Colossians (1/4) → |
1. | Павле, апостол на Исус Христос преку Божјата волја и братот Тимотеј, |
2. | до светиите и верните браќа во Христос, во Колос. Благодат вам и мир од Бог нашиот Татко. |
3. | Му благодариме на Бог, Таткото на нашиот Господ Исус Христос, молејќи се секогаш за вас; |
4. | зашто чувме за вашата вера во Христос Исус и за љубовта што ја имате спрема сите светии и |
5. | заради надежта која се чува за вас на небесата, за која чувте порано од словото на вистината, Евангелието, |
6. | кое дојде кај вас, како и во целиот свет, и плодоносно расте како и во вас од оној ден кога го чувте и ја запознавте Божјата благодат во вистината, |
7. | како што го научивте од Епафрас, нашиот мил сослужител, кој е верен Христов служител за вас, |
8. | кој и нè извести за вашата љубов во Духот. |
9. | Затоа и ние од оној ден кога го чувме тоа, не престануваме да се молиме за вас и да бараме да се исполните со познавањето на Неговата волја со секаква мудрост и духовно разбирање, |
10. | за да живеете достојно за Господ и да Му бидете по волја во сè; принесувајќи плодови во секое добро дело и растејќи во познавањето на Бог; |
11. | зајакнати со сета сила, согласно со Неговата славна моќ, за секаква непоколебливост и трпение; со радост |
12. | благодарејќи Му на Таткото, Кој нè оспособи за учество во наследството на светиите во светлината. |
13. | Зашто Тој нè избави од власта на темнината и нè пренесе во царството на Својот сакан Син, |
14. | во Кого имаме откуп, простување на гревовите. |
15. | Тој е лик на невидливиот Бог, Првороден на сето создание, |
16. | зашто преку Него е создадено сè што е на небесата и на земјата; видливо и невидливо, престоли, господства, началства или власти - сè е создадено преку Него и за Него. |
17. | И Тој е пред сè и сè суштествува во Него. |
18. | Тој е и глава на телото, Црквата; Тој е Почетокот, Првородениот од мртвите, за да биде прв во сè, |
19. | зашто на Таткото му беше по волја во Него да живее сета полнота, |
20. | и преку Него да измири со Себе сè што е на земјата или на небото, творејќи мир преку крвта на Неговиот крст. |
21. | И, иако некогаш бевте отуѓени и непријатели во своето мислење и во злите дела, |
22. | сега ве измири преку смртта на Неговото тело, за да ве претстави пред Себе свети, непорочни и беспрекорни, |
23. | само ако останете во верата цврсто втемелени и непоколебливи во надежта на Евангелието што го чувте, кое му беше проповедано на целото создание под небото и на кое јас, Павле, му станав служител. |
24. | Сега се радувам во моите страдања заради вас - и во моето тело го дополнувам тоа што им недостига на Христовите маки за Неговото тело, Кое е Црквата, |
25. | на која и станав служител според Божјото устројство, што ми е дадено за ваша полза, за да го исполнам Божјото слово, |
26. | тајната што беше скриена за векови и поколенија, а која им е откриена сега на Неговите светии, |
27. | на кои Бог сакаше да им објави што е богатството на славата на оваа тајна меѓу неевреите, која е Христос во вас, надежта на славата. |
28. | Ние Го навестуваме Него, опоменувајќи и поучувајќи секој човек во сета мудрост, за да го претставиме секој човек зрел во Христос. |
29. | Затоа се трудам и се борам сходно со Неговата делотворна сила, која силно дејствува во мене. |
Colossians (1/4) → |