←  2Chronicles (30/36)  →
1. Tin, Hezekia chuan Israel ram leh Judai ram zawng zawngah mi a tir a, Ephraim ram leh Manase ramahte pawh LALPA Israelte Pathian tana kalhlen kut nei tura Jerusalem-a LALPA ina lokal turin lehkha a thawn bawk a.
2. Lal leh a miliante leh Jerusalem-a mipui zawng zawngte chuan thla hnihnaa, kalhlen kut neih an rawt a.
3. Chumi lai chuan puithiam intithianghlimte an la tam tawk lo a, Jerusalem-a mipui an la pun khawm loh avangin an la kut thei lo a.
4. An thil ruat chu lal leh mipuiho ngaihin a dik a.
5. Chutichuan Israel ram zawng zawng Beer-seba atanga Dan thlengin LALPA Israelte Pathian tana kalhlen kut nei tura Jerusalem-a lo kal tura puan turin thu an tinghet ta a: a dan ang tak chuan chutianga tam chuan an la ti ngai lo a.
6. Chutichuan lehkha tlanpuitute chu lal leh a mi lianhote lehkha kengin, Israel leh Judai ram zawng zawnga kal turin lal thupek angin an chhuak a, "Nangni Israela thlahte u, Suria lalte kut ata chhuaka la dam chhunte lam chu a lo hawi leh theihna'n LALPA, Abrahama te, Isaaka te, Israela te Pathian lam chu rawn hawi leh rawh u.
7. Nangni zawng in pi le pute leh in unaute, LALPA an pi leh pute Pathian chunga thil tisuala an awm a, tiau tura a thlahthlam tak in hmuhte ang chuan awm ve suh u.
8. In pi leh pute ang khan tihmawh ve tawh suh u la, LALPA hnenah intulut zawk u la, kumkhua atana a tihthianghlim, a hmun thianghlimah chuan lo lut u la, LALPA in Pathian rawng chu bawl rawh u, tichuan a thinurna nasa tak chu in lak ata a kiantir dawn nia.
9. LALPA lam in lo hawi leh zawngin in unaute leh in fate chu sala mantute chuan an khawngaih ang a, he ramah hian an lo kal leh dawn nia: LALPA in Pathian chu ngilnei tak leh zahngai thei tak a ni si a, a lam in hawi phawt chuan a hawisan lo ang che u," tiin.
10. Chutichuan lehkha tlanpuitute chu khaw tinah Ephraim leh Manase ram zawng zawngah Zebulun thlengin an kal a: nimahsela anni chuan an lo nuihzatbur a, an lo hmusit a.
11. Amaherawhchu Aser-ho le Manase-ho leh Zebulun-ho thenkhatin an bengkhawn a, Jerusalem-ah chuan an lo kal a.
12. Judai ramte phei chu LALPA thua lal leh milianhote thupek chu zawm turin Pathianin rilru hmun khat a puttir a.
13. Tichuan thla hnihnaah chuan chhang dawidim telh loh kut nei turin mi tam tak Jerusalem-ah chuan an lo pung khawm chiam a, an tam ngei mai.
14. Tin, an tho a, Jerusalem-a maichamte chu an la a, tin, rimtui halna maichamte pawh an la a, Kidron luiah an paih a.
15. Tichuan thla hnihna ni sawm leh ni li ni chuan kalhlen kutna chu an talh a; tin, puithiamte leh Levi-ho chu an inzahpui a, an intithianghlim a, halral thilhlan chu LALPA inah an la lut a
16. Tin, Pathian mi Mosia dan ang takin an hmun theuhvah an ding a; tin, puithiamte chuan Levi-ho atanga an dawn thisen chu an theh a.
17. Mipui zingah chuan intithianghlim lo an tam si a; chuvangin LALPA tana tithianghlim turin a thianghlim lo apiangte puala Levi-hote chuan kalhlen kutna an thlah a.
18. 18-19, Ephraim mite, Manase mi te, Isakar mi te, Zeulun mite tam tak achu an intithianghlim lo na a, dan lo angin kalhlen kutna chu an ei ve a. Hezekian, "Tupawh an thinlunga Pathian LALPA, an pi leh pute Pathian zawngtu apiangte chu hmun thianghlim dan ang takin intithianghlim lo mah se la, lalpa ngilnei taka chuan ngaidam theuh rawh se," tiin a tawngtaisak a.
19. 18-19, Ephraim mite, Manase mi te, Isakar mi te, Zeulun mite tam tak achu an intithianghlim lo na a, dan lo angin kalhlen kutna chu an ei ve a. Hezekian, "Tupawh an thinlunga Pathian LALPA, an pi leh pute Pathian zawngtu apiangte chu hmun thianghlim dan ang takin intithianghlim lo mah se la, lalpa ngilnei taka chuan ngaidam theuh rawh se," tiin a tawngtaisak a.
20. Tin, LALPA'n Hezekia tawngtaina chu a ngaithla a, mipuite chu a tidam ta a.
21. Tin, Israel mi Jerusalem-a awmte chuan chhang dawidim telh loh kut chu hlim takin ni sarih an hmang a; tin, Levi-ho leh puithiam ho chuan tingtang ring tak nena LALPA chawimawia hla sain ni tin, LALPA an fak a.
22. Tin, Hezekia chuan thiam tak maia LALPA mawi taka faktu Levi-hote chu a lo thlamuan a. chutichuan LALPA an pi leh pute Pathian hnena thupha chawiin remna thilhlante hlanin ni sarih chhung chu kut ruai an theh tumtla a.
23. Tin, mipui chuan ni sarih dang kut leh an rawt a; tichuan ni sarih dang hlim takin an kut leh a.
24. Tin, Juda lal Jezekia chuan mipuite chu bawngpa sangkhat leh beram sangsarih talh atan a pe a; milianhote pawhin mipuite chu bawngpa sangkhat leh beram singkhat an pe bawk a; puithiam tam takte an intithianghlim a.
25. Tichuan Juda mipui zawng zawng chu puithiamte nen Levi-hote nen, Israel ram atanga mipui lo kal zawng zawngte leh hnam dang Israel ram atanga lo kal Judai rama awmte chu an hlim em em mai a.
26. Chutichuan hlimna ropui tak Jerusalem-ah chuan a awm a: Israel lal Davida fapa Solomona china chutiang reng reng chu Jerusalem-ah a la awm ngai lo.Chutichuan puithiam Levi-hote chu an tho a, mipuite chu mal an sawm a, an aw chu ngaihthlakin a awm a, an tawngtaina chuan a awmna thianghlim van chu a thleng ta a.
27. Chutichuan puithiam Levi-hote chu an tho a, mipuite chu mal an sawm a, an aw chu ngaihthlakin a awm a, an tawngtaina chuan a awmna thianghlim van chu a thleng ta a.
←  2Chronicles (30/36)  →