←  2Kings (10/25)  →
1. Ahaban Samari-ah chuan fapa sawmsarih anei a. Tin, Jehuan Samari-ah Jezreel khaw hotu, upate hnenah leh Ahaba fate lo enkawl tleitute hnenah chuan,
2. "He lehkha hi in hmuh veleh, in pu fate chu in hnenah a awm a ni a, tin, tawlailir te, sakawr te, kulhpui nei khuate pawh, ralthuamna nen in nei a;
3. chutichuan in pu fate zinga mi a tha ber leh a fel ber zawng chuak u la, a pa lalthutthlenga thuttir u la, in pu chungte do chu dopi rawh u," tia ziak lehkha a thawn a.
4. Nimahsela anni chuan an hlau ta em em mai a, "Ngai teh u, lal pahnih pawh khan an chelh tawh lo a ni a, keinin engtinnge kan chelh tehlul ang?" an ti a.
5. Tinlal inchhunga hotu ber te, khawpi awptu te, upaho te, naupangho lo enkawl thleitute nen chuan Jehua hnenah, "I chhiahhlawhte kan ni e, ti tura min hrilh apiang chu kan ti zel ang; tumah lalah kan siam lo ang; nang in tha i tih ang angin ti ang che," tiin mi an tir a.
6. Tin, an hnenah, "Ka lama tang in nih a, ka thu in awih dawn chuan in pu fapate lu han la u la, naktukah hetih hun hma hian Jezreel khuaah ka hnenah lo kal ang che u," tiin lehkha a thawn leh a. Lal fapate chu sawmsarih an ni a, khawpui milianho, anmahni enkawl tleitute hnenah chuan an awm a.
7. Tin, lehkha chu an han hmuh chuan heti hi a ni a, lal fapate chu an man a, a sawmsarih chuan an that a, an lu chu bawmrangah an dah a. Jezreel khuaah a hnenah an thawn ta a.
8. Tin, zualko a lo thleng a, "Lal fapate lu chu an rawn la ta a," tiin a hrilh a. Tin, ani chuan, "Kulh luhna kawngka bulah hmun hnihah tiang khawm u la, naktuk thlengin awm rawh se," a ti a.
9. Tin, a tukah chuan heti hi a ni a, a va chhuak a,a ding a, mi zawng zawng hnenah chuan, "Mi fel in ni e; ngai teh u, ka pu chu ka phair a, ka lo tihhlum ta tak a; anih leh, hengo zawng zawng hi tu thah nge ni?
10. LALPA'n Ahaba chhungte chungchang thu a sawi, LALPA thu chu leilungah hian a luang ral hlek lo ang tih hre rawh u; LALPA'n a chhiahhlawh Elija hmanga a sawi kha a rawn hlen ta ai hi," a ti a.
11. Chutichuan Jehua chuan Jezreel khuaa Ahaba chhunge la awm zawng awng leh, a mi lian zawng zawng te leh, a thian zawng awngte leh, a puithiamte chu pakhat mah zuahsak hlek loin a that fai vek a.
12. Tin, a tho a, a chhuak a, Samari-ah a kal ta a. Tin, kalkawnga berampute beram hmul mehna in a va thlenin,
13. Jehua chuan Juda lal Ahazia unauteho a hmu a, "Tute nge in nih?"" a ti a. Tin, anni chuan, "Ahazia unaute kan ni a, lal fateho leh lalnu fateho chibai kan zuk buk dawn a ni," tiin an chhang a.
14. Tin, ani chuan, "Anungin man rawh u," a ti a. Tichuan anungin an man a, beram hmul mehna in khur bulah chuan an that a, mi sawmli leh pahnih zet an ni a; pakhat mah a zuah lo.
15. Tin, chuta ta a chhuah hnu chuan Rekaba fapa Jehonadaba, ama hmuak tura lo kal a va hmu a; tichuan chibai a buk a, a hnenah, "I chunga rilru dik ka pu ang hian, rilru dik i pu ve emaw chu?" a ti a. Jehonadaba chuan, "Pu e," tiin a chhang a. "A ni leh i kut mi han pe teh," a ti a. Tichuan a kut chu a han pe a, tin ani chuan a hnenah a tawlailir chhungah a kai lut a.
16. Tin, ani chuan, "Ka hnena lo kal ve la, LALPA tana thahnem ka ngaihzia hi han hmu ve teh reng khai," a ti a. Chutichuan a tawlailirah a chuantir ve ta a.
17. Tin, samari a va thlen chuan Ahaba chhungte Samari-a la awm chhunate chu a tihoral zaw vek hma loh chuan a that zel a, Elija hnena a sawi LALPA thu ang ngei khan.
