←  1Kings (9/22)  →
1. Tin, heti hi a ni a, Solomonan LALPA in leh lal in a saka Solomonan chak taka a tum zawng zawng a tihzawh vek hnuah chuan,
2. Gibeon khuaa a hnena a inlar ang khan LALPA chu Solomona hnenah a rawn inlar leh a.
3. Tin, LALPA chuan a hnenah, "I tawngtaina leh i dilna ka hmaa i rawn thlente kha ka lo ngaithla a: he mi in i sak hi kumkhuaa ka hming awmtirna'n ka tithianghlim tawh e; ka mit leh ka thinlung chu chutah chuan a awm kumkhua tawh ang.
4. Tin, nang pawh hi thu ka pek apiang che anga ti tura i pa Davida awm anga thinlung tha tak pu leh rilru dik tak pua ka mite hmuha i awm a, ka thuruatte leh ka rorelte i pawm reng zangin,
5. Israelte chungah hian i ram lalthutthleng chu kumkhua atan ka tinghet ang; i pa Davida hnenah 'Israelte lalthutthlenga thu tur i hmai lo ang,' tia ka lo tiam tawh ang khan.
6. Amaherawhchu nangin emaw, in thlahten emaw mi zui chu min kirsan a, ka thupekte leh ka thuruate ka hriattir che u hi in pawm loh a, pathian dangte rawng in va bawl a, in vabiak chuan,
7. Israel hote hi ram ka pek ata ka tiboral ang a; tin, he mi in ka hming atana ka tihthianghlim tawh sa hi ka mithmuh phak loah ka sawn bo daih ang; tichuan Israelte hi hnam tinrengte zingah tihelna leh a chhe lam tehkhinnaah hman an la ni ang a:
8. tin, he in i sang teh mah se la, a kal pel apiangte chuan maik tiin an la faifuk ang a, 'Engati nge LALPA'n he ram leh he in hi heti taka a tih le?' an ti ang.
9. Tin, miten, 'LALPA an Pathian, an pute Aigupta ram ata hruai chhuaktu kha an kalsan a, pathian dangte an vuan a, an bia a, an rawngte an bawl tak vang a ni; chuvangin LALPA'n he'ng chhiatna zawng zawngte hi an chungah a rawn thlentir ta anih hi,' tiin an la chhang ang," a ti a.
10. Tin, heti hi a ni a, Solomonan in pahnih, LALPA in leh lal in a sak chhung, kum sawmhnih a vei hnuin
11. (tura lal Hiraman Solomona chu sidar thin te, far thing te, rangkachakte a mamawh apiang a tum vek ani a,) lal Solomona chuan Hirama chu Galili rama khaw sawmhnih a pe a.
12. Tin, Hirama chu tura khua atangin Solomonan khua apekte chu en turin a chhuak a; a duhzawng a ni lo hle a.
13. Tin, ani chuan, "Ka unaupa, he'ng i kawh mi pekte hi khaw eng nge maw ni ngai le?" a ti a. Tichuan tun thleng hian Kabul ram an ti ta a ni.
14. Tin, Hirama chuan lal chu rangkachak talent 120 a thawn a.
15. Lal Solomonan hnathawka rawih lui pawl a siam chhan chu hei vang hi a ni: LALPA in leh ama in satu atan leh, Millo te, Jerusalem kulh te, Hazor khua te, Megiddo khua te, Gezer khua te siamtu atan a ni.
16. Aigupta lal Pharaoa chu a han chho a, Geer khua han la a, a hal a, chu khua a awm Kanaan hote chu a that a, a fanu Solomona nupui chu inthlahna thilpek atan alo pe tawh a ni.
17. Tin, Solomonan Gezer khua te, Beth-horon thlangta zawk khua te,
18. Baalath khua te, Israel rama thlaler Tamar khua te,
19. Solomonan thil dah khawmna khua neih zawng zawng te, a tawlailir dahna khua te leh, a sakaw chungchuang mi dahna khua te, Jerusalem khuaah te, Lebanon-ahte leh a rorelna ram chhung zang zanga Solomonan chak taka siam a tum zawng zawngte chu a siam a ni.
20. Tin, Israela thlahte ni ve lo, Amor-ho te, Hit-ho te, Periz-ho te, Hebus-ho la awm chhun zawng zawngte kha chu,
21. an thlah, chung rama la awm Israela thlahten an tihboral zawh vek theih lohvate zingah chuan Solomonan chhiahhlawh, hnathawka rawih luih pawl a siam a, tun thleng hian.
22. Israela thlahte erawh chu Solomonan chhiahhlawhah a siam ve lo va: indo mi te, a puipa te, a mi lian te, a sipai hotu te, a tawlailir leh a sakaw chungchuang mi hotute an ni zawk a ni.
23. Chungte chu Solomona hna chunga hotu bik 550, hnathawk vengtute chu an ni.
24. Pharaoa fanu erawh chu Davida khaw pui ata chu ama in, Solomonan a saksakah chuan a chho ta a: tichuan Millo chu a siam ta a.
25. Tin, Solomona chuan LALPA tana maicham a siamah chuan kum tin, vawi thum halral thilhlan leh remna thilhlan a hlan thin a, LALPA hmaa maichamah chuan rimtuite a hal tel bawk thin a. Chutichuan in chu a peih ta a.
26. Tin, lal Solomona chuan Edom rama Tuirinfiat Sen kam Eloth bula awm Eziongeber hmunah lawng rual a siam a.
27. Tin, Hioraman a chhiahhlawh lawng mite tuifinriata che thang, lawnga Solomona chhiahhlawhte kalpuiah a ti ra.Chumite chu Ophir-ah an va kal a, chuta mi chu rangkachak talent 420 an rawn hawn a, lal Solomona hnenah an rawn thlen a.
28. Chumite chu Ophir-ah an va kal a, chuta mi chu rangkachak talent 420 an rawn hawn a, lal Solomona hnenah an rawn thlen a.
←  1Kings (9/22)  →