←  Deuteronomy (32/34)  →
1. "Beng lo chhi ru vante u, ka hril dawn e; Ka tawngkam chhuak leilungin ngai se:
2. Ruahtui angin ka thu chu a sur ang, Dai angin ka thusawi chu a far ang; Hlobet no dep chunga ruah ang leh Hnim hnah chunga ruah angin
3. LALPA hming chu ka puang dawn e: Ropuina kan Pathian pe r'u.
4. Lungpuia chu, a thiltih a fel famkim; A awm dan zawng zawng chu dan a ni: Pathian rinawm, khawlohna nei lo, Fel leh tha a ni.
5. Tha lo takin a chungah an ti a, a fate an ni lo, an sawisel kaina a ni, Chhuan bengtlalo leh tihmawh an ni.
6. Aw mi a leh fing lote u, Chutin maw, LALPA chu in thungrulh dawn? A hringtu che, I pa a ni lo'm ni? A siam chia, a din nghet che.
7. Hmasang nite chu hre reng la, Chhuan tam tak kumte chu ngaihtuah teh: I pa zawt la, a kawhhmuh ang che; I upate pawh, an hrilh ang che.
8. Chungnungberan hnamte ram a pek laia, Mihring fate a then lai khan Hnamte ramri a kham a, Israela thlahte zatin.
9. LALPA chanvo chu a mite an ni a; Jakob-ho chu a rochan an ni.
10. Thlaler ramah a chhar a, Thlaler ruak rum vung vungah; A vela awm chilhin a enkawl a, A mit naute angin a vawng:
11. Mupuiin a bua no a chawk tho a, A no chunga thla a zap a, A thlate a zar a, a la a, A thlaa a chawi thin angin:
12. LALPA chauhin a hruai thin a, Ram dang pathian ni loin.
13. Lei hmun sangah te a chuantir a. Lova thil hawng a eitir thin a; Lungpui ata khawizu a dawttir thin a, Lung chang ata hriak nen;
14. Bawng hnute khal, beram hnute, Beram no thaute nen, Basan ram berampa leh kelte, Buh kal thaute nen: Grep thisen uain I in a.
15. Mahse Jesurun-ho an lo thau a, an inchhek a; I lo thau a, I lo chum a, I lo maih ta a; A siamtu Pathian a hawisa ta, A chhandamna Lungpui chu a ngainep.
16. Ram dang pathiantein a thikthu a chawk tho a, Thil tenawmin a chawk thinrim.
17. Pathian ni lo, ramhuaite hnenah an inthawi a, An hriat ngai loh pathiante hnenah, Pathian tharte tlai khawhnua lo awm, In pi, in pute hlauh ngai loh hnenan.
18. A hringtu che Lungpui I ngaisang lo, A siamtu che Pathian I theihnghilh bawk.
19. Chu chu LALPA'n a hmu a, a hua, A fanu leh fapate tihthinur vangin.
20. Ka bikbosan ang a, Engtin nge an awm dawn tehreng,' a ti: Chhuan bengtlalo an ni, Rin kai lo fanute.
21. Pathian ni lo thilin ka thikthu an chawk tho a; An thil lawi loin mi tithinur a; Chia sawi lohtein ka thiktir ang a, Hnam a tein ka tithinrim ang.
22. Ka thinur a alh a, Seol mawng kil lam a kang, Leilung, a thil hawng chawpin a kang zo, Tlang nghahchhante a kang.
23. An chungah chhiatna ka tiang khawm ang a, An chungah thal ka thlah ang;
24. Riltamin an rawp ang a, meipui leh chhiatna namen loin a kangral ang, An chungah ramsa hate ka tir ang a, Vaivuta tleng mite tur nen.
25. Pawn lamah khandaihin an thi ang a, Chhung lamah thlabarin, Nula tlangval, hnute hne lai, Lua kelsam tote nen lam.
26. An hmelmate chuan ngaisualin, 'Kan kut chu chawisanin a awm ta, Heng zawng zawng hi LALPA tih a ni tawp lo,' hmelma thinrim chuan an ti ang tih hlauthawng lo i la chuan,
27. 'Ka tidarh vek ang a, Mihring zinga anmahni hriat rengna ka tibo teh daih ang,' ka ti mai tur.
