Amos (2/9)  

1. haec dicit Dominus super tribus sceleribus Moab et super quattuor non convertam eum eo quod incenderit ossa regis Idumeae usque ad cinerem
2. et mittam ignem in Moab et devorabit aedes Carioth et morietur in sonitu Moab in clangore tubae
3. et disperdam iudicem de medio eius et omnes principes eius interficiam cum eo dicit Dominus
4. haec dicit Dominus super tribus sceleribus Iuda et super quattuor non convertam eum eo quod abiecerint legem Domini et mandata eius non custodierint deceperunt enim eos idola sua post quae abierant patres eorum
5. et mittam ignem in Iuda et devorabit aedes Hierusalem
6. haec dicit Dominus super tribus sceleribus Israhel et super quattuor non convertam eum pro eo quod vendiderit argento iustum et pauperem pro calciamentis
7. qui conterunt super pulverem terrae capita pauperum et viam humilium declinant et filius ac pater eius ierunt ad puellam ut violarent nomen sanctum meum
8. et super vestimentis pigneratis accubuerunt iuxta omne altare et vinum damnatorum bibebant in domo Dei sui
9. ego autem exterminavi Amorreum a facie eorum cuius altitudo cedrorum altitudo eius et fortis ipse quasi quercus et contrivi fructum eius desuper et radices eius subter
10. ego sum qui ascendere vos feci de terra Aegypti et eduxi vos in deserto quadraginta annis ut possideretis terram Amorrei
11. et suscitavi de filiis vestris in prophetas et de iuvenibus vestris nazarenos numquid non ita est filii Israhel dicit Dominus
12. et propinabatis nazarenis vino et prophetis mandabatis dicentes ne prophetetis
13. ecce ego stridebo super vos sicut stridet plaustrum onustum faeno
14. et peribit fuga a veloce et fortis non obtinebit virtutem suam et robustus non salvabit animam suam
15. et tenens arcum non stabit et velox pedibus suis non salvabitur et ascensor equi non salvabit animam suam
16. et robustus corde inter fortes nudus fugiet in die illa dicit Dominus

  Amos (2/9)