←  2Chronicles (13/36)  →

---

1.

Jeroboama kum sawm leh kum riat a lal kumin Juda-ho chunga Abija a lal tan a.

2.

Jerusalem-ah kum thum a lal a; a nu hming chu Maakai, Gibea mi Urieal fanu a ni. Tin, Abija leh Jeroboama chu chu an indo a.

3.

Tin, Abija chuan sipai indo mi, mi huaisen nuali thlan thiau nen an va bei a; tin, Jeroboama chuan mi chak huaisen thlan thiau nuairiat inzarin a lo do a.

4.

Tin, Abija chu Ephraim tlang rama Zemaraim tlangah a ding a, "Aw, Jeroboam, Israel-ho zawng zawng nen lo ngaithla rawh u;

5.

LALPA Israelte Pathian chuan Israel ram chu Davida leh a fate chi thuthlungin kumkhua atan a pe tih hre awm tak in ni lo'm ni?

6.

Nimahsela Nebata fapa Jeroboama, Davida fapa Solomona chhiahlawh chu a pu chungah a lo hel ta mai a.

7.

Tin, Rehoboama a la naupan a, a rilru a la nem a, a lo dodal theih loh lai khan Solomona fapa Rehoboama kalhin mi bengtlaloho, Beliala fate an pung khawm a.

8.

Tin, Davida fapa-te lakah hian LALPA ram chu do theih in inring a: tam pawh in tam hle a, Jeroboaman pathian atana a siamsak che u rangkachak bawng no lemte pawh in hnenah a awm bawk a.

9.

LALPA puithiam, Arona fapate leh Levi-hote chu hnawtchuakin, ram dang mite tih dan angin puithiam in insiam a ni lo'm ni? Tichuan bawng tuai leh beram pasariha rawn inhlan apiangte chu pathian ni lawi lo puithiam an ni thei zel mai a.

10.

Nimahsela keini zawng, LALPA chu kan Pathian a ni a, amah chu kan hawisan lo a; LALPA tana rawngbawltu mahni hna theuh thawk Arona fapa puithiamte leh Levi-hote kan nei a:

11.

tin, ni tin, leh zan tin, LALPA tan halral thilhlan te, rimtui te an hal thin a: chhang chiah pawh dawhkan thianghliman an dah fel diam thin a; tlai lam apianga hal turin rangkachak khawnvar dahna a khawnvarte nen: keini zawngin LALPA kan Pathian thupek chu kan zawm reng a, nangni erawh chuan amah chu in hawisan a ni.

12.

Tin, ngai teh u, Pathian chu kan hma hruaiin kan hnenah a awm a, tin, a puithiamte an tawtawrawta nangmahni hnawt tura ham turin an awm bawk a. Aw, Israela thlahte u, LALPA in pi leh pute Pathian chu do lul suh u, in hmuingil tawp hlei lo ang e," a ti a.

13.

Nimahsela Jeroboama chuan an hnung lamah a chan ruktir a: tichuan Judate hma lamah an awm a, chang rutute chu an hnung lamah an awm a.

14.

Tin, Judate chu an han lehhawi chuan ral chu an hnung lam leh an hma lamah an lo awm a, LALPA chu an au ta a, puithiamte chuan tawtawrawt an ham a.

15.

Chutichuan Judate chu an au ta dur dur a; chutia Judate an au dur dur chuan heti hi a ni a, Abija leh Juda-ho hmaah chuan LALPA'n Jeroboama leh Israel-ho zawng zawng chu a titlawm ta a.

16.

Tichuan Israel thlahte chu Juda-ho hmaah chuan an tlanchhia a, Pathianin an kutah a pe ta a.

17.

Chutichuan Abija leh ahote chuan an that ta chiam mai a: tichuan Israel mi thlan thiau nuainga an that a.

18.

Chu mi tuma Israela thlahte tlawm dan chu chutiang chu a ni, Juda thlahte chuan LALPA an pi leh pute Pathian an rin avangin an ngam ta a.

19.

Tin, Abija chuan Jeroboama chu a um a, he'ng khuate hi a laksak -Bethel leh a khawper te, Jesana a khawperte nen, Ephron a khawperte nen.

20.

Abija lal lai chhung chuan Jeroboaman din chauh lehnaa nei ta lo; LALPA'n a hrem a, a thi ta a.

21.

Abija erawh chu a lo chak ta deuh deuh a, nupui sawm leh pali a nei a, fapa sawmnih leh pahnih leh fanu sawm leh paruk a hring a.Abija chanchin dangte leh a awm dan te, a thu sawite chu zawlnei Idova hrilhfiahna buah a chuang a ni.

22.

Abija chanchin dangte leh a awm dan te, a thu sawite chu zawlnei Idova hrilhfiahna buah a chuang a ni.

---

←  2Chronicles (13/36)  →