←  2Samuel (18/24)  →
1. Tin, Davida chuan a hnena mi awmte chu a chhiar a, sipai sang chunga hotute, za chunga hotute a siam a.
2. Tin, Davida chuan mite chu a tir chhuak a, hmun thuma thena hmun khat chu Joaban a ho a, tin, hmun thuma thena hmun khat chu Joaba unaupa Zeruia fapa, Abisaian a ho a, tin, hmun thuma thena hmun khat chu Git mi Itaian aho a. Tin, lal chuan mipui hnenah, "Keima ngei pawh in hnena ka kal ve ngei ngei ang," a ti a.
3. Nimahsela mipuite chuan, "Kal ve lo e; keiniho hi chu tlan bo ta pawh ni i la, pawi an ti lo ang a; tin, a chanve lai pawh hi va thi mah i la, pawi an ti hek lo ang: nang chu keiniho sing tlukin i hlu si a; chuvangin khawpui atanga min tanpui tura inpeih renga i lo awm chu a tha zawk a ni," an ti a.
4. Tin, lal chuan an hnenah, "Tha in tih ang apiang chuan ka ti ang," a ti a. Chutichuan lal chu kulh kawngka bulah chuan a ding a, tin, mipui zawng zawng chu za tel tel leh sang tel telin an chuak ta zut zut mai a.
5. Tin, lal chuan Joaba leh Abisaia leh Itaia chu, "Keimah vangin, tlangval Absaloma chu dim takin va ti ang che u," tiin thu a pe a. Mipui zawng zawngin Absaloma chungchang thua lalin sipai hotute zawng zawng thu apek lai chu an hria a.
6. Chutichuan mipuite chu Israel mite do turin indona hmun lamah chuan an kal ta a: tin, an indona chu ephraim ram ngaw a ni a.
7. Tin, chutah chuan Davida mite hmaah chuan Israel mite chu an tlawm ta a. tin, chuta chuan chu mi ni chuan mi singhni zet an that a.
8. An indona chuan chu mi lai ram zawng zawng chu a huam vek mai si a; chu mi ni chuan khandaih ai mahin ram ngawin a lem hnem zawk a ni.
9. Tin, Absaloma chuan Davida mite chu a va tawk ta thut a. Tin, Absaloma chu a sabengtung chunga a chuang a, tin, sabengtung chu sasaw thing zar buk tak hnuaiah a lut a, a lu chu sasaw thingah chuan a tang ta a, lei si lo, van si loin a uai ta reng mai a; tin sabengtung chu a tlan ta zel a.
10. Tin, tuin emaw hian a hmu a, Joaba a hrilh a, "Ngai teh, sasaw thingah Absaloma inkhai reng ka hmu," a ti a.
11. Tin, Joaba chuan a hrilhtu hnenah chuan, "Ngai teh, chu chu i hmu si a, engati nge i tihhluma leiah i tihthlak nghal loh? Chutiang chuan ti la chu tangka sawm leh kawnghren ka pe tur che a," a ti a.
12. Tin, mi chuan Joaba hnenah, "Tangka sang pawh hmu dawn mah i la, lal fapa chunga ka kut ka thlak lo reng reng ang; ka beng riat ngeiah lalin nang leh Abisaia leh Itaia hnenah, 'tlangval Absaloma chu tumahin khawih hlek suh se,' tiin thu ape si che u a.
13. Rinawm loh thlak takin lo that ta ringawt mai ang i la, (lal lakah chuan engmah thup theih ani awm si lo va) nang chu i inthiarfihlim leh mai awm si a," a ti a.
14. Chutichuan Joaba chuan, "Hetiang chuan i kianga ka awm reng thei tawp lo mai," a ti a, fei pathum a keng a, sasaw thing zinga dama lo la awm Absaloma thinhnun takah chuan a chhun a.
15. Tin, Joaba ralthuam kengtu talngval sawm chuan an rawn hual a, Absaloma chu an chhun a, an that ta a.
16. Tin, Joaba chuan tawtawrawt a ham a, Israel ho umtu mipuite chu an lo kir ta a: Joaba chuan mipuite chu a dang ta tlat mai a.
17. Tin, Absaloma ruang chu a la a, ngawah khuarkhuruk thuk takah chuan an paih a, a chungah chuan lung an tiang khawm thur a; tin, Israel mi zawng zawngte chu mahni puan in teuvah an tlan haw ta a.
18. Absaloma chuan a dam laiin lal ruama lung tian alo tiang tawh diam a; "Ka hming daih lohna turin fapa pawh ka nei si lo a," a ti a. Chu mi lung tian hmingah chuan ama hming a puttir a; tun thlengin Absaloma hriatrengna tih a ni.
