←  Deuteronomy (29/34)  →
1. Horeb tlanga an hnena thu a thlun tiam lo a, LALPA'n Moab rama Israela thlahte hnena mosia thu a thluntir, a thuthlung thute chu he'ng hi a ni.
2. Tichuan Mosia'n Israel mi zawng zawng chu a ko a, an hnenah, "Aigupta rama Pharaoa chungah te, a mite zawng zawng chungah te, a ram zawng zawng chungah te in mithmuh ngeia LALPA'n thil a tih zawng zawngte kha in hmu a;
3. fiahna nasa tak te, chhinchhiahna te, thil mak te in mit ngeia in hmuh kha:
4. nimahsela LALPA'n vawiin thleng hian hriat thiamna thinlung te, hmuh theihna mit te, hriat theihna bengte a la pe lo che u a ni.
5. Thlalerah kum sawmli ka hruai ta che u a; in silhfente chu in sin chul lo a, in pheikhawk bunte chu in bun chul lo bawk a.
6. Kei hi LALPA in Pathian ka ni tih in hriat theihna'n chhang in ei lo a, uain pawh, zupui pawh in in lo a.
7. Tin, he hmun in lo thlen hian Hesbon lal Sihona leh Basan lal Oga chu min do turin an lo thawk a, anni chu kan lo hneh a;
8. tin, an ram chu kan la a, Reuben-ho te, Gad-ho te, Manase hnam zatve te luah atan kan pe a.
9. Chutichuan in thiltih zawng zawnga in hmuingil zel theihna'n he thuthlung thute hi pawm u la, zawm rawh u.
10. Tunah hian in zain hnam puipa te,
11. in upa te, in hotute Israel mi zawng zawng, in fanau tete te, in nupui te, in awmpui ram dang mi, in thing kittu leh in tui chawitute chenin LALPA hmaah in ding a ni.
12. LALPA in Pathianin in pawm tura thuthlung a siamah hian vawiinah in lut dawn ta a;
13. in thlahtu Abrahama te, Isaaka te, Jakoba te hnenah leh in hnena a lo tiam tawh anga in pathian a nih theihna'n, ama mi atan a tinghet che u a ni.
14. He chhechham leh thuthlung thu hi in hnenah chauh thlung ka ni lo a,
15. vawiina LALPA kan Pathian hmaa dingte leh tuna kan hnena awm ve lote hnenah pawh hian a ni;
16. (Aigupta rama kan awm dan te, hnam dangte tawn tlanga in kal tlang dan te in hria a;
17. an zinga an thil tenawm te leh an milem, thing leh lung te, tangkarua leh rangkachakte in hmu bawk a.)
18. Chutilochuan in zinga mipa emaw, hmeichhia emaw, chhungkua emaw, hnam emaw, chung hnam pathiante be tur chuan an thinlungin tunah hian LALPA kan Pathian chu hawisanin, in zingah thil kha leh sai chawr chhuahna bulte in lo awm dah ang e;
19. tin, chuti a nih zawngin he chhechham thu hi hre reng si a, luhlul taka duh ang agna a awm pawha a tan engmah pawi lo tur anga mahni inthlamuan chawp chu,
20. chutiang mi chu LALPA'n a ngaidam dawn hauh lo a, LALPA thinurna leh athikna chuan chu mi chu a ur ang a, he lehkhabua anchhe chuang zawng zawng hi a chungah a awm ang a, LALPA'n van hnuai ata a hming chu a thai bo zawk ang.
21. He dan bua chuang anchhe thuthlung zawng zawng ang hian Israel hnam zawng zawng zing ata tihrangin thil tha lo lamah LALPA'n a teltir ang.
22. Tin, thangthar lo la awm tur, in hnua in fate lo la awm tur leh, ram dang mi hla tak atanga lo kal turte chuan, chu mi rama hri leh LALPA'n natna a veitir te,
23. a ram pum pui chu kat leh chi leh kanghlum, engmah chin lohna, engmah chawr lohna, hlobette pawh chawr lohna, Sodom leh Gomora leh Adma leh Zeboiim tihchhiat, LALPA thinur leh thinrima a tihchhiat anga chhia a nih an hmuh hun chuan
24. hnam tinin, 'Engvangin nge he ram hi hetianga LALPA'n a tih? He thinur ling nasa tak hi engtizia nge ni?' an ti ang.
25. Chutichuan miin, 'Aigupta ram ata a hruai chhuah laia a thuthlun, LALPA an pi leh pute pathian thuthlung chu an hawisan a,
26. pathian dang, an hriat ngai loh pathian te, anin a ruatsak ni lote rawng an bawl a, an biak vang a ni;
27. chuvang chuan he lehkhabua chuang anchhia zawng zawng thlentir turin he ram chungah hian LALPA thin a thawk a ni;
28. tin, thinrim leh thinur leh thinrim tak maiin an ram ata a pawt chhuak vek a, ram dangah a theh lut a ni, tuna an awm dan ang hi,' an ti ang.Thil inthupte chu LALPA kan Pathian ta a ni a, thil tihlante erawh chu he dan thu zawng zawng hi kan zawm theihna'n keini leh kan thlahte ta kumkhua tur a ni.
29. Thil inthupte chu LALPA kan Pathian ta a ni a, thil tihlante erawh chu he dan thu zawng zawng hi kan zawm theihna'n keini leh kan thlahte ta kumkhua tur a ni.
←  Deuteronomy (29/34)  →