18. Tin, Jehuan mipuiho zawng zawng chu a ko khawm a, an hnenah chuan, "Ahaba khan Baala rawng hi a bawl hlek chauh a ni a, Jehua erawh hi chuan nasa takina nia a bawl dawn ni.
19. Chutichuan baala zawlneiho zawng zawng te, a betu zawng zawngte leh a puithiam zawng zawngte ka hnenah hian han ko khawm teh u; tuma kim lo suh se; Baala hnenah hian inthawina ropuit ak hlan tur ka nei a; tupawh a kim lo a piang hchu anung hlek lo ang," a ti a. Nimahsela Jehua chuan Baala betute chu tihhlum tumin, fin vervekin a ti a ni.
20. Tin, Jehua chuan, "Baala hmingin kutpui siam rawh u," a ti a. Tichuan chu chu an than vel ta a.
21. Tin, Jehuan Israel ram zawng anwga a thawn vel a; tichuan Baala betute zawng zawng chu an lo kal a, tel lo reng reng an awm lo. Tin, Baala inah chuan an lut a; tin, baala in chu kawngka atanga kawmchar thlengin an khat hmur mai a.
22. Tin, inthuamna puan enkawltu hnenah, "Baala betu zawng zawngte hi inthuamna puan han laksak rawh," a ti a. Tichuan inthuamna puante chu a rawn laksak a.
23. Tin, Jehua chu, Rekaba fapa Jehonadaba nen Baala inah chuan an lut a; tin, Baala betute hnenah chuan, "Hetha hian Baala betute chauh lo, LALPA mite hi an lo awm ve dah ang e, zawng u la, en vel teh u," a ti a.
24. Tin, inthawinate le halral thilhlan hlan turin an lut ta a. Jehua chuan pawna mi sawmria a lo dintir tawh reng a, "Heng in kuta ka pek che u hi tupawh an chauh vaih chuan, a chhuahtu chuan a nun aiah chuan ama nunna chu a chan ang," a ti a.
25. Tin, halral thilhlana hlan zawh veleh heti hi a ni a, Jehua chan vengtu sipai leh an hotute hnenah, "Va lut u la, va that rawh u; tuma chhuahtir suh u," a ti a. Tin, khandaihin an sat chiam a; tin, vengtu sipai leh an hotute chuan an paih chhuak a, tin, Baala in awmna khuaa an kal a.
26. Tin Baala ina milemte chu an la chhuak a, an hal a.
27. Tin, Baala lungphun chu an tichim a, Baala in chu an tichhia a, dailenna inah an hmang ta a, tun thleng hian an la hmang a ni.
28. Chutiang chuan Jehuan Israel ram ata Baala chu a tiboral a ni.
29. Nimahsela Nebata fapa Jeroboama sualna- Israel-hote thil tihsualtira a tihte chu Jehua chuan a ba chuan lo, chu chu Bethel khua leh Dan khuaa rangkachak bawng no lemte biak a ni.
30. Tin, LALPA'n Jehua hnena, "Ka mittlung taka thil i tih avang leh ka rilru duhthusam ang taka Ahaba chhungte chunga i tih avangin, i fapate chu chhuan lina thlengin Israelte lalthutthlengah an thu ang," a ti a.
31. Nimahsela Jehua chuan LALPA, Israelte Pathian dan chu athinlung awng zawngin a pawm lo a; Jeroboaman Israel-hote thil tihsualtira a tihsual kha a ban chuang lo a.
32. Chung lai chuan LALPA'n Israelte chu a thlauhthla tan ta a; tichuan Hazaelan Israel ram zawng zawnga chuan a hneh zel a;
33. Jordan atanga khaw chhak lam, Gilead ram zawng zawng, Gad-ho te, Reuben-ho te, Manase-ho te, Arnon ruama Aroer atanga Gilead le Basan ram thleng rakin.
34. Jehua chanchin dang te, a thiltih zawng anwg te, a thiltih theihzia zawng anwgte chu Israel lalte lal lai thu ziakna bua chuan a chuang anilo'm ni?
35. Tichuan Jehua chu a pi leh pute hnenah chuan a muhil a, Samari khuaah an phum ta a. Tin, a fapa Jehoahaza chu a aiawhin a lal ta a.Tin, Samari rama Israelte chunga Jehua rorel chhung chu kum sawmhnih leh kum riat a ni.
36. Tin, Samari rama Israelte chunga Jehua rorel chhung chu kum sawmhnih leh kum riat a ni.
←  2Kings (10/25)  →