←  1Corinthians (9/16)  →
1. Zalen ka ni lo em ni? Tirhkoh ka ni lo em ni? Kan Lalpa Isua ka hmu tawh lo em ni? Nangniho chu Lalpaa ka hnathawh in ni lo em ni?
2. Mi dangte tan tirhkoh ni mah suh i la, nangni tan tal zawng ka ni; Lalpaa ka tirhkoh nih chhinchhiahna chu nangmahni hi in ni a sin.
3. Mi chhuahchhaltute ka chhanna chu hei hi a ni.
4. Ei leh in turin thu ka nei lo em ni?
5. Tirhkoh dangte leh Lalpa unaute leh Kiphaa ang khan nupui ring mi, hruai vel turin thu kan nei lo em ni?
6. A nih loh leh, hna thawk lo turin kei leh Barnaban thu kan nei lo bik em ni?
7. Sipai tu nge mahni inchawma ral kap ngai ni? Tuin nge a rah ei si loin grep huan siam ngai ni? A nih loh leh tuin nge ran rual hnute ei si lo loin, ran rual enkawl ngai ni?
8. Chung thu chu mihring ang maiin ka sawi em ni? Dan thu pawhin chung ngei chu a sawi bawk lo em ni?
9. Mosia Dan Lehkhabuah chuan, "Sebawngpain buh a chil laiin a hmui phuar suh ang che," tih ziak a ni si a. Pathianin sebawngpa tan mai em ni a ngaihtuahsak ni?
10. Keimahni tan chauh a sawi a ni lo'm ni? Ni e, keimahni tan a ni an ziak ni: lei lettu chuan beisei neiin leh tur a ni a, buh vawtu pawh chuan chan neih ve beiseiin vuak tur a ni si a.
11. Keinin thlarau lam thilte chu in hnena kan tuh tawh chuan tisa lam thilte chu seng mah i la, thil hlawk tak em ni ang?
12. Mi dang mahin in chunga thuneihna chu an chan chuan keini hi chang tur kan ni lehzual lo'm ni? Nimahsela chu thuneihna chu kan hmang lo; Krista Chanchin Tha kan dal lohna turin engkim kan tuar hram hram zawk a ni.
13. Thil serh buatsaih veltute chuan Pathian biak ina mi thil an ei leh, maicham rawngbawltute chuan maicham nen chanvo an nei tih in hre lo vem ni?
14. Chutiang takin, Lalpa chuan Chanchin Tha hriltute chu Chanchin Tha chu an ei hmuhna'n a ruat a ni.
15. Nimahsela, kei zawngin chung chu pakhat mah ka hmang lo a ni; ka chunga chutianga in tihna'n he'ng thu hi ka ziak a ni hek lo; tupawhin ka chhuan hi engmah loa an siam ai chuan thi mai i la ka tan a tha zawk si a.
16. Chanchin Tha hril mah i la, chhuan tur reng reng ka nei si lo, tih makmawh ka chungah a innghat a ni si a; Chanchin Tha hril suh i la, ka chung a pik dawn si a.
17. Chu chu mahni thu thuin ka tih chuan lawmman ka nei a ni; nimahsela mahni thu thuin a nih si loh chuan Chanchin Tha enkawlna hna mi kawltir mai a ni ang.
18. Ka lawmman chu eng nge ni le? Chanchin Thaa ka thuneihna chu ka hman zawh lohna'n, Chanchin Tha ka hrilhin, hlawh loa Chanchin Tha rawng ka bawl theih hi a ni.
19. Tuma bawih ni mah suh i la, mi tam lehzual ka lak luh theihna turin mi zawng zawng bawihah ka insiam ta.
20. Tichuan, Judate ka lak luh theihna turin Judate hnenah Juda mi angin ka awm thin; Dan hnuaia awmte ka lak luh theihna turin Dan hnuaia awmte hnenah Dan hnuaia awm angin ka awm thin, Dan hnuaia awm si loin;
21. dan nei lote ka lak luh theihna turin dan nei lo te hnenah dan nei lo angin ka awm thin, Pathian dan awih lo si loin, Krista dan zawm siin.
22. Chak lote ka lak luh theihna turin chak lote hnenah chak lo angin ka awm thin; eng emaw ti tala thenkhatte tal ka chhandam theihna turin mi zawng zawng hnenah engkim ka ni tawh.
23. Chanchin Tha avangin engkim ka ti thin, chan ka neih ve theihna'n.
24. Intlansiakhote chu an zain an tlan a, nimahsela pakhat chauhin lawmman a hmu thin tih in hre lo em ni? In hmuh theihna'n chutiang takin tlan rawh u.
25. Tin, intihsiaknaahte chuan a bei talh talh apiang chu engkimah an insum thin a ni. Anni zawngin lallukhum chhe thei hmu turin an bei a, keini erawh chuan lallukhum chhe thei lo hmu turin.
26. Chutichuan, tiam chin lam panin ka tlan ngat ngat a ni, boruak mai hnek loin mahni ka inhnek zawk thin a,chuvang chuan ka taksa ka tichhel a, ka thuhnuaiah ka dah tawh a ni, chutilochuan mi dangte hnena ka tlangaupui hnu pawhin eng emaw tiin keimah ngei hi paih thlakin ka awm dah ang e.
27. chuvang chuan ka taksa ka tichhel a, ka thuhnuaiah ka dah tawh a ni, chutilochuan mi dangte hnena ka tlangaupui hnu pawhin eng emaw tiin keimah ngei hi paih thlakin ka awm dah ang e.
←  1Corinthians (9/16)  →