2Thessalonians (3/3)    

1. A tawp berah chuan unaute u, Lalpa thu hi nangmahni zinga a awm ang khan, pungin chawimawia a awm theihna tur leh, mi luhlul leh mi sualte laka kan him theihna turin min tawngtaisak rawh u;
2. mi zawng zawng chuan rinna an nei vek si lo a.
3. Amaherawhchu, Lalpa chu a rinawm e, ani chuan a tinghetin mi sual lakah chuan a hum ang che u.
4. Thu kan pek apiang che u kha in zawm thin a, in la zawm leh zel pawh Lalpa-ah chuan kan ring che u a ni.
5. Tin, Lalpa chuan in thinlungte chu Pathian hmangaihnaah leh Krista chhelnaah chuan hruai lut rawh se.
6. Tin, unaute u, kan hnen ata thurochhiah an hmuh anga awm lo a, dan lo anga awm unau tinrengte lakah chuan inthiarfihlim turin kan Lalpa Isua Krista hmingin thu kan pe a che u.
7. Nangmahni ngeiin min zir dan tur in hre si a; in zingah dan lo angin kan chet ngai loh kha;
8. tu kut ata mah athlawnin in chhang kan ei ngai hek lo, in zingah tumah kan tihhautak lohna tur che uin achhun azana hah tak leh rim taka thawk chungin kan ei zawk a ni;
9. kan theih loh avang a ni lo a, nangnin min zirna turin in mi entawn atan kan insiam zawk a ni.
10. In hnena kan awm lai pawh khan he thu hi kan pek che u kha, "Tupawhin hna a thawh duh loh chuan ei pawh ei suh se," tih hi.
11. In zinga thenkhat dan lo anga awm thinte chanchin kan hre si a, chung chuan hna reng an thawk lo a, an tei mai mai zawk thin a ni.
12. Tichuan, chung angte chu, ngawi renga thawk tur leh, anmahni chhang ei turin Lalpa Isua Kristaah chuan thu pein kan fuih a ni.
13. Unaute u, nangni erawh chuan thil tha tih ning suh u.
14. Tin, tupawhin he lehkha thawna kan thu hi a zawm loh chuan chu mi chu in pawl hauh lohna'n chhinchhiah rawh u, a zah theihna turin.
15. Nimahsela, hmelma angah zawng ruat suh u la, unau angin zilh zawk rawh u.
16. Tin, remna Lalpa ngei chuan kumkhuain kawng tinrengah remna pe che u rawh se. Lalpa chu in zaa hnenah awm rawh se.
17. Kei Paulan, keima kut ngeia chibai ka bukna che u a nih hi; hei hi ka lehkha thawn tinrenga chhinchhiahna a ni, hetianga ka ziak hi.Kan Lalpa Isua Krista khawngaihna in zaa hnenah awm rawh se.
18. Kan Lalpa Isua Krista khawngaihna in zaa hnenah awm rawh se.

  2Thessalonians (3/3)