←  1Thessalonians (4/5)  →

---

1.

Chutichuan, unaute u, a tawp berah chuan in awm dan tur leh Pathian in tihlawm dan tur (tuna in awm dan ang hi), kan hnen ata in lak ang khan in ngah lehzualna turin Lalpa Isuaah chuan kan ngenin kan fuih che u a ni.

2.

Lalpa Isua zarah chuan eng thute nge kan pe che u kha in hre si a.

3.

Pathian duhzawng, in thianghlimna tur chu hei hi a ni, inngaih bansan u la;

4.

Pathian hre lo Jentailhote anga hur kawng chak loin,

5.

thianghlim leh chawimawiin mahni bel vawng thiam theuh u la;

6.

chu mi kawngah chuan tuma'n bawhchhiain a unau chungah thil tha lo ti suh sela; Lalpa chu chung ang thil titu zawng zawng phuba latu a nih avangin - keini pawhin kan hrilh lawkin kan hriattir tawh che u ang khan.

7.

Pathianin bawlhhlawh turin min ko si lo a, thianghlimah min ko zawk a ni.

8.

Chuvangin, a pawisa lotu chuan mihring pawisa lo a ni lo a, Pathian, a Thlarau Thianghlim pe thintu che u chu a pawisa lo a ni zawk.

9.

Amaherawhchu, unaute hmangaih kawng thu chu ziaksak in ngai lo e, inhmangaih tawn turin nangmahni ngei Pathian zirtirin in awm si a.

10.

Makedonia ram puma unau zawng zawngte chungah pawh chutiang chuan in ti a, nasa lehzuala ti zel turin kan ngen a che u.

11.

Kan hrilh ang ngei che u khan phili ruai loin mahni hna theuh nei tlatin mahni kut ngei hmangin hna thawk rawh u;

12.

tichuan miten an ngaisang ang che u a, engmah tlakchham in nei lo ang.

13.

Nimahsela, unaute u, mi dang beiseina reng nei lote anga in lungngaih lohna'n, muhilte chanchin in hriat loh kan duh lo e.

14.

Isua a thi a, a tho leh ta tih kan rin si chuan Isuaa muhil tawhte chu Pathianin ama rualin a rawn hruai ve bawk ang.

15.

Hei hi Lalpa thuin in hnenah kan sawi a ni. Keini Lalpa lo kal thlenga nunga lo la awm rengate hian muhil tawhte chu kan lehkhalh tawp lo ang, tih hi.

16.

Lalpa ngei chu au thawm nen, vantirhkoh chungnung ber aw nen, Pathian tawtawrawt ri nen, van atangin a lo chhuk dawn si a; tin, Kristaa thi tawhte chu an tho hmasa ang a;

17.

chu mi hnuah chuan keini nunga lo la awm rengate hi boruakah Lalpa hmuak turin anmahni rualin chhum zingahte khian lak chhohin kan awm ang; chutichuan kumkhuain Lalpa hnenah kan awm tawh ang.Chuvangin, he'ng thu hian inthlamuan tawn rawh u.

18.

Chuvangin, he'ng thu hian inthlamuan tawn rawh u.

---

←  1Thessalonians (4/5)  →