←  2Chronicles (26/36)  →
1. Tin, Juda mi zawng zawng chuan kum sawm leh kum ruk mi Uzia chu an hruai a, a pa Amazia aiah lalah an siam ta a.
2. Ani chuan lal chu a pi leh pute hnenah a muthilh hnuah Elot khua chu a siam tha a. Judai ramah a telh leh a.
3. Uzia chu a lal tantirhin kum sawm leh kum ruk mi a ni a, Jerusalem-ah kum sawmnga leh kum hnih a lal a, a nu hming chu Jekoiliai, Jerusalem mi a ni a.
4. Tin, a pa Amazia thiltih ang apiang ti vein LALPA mithmuha thil tha tak a ti thin a.
5. Pathian inlarna hrethiam Zekaria dam chhung chuan Pathian zawng turin a insiam tlat a: Pathian a zawn chhung zawng chuan Pathianin a tihmuingil zel a.
6. Philistia-ho run turin a thawk chuak a, Gat kulh te, Jabne kulh te, Asdod kulh te a tichim a; tin, Asdod ramah leh Philistia-ho zingahte khua a siam a.
7. Tin, Pathian Philistia hote lakah leh Gur-baal-a awm Arabia-ho leh Meun-ho lakahte a tanpui a.
8. Tin, Amon-hote chuan Uzia lakah chhiah an chawi thin a; tichuan a lo chak tak ema vangin Aigupta ram thlengin a hming a thang ta a.
9. Tin, Uzia chuan Jerusalem-ah Kil kawngkaah te, Ruam Kawngkaah te, kulh kawina lai kawngkaah te in sang a sa bawk a, kulhin a hung a.
10. Tin, thlalerah pawh in sang a sa a, ran tam tak a neih avangin tui te a lai chhuak thluah mai a, phai lam leh phai zawlahte pawh; tin, lo nei mite leh uain sawr mite tlang lamah leh ram thaahte chuan a nei a, thlawhhma lam ngaina mi tak a ni.
11. Tin, Uzia chuan sipai indo mi, lal sipai hotu Hanania hnuaia mi, lehkha ziaktu Jeiela leh hotu Maaseia ten an ruat ang zela a pawl pawla ralkap mi a nei bawk a.
12. Mi chak huaisen thiau, an chhungkaw puipa zawng zawng chu 26,000 an ni a.
13. Tin, an hnuaia chuan sipai zir thiam sa thiau 307500 hmelma laka lal tanpuitu ral bei mi tak tak an awm a.
14. Tin, Uzia chuan sipai zawng zawng tan phaw te, fei te, thir lukhum te, thir kawr te, thalngul te, virvawm atan lungte a buatsaih a.
15. Tin, Jerusalem-ah in sang leh kulh kil tina daha thal lo kahna leh lung lian fe fea lo denna tur, mi fingte hriat chhuah khawlte a siam a. A ming chu ram tin, ram tangah a thang ta a; a lo chak hle thlengin amaka maka tanpuiin a awm a.
16. Nimahsela a lo chak tak hnu chuan a rilru a lo sang ta a, tha lo takin thil a ti a, LALPA a Pathian chungah thil a tisual ta a; maicham rimtui hal turin LALPA biak inah a lut ta maia.
17. Tin, puithiam Azaria chuan a zui a, mi huai tak tak LALPA puithiam sawmriat an el ve a;
18. tin, lal Uzia chu an khap a, a hnenah, "Uzi, LALPA tana rimtui hal hi i tih tur a ni lo a, rimtui hal tura tihhran Arona fapa puithiamte tih tur a ni zawk e; hmun thianghlim ata hi chhuak rawh; thil i tisual a nih hi, LALPA Pathian laka i ropuina tur pawh a ni bawk lo," an ti a.
19. Chutichuan Uzia chu a thinur ta a; rimtui halna tur mei lakna a keng a;tin, chutia puithiamte chunga a thinur lai tak chuan LALPA inah, rimtui halna bulah puithiamte hmaah chuan a chalah a lo phar chhuak ta a.
20. Tin, puithiam hotu Azaria leh puithiam zawng zawng chuan an han en a, ngai teh, a chalah chuan a lo phar a, chuta tang chuan an nam chuak ta thuai a: a ni, LALPA'n a hrem avangin amah pawh hmanhmawh tak bawkin a chhuak ta a.
21. Tichuan lal Uzia chu a thih ni thlengin a lo phar ta a, a phar avangin in hrangah a awm ta a; LALPA in ata chu tihchhhuah a ni a, tichuan a fapa Jothama chu an rama mite rorelin lal ina awptuah a awm ta a.
22. Tichuan Uzia thiltih dang zawng zawngte chu a bul atanga a tawp thlenga Amoza fapa zawlnei Isaian a ziak a.Chutichuan Uzia chu api leh a pute hnenah chuan a muhil a, lal inphumna hmuna a pi leh a pute zingah an phum a, "Ani zawng phar a ni si a," an ti a: tin, a fapa Jothama chu a aiah a lal ta a.
23. Chutichuan Uzia chu api leh a pute hnenah chuan a muhil a, lal inphumna hmuna a pi leh a pute zingah an phum a, "Ani zawng phar a ni si a," an ti a: tin, a fapa Jothama chu a aiah a lal ta a.
←  2Chronicles (26/36)  →