←  Deuteronomy (31/34)  →
1. Tin, Mosia'n Israel mi zawng zawng hnenah he'ng thu hi a va sawi a.
2. An hnenah, "Tunah chuan kum za leh sawmhnih ka lo ni ta a; ka chhuakvak thei tawh lo a; tin, LALPA'n, 'He Jordan lui hi I kan lo ang,' mi ti a.
3. LALPA in Pathian chuan in hma a hruai ang a; he'ng hnamte hi a tihbo sak ang che u a, an ram chu in luah ang; tin, LALPA'n a lo sawi tawh angin Josua'n in hma a hruai ang.
4. Tin, LALPA'n Amor-ho lal te, Sihona leh Oga leh an ram chunga a tih ang khan an chungah a ti ang; anni chu a tiboral a nih kha.
5. LALPA'n anni chu a hlan ang che u a, thu ka pek che u thupek ang zawng zawng khan an chungah in ti tur a ni.
6. Chhel tak leh huai takin awm u la, tih suh u la, anni chu hlau hek suh u; in hnena kala chu LALPA in Pathian a ni si a; a tithlawn lo ang che u a, kal pawh a kalsan tawp lo ang che u," a ti a.
7. Tin, Mosia'n Josua chu a ko a, Israel mite zawng zawng mithmuhah a hnenah, "Chak tak leh huai takin awm rawh, he'ng mite hnenah hian an pi leh pute LALPA'n chhechhama pek a lo tiam tawh ramah chuan I kal tur ani a, anniho hi I luahtir tur a ni.
8. Tin, i hmahruaitu chu LALPA ani ang a, I hnenah a awm zel ang a, a tithlawn lo vang chia, kal pawh a kalsan tawp lo ang che; hlau suh la, zam hek suh," a ti a.
9. Tin, Mosia chuan chu dan chu a ziak a, LALPA thuthlung bawm zawntu Levia fapa puithiamte leh Israel upateho zawng zawng chu a pe a.
10. Tichuan Mosia'n, "Kum sarih kum, ngaihdam kum apianga bawkte kutah,
11. hmun a la ruat tura Israel mi zawng zawng LALPA in Pathian hmaa an rawn inlan hunah he dan hi Israel mi zawng zawng hriatah in chhiar tur a ni.
12. Mipuiho a hmei apa, in fanau te te te, in awmpui ram dang mi te, anni chuan an ngaihthlak a, an zir a, LALPA in Pathian chu an tih a, he dan thu zawng zawng hi fimkhur taka an zawm theihna'n leh
13. an fate la hre ve lote pawhin an hriat a, Jordan lui kana in va luah tur rama in awm chhung zawng zawnga LALPA in Pathian tih an zir theihna'n ko khawm rawh u," tiin thu a pe a.
14. Tin, LALPA'n Mosia hnenah, "Ngai teh, I thih hun a lo hnai ta a; Josua chu ko la, inbiakna puan inah chuan va inlan rawh u, thu ke pe dawn e," a ti a. Tin, Mosia leh Josua chu an kal a, inbiakna puan inah chuan an va inlan a.
15. Tin, LALPA chu Puan Inah chuan chhumdingin a inlar a; tin, chhumding chu Puan In kawngka lu chungah chuan a ding a.
16. Tin, LALPA'n Mosia hnenah, "Ngai teh, i pi leh pute hnenah i muhil dawn ta a, he'ng mite hi an tho ang a, an va awmna turte zingah chu ram pathiante lakah chuan an uire ang a, mi hawisan ang a, ka thuthlung an hnena ka thlun chu an bawhchhia ang.
17. Chutichuan, chu mi hun chuan an chungah ka thin a thawk ang a, ka hawisan ang a, ka bikbosan ang a, an ral ang a, thil tha lo leh manganna tam tak an chungah a thleng ang a; chutichuan chu mi ni chuan, 'Kan Pathian kan zinga a awm loh avangin he'ng thil tha lo hi kan chungan a lo thleng a ni lo'm ni?' an ti ang a.
18. Pathian dangte lam hawia thil tha lo an la tih tur zawng zawng avang chuan an lakah chu mi hun chuan ka inthup ngei ngei dawn a ni.
19. Chuvangin hetiang hla hi in tan phuah la, Israela thlahte zirtir rawh; Israela thlahte chungchang thu-ah he hla hi mi hriatpuitu a nih theihna'n vawntir rawh.
20. An pi leh pute hnena chhechhama ka tiam, hnutetui leh khawizua luang ramah chuan ka hruai a, ei leh bara an awm a, an tlai a, an lo thau hun meuh chuan pathian dangte lam an hawi ang a, an rawngte an bawl ang a, mi hmusit ang a, ka thuthlungte an bawhchhe dawn ani.
21. Tin, heti hi ani ang a, thil tha lo leh manganna tam tak an chunga a lo thlen hunin he hla hi a hriatchauhtirtu a ni ang; an thlahte ka atangin theihhnghilh theih a ni dawn si lo a; tunah ka chhechham rama ka hruai hma reng pawhin an suangtuah vel dan chu ka hre sa tawh reng ani," a ti a.
22. Chutichuan Mosia'n chu hla chu, chu mi ni la la chuan a phuah a, Israela thlahte a zirtir a.
23. Tin, Nuna fapa Josua chu a fuih a, "Chhel tak leh huai takin awm rawh khai; Israela thlahte chu an hnena chhechhama ka tiam ramah chuan I hruai lut dawn a ni; tin, I hnenah ka awm zel ang," a ti a.
24. Tin, heti hi a ni a Mosia'n he dan thute hi lehkhabua a ziak zawha peih diam a nih hnuin,
25. thuthlung bawm zawntu Levi-hote chu Mosia'n,
26. "He dan bu hi la u la, in chungchang thua hretu atan LALPA in Pathian thuthlung bawm sirah dah rawh u.
27. Hel in chinzia leh in luhlulzia te ka hria a ni; ngai teh u, tuna ka la dampui lai che u mahin LALPA chungah in hel thin a; ka thih hnu lek phei chuan engti takin nasa ang maw!
28. An benghriata he'ng thu hi ka sawi a, an chungchang thua hretua lei leh van ka koh theihna'n in hnam puipa zawng zawng te, in hotute min koh khawmsak rawh u.
29. Ka thih hnu chuan nasa takin in intichhia ang a, ka thupek che u kawng ata hi in peng ang tih ka hre reng a ni; tin, a tawpah phei chuan thil tha loin a tlakbuak ang che u; in kut thiltiha tithinur tura LALPA mithmuha thil tha lo in tih dawn avangin," tin thu a pe a.Tichuan Mosia'n, Israel pungkhawmho zawng zawng benghriatah chuan he hla thu hi a tawp thlengin a sawi vek a.
30. Tichuan Mosia'n, Israel pungkhawmho zawng zawng benghriatah chuan he hla thu hi a tawp thlengin a sawi vek a.
←  Deuteronomy (31/34)  →