←  1Thessalonians (2/5)  →
1. Unaute u, kan rawn tlawh che u kha a lo thlawn lo tih nangmahni ngeiin in hre si a;
2. thlawn ahnekin, chu mi hma chuan in hriat tawh angin, Philippi khuaah chuan hrehawm tuar leh zahthlak taka siama kan awm hnu khan buai em em chung pawhin Pathian Chanchin Tha in hnena sawi turin kan Pathianah chuan kan lo huai tak zawk kha.
3. Kan thu hril hi dawta chhuak a ni si lo a, bawlhhlawha chhuak a ni hek lo a;
4. Chanchin Tha kawltira awm turin Pathian tha tih mi kan nih ang ngeiin, mihring tilawm tur ang ni loin; kan thinlung fiahtu Pathian tilawm zawkin thu kan sawi zawk thin a ni.
5. Englai mahin fak derna thu emaw, duham khuhna emaw kan hman an hre ngai si lo tih in hriat kha (Pathian min hriatpuitu a ni);
6. Krista tirhkoh ka nih avangin mi tan hautak zet ni thei mah i la, mihring lakah, nangni lakah pawh, mi dangte lakah pawh, chawimawina kan zawn an hre ngai hek lo.
7. Nu, nau pawmin ama fate a duat angin in zingah nunnem takin kan awm zawk kha.
8. Chutiang bawkin kan duhzawng tak in lo nih tak avang khan, kan duh ngawih ngawih che u a, Pathian Chanchin Tha chauh ni loin, keimahni nun pawh pek hial che u kan peih kha.
9. Unaute u, kan thawh hahzia leh kan thawh rimzia kha in hre reng e; in zingah tumah kan tihhautak lohna tur che uin achhun azana thawkin, Pathian Chanchin Tha kan hrilh thin che u kha.
10. Nangni ringtute chunga thianghlim tak leh fel tak leh demawm lo taka kan awmzia kha min hriatpuitute in ni, Pathian nen.
11. Ama ram leh ropuinaa ko luttu che u Pathian mi ni tlaka in awm theihna turin, pain ama fate chunga a tih angin, fuih leh thlamuan leh hriattir che uin,
12. in chung theuha kan tihzia kha in hre si a.
13. He mi avang hian bang loin Pathian hnenah lawmthu kan hril bawk thin, Pathian thu kan hnen ata in hriat, in pawm lai khan, mihring thu pawmin in pawm lo a, Pathian thu pawmin in pawm zawk avang kha; chu chu Pathian thu a ni reng a, nangni a ringtute chhunga thawk bawk thina chu a ni.
14. Nangni, unaute u, Judai rama Pathian kohhran pawl Krista Isuaa awmte zirtu in lo nih kha, anni chuan Judate lakah an tuar angin, nangni pawhin nangmahni rama mite lakah in tuar ve bawk si a.
15. Chung Judate chuan Lalpa Isua leh zawlneite pawh an that a, keini pawh min hnawt chhuak a, Pathian an tilawm lo a, mi zawng zawng an kalh thin;
16. chhandam an nih theihna tura Jentailte hnena thu hrilh min khap si thin; an sual tawp khawk a thleng ta a, thinurna chu an chungah a lo tla ta nge nge a ni.
17. Nimahsela, unaute u, rei lo te atan nangmahni nen thinlung lama inthen lo a, hmel lam chauha inthena kan awm rih avangin, chak tak chunga in hmel hmu turin kan bei nasa lehzual thin a ni;
18. in hnena lo kal kan tum tlat si a, kei Paula ngei pawh hian vawi hnih lai lo kal ka tum nghe nghe tawh a, nimahsela Setanan min dal thin a ni.
19. kan beiseina emaw, kan hlimna emaw, kan lallukhum chhuan emaw eng nge ni le? A lo kal hunah kan Lalpa Isua hmaah chuan nangmahni ngei in ni dawn lo'm ni?Nangmahniho hi kan chuan leh kan hlimna in ni a sin.
20. Nangmahniho hi kan chuan leh kan hlimna in ni a sin.
←  1Thessalonians (2/5)  →