19. Chutichuan Zadoka fapa Ahimaaza chuan, "Ka va tlan ang a, LALPA'n a hmelma phuba a laksak dan chanchin hi lal chu ka va hrilh ang e," a ti a.
20. Tin, Joaba chuan a hnenah, "Vawiinah zawng chanchin chu va la hrilh suh, ni dangah chanchin chu la hrilh zawk ang che, lal fapa chu a thih atak avangi, vawiinah zawng chanchin engmah va hrilh suh ang che," a ti a.
21. Tichuan Joaba chuan Kus mi hnenah chuan, "Kal la, i thil hmuh ve hrilh rawh le," a ti a. Tin, Kus mi chuan Joaba chu kunin chibai a buk a tlan ta a.
22. Chutichuan Zadoka fapa Ahimaaza chuan Joaba hnenah,"Engpawh ni se la, Kus mi kha ka va um ta'ng e," a ti leh a. Tin, Joaba chuan, "Ka fapa, chanchin hrilh man i hmu dawn si lo a, engah nge i tlan ang?" a ti a.
23. Nimahsela ani chuan, "Engpawh ni se la ka tlana ng e," a ti a. Tin, ani chuan a hnenah, "Tlan mai rawh le," a ti a. Chutichuan Ahimaaza chu phaizawl lam kawngah a tlan a, Kus mi chu a lehpel a.
24. Tichuan Davida chu kulh kawngka chhawng inkarah chuan a lo thu a: tin, ralvengtu chu kulh kawngka pawnta zawk chung lamah chuan a chho a, a han hawi vel ruai ruai a, tin, ngai teh, mi pakhat amah chauhin a lo tlan a.
25. Tin, vralvengtu chu a au a, lal chu a hrilh a. Tin, lal chuan, "Mi pakhat mai ani h chuan chanchin rawn sawi tur a nei a ni ang," a ti a. Tin, a lo kal thuai thuai a, a lo hnai ta telh telh a.
26. Tin, ralvengtu chuan mi dang lo tlan a hmu leh a: tin, ralvengtu chuan kawngkar vengtu a au a, "Ngai teh, mi dang amah chauhin a lo tlan leh e," a tia . Tin, lal chuan, "Ani pawh chuan chanchin a rawn thlen ve dawn a nih chu," a ti a.
27. Tin, ralvengtu chuan, "A hmasa zawka tlan danc hu Zadoka fapa Ahmiaaza tlan dan ng hlein ka hria," at ia . Tin, lal chuan, "Ani chu mi tha tak a ni a, chanchin tha a rawn thlen dawn ani ang," a ti a.
28. Tin, Ahimaaza chuan a au a, lal hnenah, "A fel vek e," a ti a. Tin, a maia lei siin lal hmaah chuan chibai bukin a kun a,"Lalpa, ka pu beih tuma kut thlak tumtute dangchattu LALPA i Pathian chu fakin awm rawh se," a ti a.
29. Tin, lal chuan, "tlangval Absaloma chu a dam alawm maw?" a ti a. Tin, Ahimaaza chuan a chhang a, "Joaban lal chhiahlawh, kei i chiahlawh ngei hi min tirh chhuah laiin an buai mur mur ka hmu a, nimahsela eng nge ni tih erawh chu ka hre lo," a ti a.
30. Tin, lal chuan, "Ka sirah hian lo ding rih rawh," a ti a. Tin, a sirah a lo ding a.
31. Tin, ngai teh, Kus mi chu a lo thleng a; tin, "Kus mi chuan, "Lalpa ka pu tan chanchin ka rawn thlen e' i chunga helho zawng zawng phuba chu vawiinah hian LALPA'n a laksak ta che a ni," a ti a.
32. Tin, lal chuan Kus mi hnenah chuan, "tlangval Absaloma chu a dam a lawm maw? a ti a. Tin, Kus mi chuan a chhang a, "Lalpa ka pu hmelmate leh i chiatna zawngtute zawng zawng chu chu tlangval ang chuan awm vek rawh se," a ti a.Chutichuan lal chu a mangang ta hle mai a, kulh kawngka chunga pindanah chuan a chho a, a tap a: tin, a chhoh pah chuan, "Aw, ka fapa Absalom, ka fapa, ka fapa Absalom, i aiah han thi teh zawk i la aw, aw Absalom, ka fapa, ka fapa!" a ti a.
33. Chutichuan lal chu a mangang ta hle mai a, kulh kawngka chunga pindanah chuan a chho a, a tap a: tin, a chhoh pah chuan, "Aw, ka fapa Absalom, ka fapa, ka fapa Absalom, i aiah han thi teh zawk i la aw, aw Absalom, ka fapa, ka fapa!" a ti a.
←  2Samuel (18/24)  →