←  2Thessalonians (2/3)  →
1. Nimahsela, unaute u, kan Lalpa Isua Krista lo kalna leh a hnena kan han inkhawmna tur thu-ah chuan,
2. "Lalpa Ni chu a thleng reng tawh," tihna thlarau avangin emaw, thu avangin emaw, kan hnen atanga lehkha thawn ang avang in emaw, in rilru nghin thuai lohna tur leh in buai hek lohna turin kan ngen a che u.
3. Tuma'n engmahin tihder che u suh se; tluksanna chu a lo thlen hmasak zeta Dan Bawhchhepa, boral fapa chu a lo lan loh chuan chu mi Ni chu a thleng dawn si lo a.
4. Ani chuan Pathiana an vuah apiang leh, sakhua zawng zawng doin, an chunga awm tumin a inchawimawi ang: chutichuan Pathian biak ina thuin Pathian ang hialin a intar chhuak ang.
5. In hnena ka lo awm lai khan chung thu chu ka hrilh thin che u tih in hre reng lo em ni?
6. Ama hun te chauha a lo lan theihna turin engin nge khap tunah in hria e.
7. Dan bawhchhiatna thuruk chuan tunah pawh a thawk mek a ni si a; nimahsela lak boa a awm hma loh chuan tunah hian a khaptu a awm.
8. Chu mi lak bo hunah chuan Dan Bawhchhepa chu a lo lang tawh ang, Lalpa Isua'n ani chu a kaa thawin a tihlum ang a, a lo kala inlarnain a tiboral ang.
9. Chu Dan Bawhchhepa chu Setana chakna nen a lo kal ang a,thiltihtheihna tinreng te, chhinchhiahna tinreng te, dawt thilmak tinreng te nen a lo thawk ang,
10. boral mekte tan fel lohna bumna tinreng nen a ni ang; chhandama an awm theihna turin thutak hmangaihna chu an pawm loh avang a ni.
11. Chuvang chuan dawt thu chu an awihna turin Pathianin sual hnathawhna an hnenah a thlentir ang,
12. thutak awih loa fel lohnaa lawm zawkte chuan thiam loh an chan vek theihna'n.
13. Unau, Lalpa duhtakte u, Thlarau tihthianghlim leh thutak awiha chhandama awm turin atir ata Pathianin a thlan che u avangin in chung thu-ah hian Pathian hnenah lawmthu hril fo tur reng kan ni.
14. Chutiang atan chuan ani chuan kan Chanchin Tha hianin a koh che u kha, kan Lalpa Isua Krista ropuina nei turin.
15. Chutichuan, unaute u, ding nghet u la, thurochhiahte chu thusawiin emaw kan lehkha thawnin emaw kan zirtir che u kha pawm tlat rawh u.
16. Tichuan, kan Lalpa Isua Krista ngei leh Pathian kan Pa, min hmangaihtu leh khawngaihna avanga chatuana thlamuanna leh beiseina tha min petu chuan,in thinlungte chu tithlamuangin, thil tihthat leh thusawi that tinrengah tinghet rawh se.
17. in thinlungte chu tithlamuangin, thil tihthat leh thusawi that tinrengah tinghet rawh se.
←  2Thessalonians (2/3)  →