a ni.
23. Tin, heti hi a ni a, ni rei fe chinah chuan Aigupta lal chu a thi ta a: tin, Israela thlahte chu an hnathawh hautak avang chuan an rum a, tin, an au a, tichuan an hnathawh hautak avanga an au thawm chu Pathian hnena a han thleng ta a.
24. Tin, Pathianin an rum chu a hria a, tin, Pathianin Abrahama te, Isaaka te leh Jakoba te hnena a thuthlun kha a hre reng a.Tin, Pathian chuan Israela thlahte chu a thlir reng a, tichuan Pathian chuan anmahni chu a zuk ngaihsak reng bawk a.
25. Tin, Pathian chuan Israela thlahte chu a thlir reng a, tichuan Pathian chuan anmahni chu a zuk ngaihsak reng bawk a.
←  Exodus (2/40)  →