Philippians (1/4)

Philippians (1/4) →

Павле и Тимотеј, слуги на Христос Исус, до сите светии во Христос Исус, кои се во Вилипи, заедно со надзорниците и ѓаконите:

благодат вам и мир од Бог нашиот Татко и од Господ Исус Христос.

Му благодарам на својот Бог секогаш кога си спомнувам за вас;

секогаш во секоја своја молитва се молам за сите вас со радост,

заради вашето учество во Евангелието од првиот ден досега.

Уверен сум во тоа, дека Оној Кој го започна доброто дело во вас, ќе го доврши до Денот на Христос Исус.

А и исправно е да го мислам тоа за сите вас, зашто ве имам во срцето сите вас кои сте соучесници со мене во благодатта - како во моите окови, така и во одбраната и утврдувањето на Евангелието.

Зашто Бог ми е сведок колку копнеам по сите вас со срдечната љубов на Христос Исус.

И затоа се молам вашата љубов да изобилува сè повеќе и повеќе во целосно познавање и во секакво расудување,

10.

за да можете да го распознавате она што е подобро; за да бидете искрени и беспрекорни за Христовиот ден,

11.

исполнети со плодот на праведноста, кој е преку Исус Христос, за слава и пофалба на Бог.

12.

А сакам да знаете, браќа, дека ова што се случува со мене помогна за поголем напредок на Евангелието,

13.

така што им стана јасно на целата царска стража и на сите други, дека сум во окови заради Христос,

14.

и дека повеќето од браќата во Господ, охрабрени од моите окови, се осмелуваат сè повеќе без страв да го проповедаат Божјото слово.

15.

Навистина, едни Го проповедаат Христос од завист и соперништво, а други од добра волја;

16.

едни од љубов, знаејќи дека сум поставен за одбрана на Евангелието,

17.

а други Го навестуваат Христос од себични пориви, не со чиста намера, мислејќи да ми нанесат тага во моите окови.

18.

Но што тогаш? Само тоа: дека на секаков начин, било дволично или искрено, Христос се навестува. На тоа му се радувам и ќе се радувам,

19.

зашто знам дека ова - преку вашата молитва и помошта на Духот на Исус Христос - ќе ми биде за избавување,

20.

сходно со моето цврсто очекување и надеж, дека во ништо нема да се засрамам, туку како и секогаш во сета смелост, така и сега, Христос ќе е возвишен во моето тело, било преку живот или преку смрт.

21.

Зашто за мене да живеам е Христос, а да умрам - придобивка.

22.

Но ако и натаму живеам во телото, тоа за мене значи плодна работа - и не знам што да изберам.

23.

Притиснат сум од две страни, имам желба да си заминам и да бидам со Христос, што е далеку подобро,

24.

но заради вас е попотребно да останам во телото.

25.

И наполно уверен во тоа, знам дека ќе останам и ќе продолжам со сите вас, за ваш напредок и за радост во верата.

26.

А вашата пофалба преку мене да биде уште поизобилна во Христос Исус, заради моето повторно доаѓање кај вас.

27.

Само однесувајте се достојно на Христовото Евангелие, за да можам јас - било да дојдам и да ве видам, било да сум отсутен - да чујам за вас дека стоите цврсто во еден дух, дека еднодушно се борите за евангелската вера,

28.

и дека воопшто не се вознемирувате од противниците, што е знак за нивна погибел, а спасение за вас, и тоа од Бог.

29.

Зашто вам ви беше дадено заради Христос не само да верувате во Него, туку и да страдате заради Него,

30.

имајќи ја истата борба, каква што видовте во мене, а и сега слушате за мене.

Philippians (1/4) →