Mark (11/16)

← Mark (11/16) →

Кога се приближија до Ерусалим, во Бетфагија и Бетанија, кај Маслиновата Гора, Исус испрати двајца Свои ученици,

и им рече: "Појдете во селоно што е пред вас и штом ќе влезете во него, ќе најдете врзано магаренце, на кое уште никој не јавал. Одврзете го и доведете го!

И ако некој ве праша: 'Зошто го правите тоа?', речете: 'Му треба на Господ', и тој веднаш ќе го прати тука."

И отидоа и го најдоа магаренцето врзано до вратата, надвор крај патот, и го одврзаа.

А некои од оние што стоеја таму им рекоа: "Што правите? Зошто го одврзувате магаренцето?"

А овие им одговорија како што им рече Исус, и тие ги пуштија.

Го доведоа магаренцето кај Исус, ги ставија своите облеки врз него, и Тој седна над нив.

А мнозина ги постилаа своите облеки по патот, а други, пак, фрлаа гранчиња, што ги сечеа по нивите.

А тие кои одеа пред Него и по Него, извикуваа: "Осана!" "Благословен е Оној Кој доаѓа во Господовото име!"

10.

"Благословено е царството на нашиот татко Давид, кое доаѓа!" "Осана во висините!"

11.

И влезе во Ерусалим, во Храмот, и штом разгледа сè, бидејќи веќе беше доцна, отиде со дванаесеттемина во Бетанија.

12.

А утредента, кога излегоа од Бетанија, Тој огладне

13.

и оддалеку виде една смоква, разлистена, па тргна кон неа, не ќе најде ли нешто, а кога втаса, не најде ништо освен лисја, зашто уште не беше време за смокви.

14.

Тогаш проговори и и рече: "Отсега довека никој да не касне плод од тебе!" А Неговите ученици слушаа.

15.

Потоа пак дојдоа во Ерусалим, и кога влезе во Храмот почна да ги брка сите што купуваа и продаваа во Храмот. И им ги преврте масите на менувачите на пари и тезгите на продавачите на гулаби.

16.

И не дозволуваше некој да носи каков-годе сад низ Храмот.

17.

Потоа ги поучуваше, велејќи им: "Не е ли напишано: 'Мојот дом ќе се нарече Дом на молитва за сите народи?' А вие направивте од него разбојничко дувло!"

18.

А првосвештениците и закониците го чуја тоа, и бараа начин да Го погубат, зашто се плашеа од Него, додека сиот народ беше восхитен од Неговото учење.

19.

А кога се стемни, Тој излезе од градот.

20.

Утрото кога поминуваа, ја видоа смоквата исушена од корен.

21.

Петар се сети и Му рече: "Учителе, погледни! Се исушила смоквава што ја проколна!"

22.

Исус одговори, велејќи: "Имајте вера во Бог!

23.

Bистина ви велам, ако некој и рече на оваа гора: 'Дигни се и фрли се во морето', а не се посомнева во своето срце, туку верува дека ќе се збидне она што го рекол, така и ќе биде.

24.

Затоа ви велам: сè што ќе побарате во молитва, верувајте дека го примивте, и ќе ви се збиде.

25.

И кога сте на молитва, простете ако имате нешто против некого, па и вашиот Татко, Кој е на небесата, да ви ги прости вашите гревови.

26.

Ако пак не проштавате, и вашиот Татко, Кој е на небесата, нема да ви ги прости вашите гревови."

27.

Потоа пак дојдоа во Ерусалим, и кога одеше низ Храмот, дојдоа кај Него првосвештениците, закониците и старешините,

28.

и Му рекоа: "Со каква власт го правиш ова и Кој Ти ја даде таа власт да го правиш тоа?"

29.

А Исус им рече: "Ќе ве прашам нешто, а вие одговорете Ми, па ќе ви кажам со каква власт го правам ова.

30.

Јовановото крштавање, од небото ли беше или од луѓето? Одговорете Ми!"

31.

А тие расправаа меѓу себе: "Ако кажеме од небото, ќе ни рече: 'Зошто тогаш не му поверувавте?'

32.

А што ако речеме, 'од луѓето'?" Се плашеа од народот, зашто сите сметаа дека Јован беше навистина пророк.

33.

Му одговорија на Исус, велејќи: "Не знаеме!" А Исус им рече: "Ни Јас не ви кажувам со каква власт го правам ова."

← Mark (11/16) →