←  Esther (8/10)  →
1. Chu mi ni chuan Judate hmelma Hamana in chu lal Ahasuera chuan lalnu Estheri a pe a. Tin, Mordekaia chu lal hmaah a lo kal a; Estheri chuan a eng nge a nih a lo hrilh tawh a.
2. Tin, lal chuan Hamana a laksak, a zungbun chu a phawi a, Mordekaia a pe a. Tin, Estheri chuan Mordekaia chu Hamana in chhung hotuah a siam a.
3. Tin, Estheri chuan lal hmaah chuan thu a sawi leh a, a ke bulah abawk a, mittui tla chungin Agag mi aman thil tha lo tih tum Judate chunga a remruat chu tihbo a dil a.
4. Tin, lal chuan rangkachak tiang chu Estheri lamah chuan a han lek phei a. Chutichuan Estheri chu a tho a, lal hmaah chuan a ding a,
5. "Lal tha tihzawng a nih a, a mittlung ka nih a, lal ngaiha a dik a, a lawmzawng ka nih chuan Agag mi Hamedatha fapa Hamana remruat lehkha, lal ram then zawng zawnga mi Judate tihboral vek tur tih a ziak chu tih leh loh turin ziak ni se la;
6. engtin nge ka chipuite chunga thil tha lo, lo thleng han hmuh chu ka tuar zawh ang? Engtin nge ka laichinte boral han hmuh chu ka tuar zawh ang?" a ti a.
7. Chutichuan lal Ahasuera chuan lalnu Estheri leh Juda mi Mordekaia hnenah chuan, "Ngai teh u, Judate chunga a kut a thlak avangin Hamana in chu Estheri ka pe e, amah pawh chu an awhhlumtir ta a.
8. Tin, Judate hnenah i duh ang takin lal hminga thawn tur lehkha ziak bawk la, lal zungbuna nemin char rawh; lal hminga ziak leh lal zungbuna nem leh char chu tuma'n an tidanglam thei lo a ni," a ti a.
9. Chutichuan lal lehkha ziaktute chu chu mi lai la la, thla thumna, Sivan thla ni sawmhnih leh ni thum niin an ko a, Mordekaia thupek ang chuan Judate hnenah te, hotute hnenah te, India atanga Ethiopia thlenga ram then hrang za leh sawmhnih leh pasariha ram awptute leh puipate hnena thawn turin lehkha an ziak a, ram then tinah chuan anmahni lehkha theuhin, hnam tin anmahni tawng theuhin, Judate hnenah pawh an lehkha leh an tawngin an thawn a.
10. Lal Ahasuera hmingin a ziak a, lal zungbunin an nem a, lehkha chu sakawr an phurhtir a, ama vulh thiau, lal tana chhawr thin sabengtung chak mi chunga chuangin an tlanpui a.
11. Tin, chu mi lehkhaah chuan lal chuan Judahote khaw tina awmte chu inpunkhawma lo inveng him turin a ti a. Khawi rama mi pawh anmahni bei tura lo thawk tawh phawt chu, lo beileta an fanaute leh an hmeichhiate pawh rawk turin a phalsak a.
12. Lal Ahasuera ram then zawng zawng chhungah; chu thupek chu thla sawm leh thla hnihna, Adar thla ni sawm leh ni thum ni, Juda zawng zawng thah vek tura ruat niah chuan hman tur a ni.
13. Tin, chu mi lehkhaa thupek chu, chu mi nia an hmelmate chunga phuba an lak theihna tura Judate chu inpeih diama an lo awm theihna'n ram then zawng zawngaa thawn chhuah a, mi zawng zawng hnena puan tur, tih a ni.
14. Chutichuan hmanhmawh takin lal thupekin lal tana chhawr thin sabengtung chak mi chunga chuang lehkha tlanpuitute chu an chhuak a; tin, thupek chu lal khawpui Susan-a puan chhuah a ni.
15. Tin, Mordekaia chu lal puan, a dumpawl leh a var inbelin, rangkachak lallukhum ropui tak leh puan zai sin kawrfual senduk inbelin lal in ata chu a chhuak a; Susan khua chu an au dur dur a, an lawm em em a.
16. Juda-ho chuan eng te, lawmna te, hlimna te, chawimawina te an nei a.Lal thupek leh lal thu tihtluk thlenna ram then leh khua apiangah chuan lawmna leh hlimna an nei a, ruaite an theh a, awm nite an kham a. Tin, chung rama mite zinga tam tak chu Juda-ah an insiam a; Judate chu an lo hlau ta a.
17. Lal thupek leh lal thu tihtluk thlenna ram then leh khua apiangah chuan lawmna leh hlimna an nei a, ruaite an theh a, awm nite an kham a. Tin, chung rama mite zinga tam tak chu Juda-ah an insiam a; Judate chu an lo hlau ta a.
←  Esther (8/10)  →