←  Esther (2/10)  →
1. Chung thil hnua lal Ahasuera thinrim chu a la daih hnu chuan Vasti leh a thiltih leh a chungchanga thupek chu a hre chhuak a.
2. Chutichuan lal chhiahhlawh, a rawngbawltute chuan a hnenah, "Lal tan nula hmel tha zawn ni se la;
3. lal pindan enkawltu Hegaia, hmeichhe enkawltu hnuaiah, Susana lal hmeichhe dah khawmna inah nula hmel tha zawng zawng ko khawm turin lalin a ram chhunga ram then zawng zawngah hotu ruat se la; tin, an intihthianghlimna turte pek ni theuh sela;
4. lal tilawmtu ber nula chu Vasti aiah lalnu ni se la, " an ti a. Tichuan chu chuan lal chu a tilawm a, chutiang chuan a ti ta a.
5. Lal khawpui Susan-ah chuan Juda mi, mi pakhat a awm a, a hming chu Mordekaia a ni a, Benjamin mi Kisa fa Simeia fapa Jaira fapa a ni;
6. Babulon lal Nebukadnezaran Juda lal Jekonia sala a hruai laia Jerusalem atanga hruai a ni.
7. A pami fanu, Hadasi, Estheri an tih chu a enkawl seilian a; pa a nei lo a, nu a nei bawk si lo a, nula chu a nalhin a hmel a tha hle mai a; anu leh a pa an thih hnu khan Mordekaia chuan a fanu a tan a awmpui ta a ni.
8. Chutichuan lal thupek leh lal thurat chu an lo hriat a, nula tam tak, lal khawpui Susan-a Hegaia vennaah an kal khawm chiam lai chuan, heti hi a ni a, Estheri chu lal inah hmeichhe vengtu Hegaia vennaah chuan an hruai lut a.
9. Tin, nula chuan a tilawm a, a duhsakna a chang a, lal in ata a chanvo leh a intihthianghlimna tur chu a pe thuai mai a, nula pasarih pek awm deuh deuhte nen; amah leh a nulatpuite chu hmeichhe awmna hmun tha berah a hruai ta a.
10. Estheri chuan eng chi nge a nih leh tute nge a laichinte a hriattir hauh lo a; Mordekaia chuan hriattir lo turin thu a pe tlat a ni.
11. Estheri chuan eng nge a tih thin a, engtin nge a awm tih hre turin Mordekaia chu ni tin, hmeichhe awmna, kawt hung chhungah chuan a kal thin a.
12. Tin, thla sawm leh thla hnih hmeichhe tana dan anga an chungchanga thiltih hnua lal Ahasuera hnena nulaho an kal hun a lo thlen chuan (chutiangah chuan an intihthianghlim hun a kim tawh thin a, hetiang hian an ti thin a ni, thla ruk chhung mura hriakin an zut a, thla ruk dang leh chhung rimtui leh hriak dangin an zut leh a),
13. hetiang hian an kal thin a, lal ina luhpui turin hmeichhe awmna ata an duh apiang an pe thin a ni.
14. Tlai lamah an kal a, atukah, hmei vengtu, lal pindan vengtu Saasgaza ven hmeichhe awmna pahnihnaah an let leh thin a; lalin a duh a, an hming lama a kohte chauh lo chu lal hnenah an kal leh tawh thin lo.
15. Chutichuan Mordekaia pami Abihaila fanu, a fanu atana a awmpui Estheri chu lal hnena a kal hun a thlen chuan, hmeichhe vengtu, lal pindan vengtu Hegaia ruat chauh lo chu engmah a duh lo a. Estheri chu a hmu apiangte duhzawng mi nih a kai a.
16. Chutichuan Estheri chu lal Ahasuera lal inah thla sawmna, Tebet thlaah kum sarih a lal kumah an hruai lut a.
17. Lal chuan hmeichhe dang zawng zawng aiin a hmangaih a, nula dang zawng zawng aiin khawngaihna leh duhsakna a hlawh a; tichuan lallukhum a khumtir a, Vasti aiah lalnuah a siam ta a.
18. Chutichuan Estheri hmingin lal chuan a mi liante leh a mite tan ruai ropui tak a theh a; a rama mite tan awm ni a khamsak a, lal tih awm rengin phal takin thilte a sem a.
19. Tin, nulaho an inkhawm leh lai chuan Mordekaia chu lal kawt hung kawngkaah a thu a.
20. Mordekaia thupek avangin Estheri chuan tute nge a laichinte leh eng chi nge a nih a la hriattir lo fo a; Estheri chuan Modekaia thu chu a awmpui laia a zawm thin ang khan a la zawm reng a ni.
21. Tin, lal kawt hung kawngkaa Mordekaia a thut lai chuan lal pindan vengtu zinga mi pahnih Bigthana leh Teresa, kawngka veng thintute chu an lo thinur a, lal Ahasuera chungah kutthlakna remchang an zawng a.
22. Chu thil chu Mordekaian a lo hria a, lal nu Estheri chu a hrilh a, tin, Estheri chuan Mordekaia hmingin lal a hrilh a.Tin, chu mi thu chu an dap vel a, chutiang chu a lo ni ngei tih an hriat chhuah chuan an awhhlumtir ve ve a; chu chu la kawl, lal chanchin ziakna buah an ziak a.
23. Tin, chu mi thu chu an dap vel a, chutiang chu a lo ni ngei tih an hriat chhuah chuan an awhhlumtir ve ve a; chu chu la kawl, lal chanchin ziakna buah an ziak a.
←  Esther (2/10)  →