28. Finna nei lo hnam an ni a, Anmahniah hriat thiamna a awm lo.
29. Aw, fing se la chuan he'ng hi an hre thiam ang a, An tun hnu lam thu an ngaihtuah tur!
30. Engtin nge pakhatin sang a um ang a, Pahnihin sing an tlan chhiattir ang,
31. An lungpuiin a hralh a, LALPA'n a hlan a nih si loh chuan? An lungpui chu kan lungpui ang a ni si lo, Kan hmelmate ngei ngaih dan pawhin,
32. An grep hrui chu Sodom grep hrui, Gomora rama mi a ni: A grepte chu mit grep a ni, A bawrte chu a kha
33. An uainte chu drakon tur leh Rulrial tur tha tak a ni.
34. Chu chu ka khawl khawm Ka robawma char chiah a ni lo'm ni?
35. Phuba lak leh thungrulh chu keima tih tur a ni, An rahbi a tleu hunin; An chhiatna ni chu a lo hnai ta, An chunga thil lo thleng turte chu a lo thleng thuai ang.
36. LALPA chuan a mite ro a rel dawn a, A chhiahhlawhte pawh a tihsak ang, A thiltihtheihna a bo a, Khuahkhirh leh khirh loh tumah reng awm loa a hmuh hun chuan.
37. 'Khawiah nge an pathian, An rin lungpui,
38. An inthawina thau eitu, An in tur thilhlan uain intute chu? Lo thoin rawn pui che u se la, Nangmahni humtu ni rawh se.
39. Kei, keimah ngei ka nih hi hria u la, Pathian dang an awm lo e; Ka tihlum thin a, ka tinung bawk thin; Ka hliam thin a, ka tidam bawk thin; Ka kut ata mi chhuhsak thei reng reng an awm lo.
40. Van lamah ka kut ka phar a, Ka nunna chhalin ka sawi e,
41. Ka khandaih tle ka tahhriam a, Ka kutin rorelna a vawn chuan Ka hmelmate chungah phuba ka la ang a, Mi hawtute chu ka thungrul ang.
42. Ka thalte chu thisenin ka tirui ang a, Ka khandaihin tisa a lem ang; Thahte leh salte thisen nen Hmelma hotute lu atangin, ka ti,' a ti ang.
43. Aw, nangni hnam tin, te u, a mite nen lawm rawh u; A chhiahhlawhte thisen phuba chu a la dawn a ni; Amah dotute chungah phuba a la dawn, A ram leh a mite tan inremna famkim a siam ang."
44. Tin, mipuite benghriatah chung hla thu zawng zawng chu Mosia'n a va sawi a, amah nen Nuna fapa Hosea nen.
45. Tin, Mosia'n chungtu zawng zawng chu Israel mi zawng zawngte nena a sawi zawh chuan,
46. an hnenah, "Tuna in hnena ka thu hriattir che u ah hian in thinlung nghat u la, he'ng dan thu zawng zawngte hi fimkhur taka zawm turin in fate thu pe rawh u.
47. In tan thil engmah lo mai mai ani lo a, in nunna a ni si ; tin, he'ng thil ti hian luah tura Jordan in va kan ramah chuan in dam rei dawn a ni," a ti a.
48. Tin, chu mi ni vek chuan LALPA'n Mosia a bia a,
49. "Moab rama Jeriko zawna Abarim tlangdunga Nebo tlangah chuan han chho la, Israela thlahte luah tura ka pek Kanaan ram chu han thlir rawh;
50. tichuan i unaupa Arona Hor tlanga a thi a, a chite hnena hruai ani ta ang bawk khan i lawn chhohna tlangah chuan i thi ang a, i chite hnena hruai i ni ang;
51. Zin thlalera Kades-a Meriba tuia Israela thlahte zinga ka chunga in sual avang leh Israela thlahte zinga mi chawimawi loh avang khan.Ram chu i han hmu ang a; nimahsela Israela thlahte ka pek ramah chuan i lut lo vang," tiin.
52. Ram chu i han hmu ang a; nimahsela Israela thlahte ka pek ramah chuan i lut lo vang," tiin.
←  Deuteronomy (32/34)  →