Psalms (71/150)  

1. At Ka̱cuaˈ, caˈaj cuiˈ a̱cuiqˈuin ta̱ru̱k tincol cuib. China̱tenkˈa taxak re nak incˈaˈ xuta̱nal tine̱lk chiruheb li xicˈ nequeˈiloc cue.
2. Xban nak ti̱c la̱ chˈo̱l, china̱tenkˈa ut china̱col. Chacuabi taxak li nintzˈa̱ma cha̱cuu ut china̱col.
3. La̱at taxak joˈ jun sako̱nac bar naru tincol cuiˈ cuib jokˈe cua̱nkin saˈ raylal. La̱at cayechiˈi nak tina̱tenkˈa nak cuanquin saˈ raylal. La̱at joˈ jun li sako̱nac bar naru tincol cuiˈ cuib xban nak caˈaj cuiˈ la̱at nacatqˈuehoc xcacuilal inchˈo̱l.
4. At inDios, china̱col taxak saˈ rukˈeb li incˈaˈ useb xnaˈleb. China̱col chiruheb li nequeˈba̱nun ma̱usilal ut li kˈaxal joskˈeb.
5. At Ka̱cuaˈ Dios, caˈaj cuiˈ a̱cuiqˈuin cˈojcˈo inchˈo̱l chalen chak saˈ insa̱jilal.
6. Ac la̱at ajcuiˈ nacat-iloc cue nak toj ma̱jiˈ ninyoˈla. La̱at xattenkˈan cue chi yoˈla̱c. Joˈcan nak junelic tinqˈue a̱lokˈal.
7. Nabaleb li nequeˈsach xchˈo̱l chicuilbal chanru nak niquina̱col chiru li qˈuila raylal li nincˈul.
8. Rajlal cutan tinqˈue a̱lokˈal ut junelic tinnima a̱cuu.
9. Mina̱tzˈekta̱na nak ac ti̱xakin chic ut mina̱canab injunes nak ma̱cˈaˈak chic inmetzˈe̱u.
10. Li xicˈ nequeˈiloc cue incˈaˈ us nequeˈxye chicuix ut nequeˈxcˈu̱b ru chanru nak tineˈxcamsi.
11. Eb aˈan nequeˈxye: Kata̱kehak ut kachapak xban nak ac xcanaba̱c xban li Dios ut ma̱ ani chic naru nacoloc re, chanqueb.
12. Joˈcan nak mina̱canab injunes, at inDios. China̱tenkˈa ban chi junpa̱t.
13. Chacˈuteb taxak xxuta̱n ut chasacheb taxak ruheb li nequeˈraj incamsinquil. Xuta̱nal taxak teˈxcˈul ut sachso̱queb ta xchˈo̱leb teˈcana̱k li nequeˈraj xba̱nunquil raylal cue.
14. Abanan la̱in caˈaj cuiˈ a̱cuiqˈuin ninyoˈonin junelic ut kˈaxal cuiˈchic tinqˈue a̱lokˈal rajlal cutan.
15. La̱in rajlal cutan tinye resil nak la̱at ti̱c la̱ chˈo̱l. La̱at nacatcoloc cue. Incˈaˈ naru rajlanquil jarub sut xina̱col chiruheb li xicˈ nequeˈiloc cue.
16. Tinye resil li usilal nacaba̱nu, at Ka̱cuaˈ, riqˈuin xnimal la̱ cuanquil ut tinchˈolob xya̱lal nak caˈaj cuiˈ la̱at ti̱c a̱chˈo̱l.
17. At inDios, chalen chak saˈ incaˈchˈinal la̱at xacˈut li xya̱lal chicuu. Ut toj chalen anakcuan yo̱quin ajcuiˈ xyebal resil li nacaba̱nu riqˈuin xnimal la̱ cuanquil.
18. At inDios, mina̱canab injunes anakcuan nak ac ti̱xin chic ut sak chic injolom xban nak tento tinye resil la̱ cuanquilal reheb li tenamit aˈin ut reheb li alal cˈajolbej li teˈyoˈla̱k mokon.
19. At inDios, kˈaxal numtajenak xti̱quilal la̱ chˈo̱l. Incˈaˈ naru xbisbal. Sachba chˈo̱lej li nacaba̱nu. Ma̱ ani chic cuan xcuanquil joˈ la̱at.
20. Usta xina̱canab chixcˈulbal nabal li raylal ut li chˈaˈajquilal, abanan la̱at ta̱qˈue cuiˈchic incacuilal. Chanchan cuanquin saˈ li chamal jul nak yo̱quin chixcˈulbal li raylal. Abanan la̱at tatcolok cue.
21. La̱at ta̱qˈue cuiˈchic inlokˈal ut ta̱cˈojob cuiˈchic inchˈo̱l.
22. At inDios, la̱in tinqˈue a̱lokˈal riqˈuin li salterio. Ut tinbicha̱nk riqˈuin arpa re xyebal resil lix ti̱quilal la̱ chˈo̱l. La̱at li Dios Santo reheb laj Israel.
23. Tinbicha̱nk xban xsahil inchˈo̱l. Chi anchal inchˈo̱l tinbicha a̱lokˈal xban nak la̱at xatcoloc cue.
24. Junelic tinye resil la̱ ti̱quilal xban nak xuta̱nal xeˈel li queˈraj xba̱nunquil li ma̱usilal cue ut sachso̱queb xnaˈleb xeˈcana.

  Psalms (71/150)