←  Leviticus (15/27)  →
1. Li Ka̱cuaˈ quia̱tinac riqˈuin laj Moisés ut laj Aarón ut quixye reheb:
2. —Tex-a̱tinak riqˈuineb laj Israel ut te̱ye reheb chi joˈcaˈin: Muxbil ru li cui̱nk li na-el xyaˈal lix tzˈejcual xban junak yajel.
3. Muxbil ru ta̱cana̱k usta yo̱k chi e̱lc xyaˈal lix tzˈejcual, usta naxcanab e̱lc.
4. Muxbil ru ta̱cana̱k li cuarib li ta̱yocla̱k cuiˈ li cui̱nk aˈan, joˈ ajcuiˈ li naˈajej li ta̱cˈojla̱k cuiˈ.
5. Ut muxbilak ru li ani ta̱chˈeˈok re li cuarib aˈan. Tento nak ta̱ati̱nk ut tixpuchˈ li rakˈ ut muxbil ru ta̱cana̱k toj ta̱oc li kˈojyi̱n.
6. Ut muxbilak ru li ani ta̱cˈojla̱k saˈ li naˈajej li xcˈojla cuiˈ li cui̱nk aˈan. Tento nak ta̱ati̱nk ut tixpuchˈ li rakˈ ut muxbil ru ta̱cana̱k toj ta̱oc li kˈojyi̱n.
7. Li ani ta̱chˈeˈok re junak li cui̱nk yo̱ chi e̱lc xyaˈal lix tzˈejcual, tento nak ta̱ati̱nk ut tixpuchˈ li rakˈ ut muxbilak ru ta̱cana̱k toj ta̱oc li kˈojyi̱n.
8. Ut cui li cui̱nk li yo̱ chi e̱lc xyaˈal lix tzˈejcual tixchu̱ba junak, li jun li quichu̱ba̱c muxbilak ru ta̱cana̱k toj ta̱oc li kˈojyi̱n. Tento nak ta̱ati̱nk ut tixpuchˈ li rakˈ.
9. Ut cui li cui̱nk li yo̱ chi e̱lc xyaˈal lix tzˈejcual yo̱ chi xic chirix cacua̱y, muxbilak chic ru li nacˈojla cuiˈ li cui̱nk.
10. Cui junak naxchˈeˈ li cˈaˈak re ru quicuan rubel li cui̱nk aˈan, li ani xchˈeˈoc re muxbil chic ru. Ut muxbil ajcuiˈ ru li ani ta̱cˈamok re li cˈaˈak re ru aˈin. Tento nak ta̱ati̱nk ut tixpuchˈ li rakˈ ut muxbil ru ta̱cana̱k toj ta̱oc li kˈojyi̱n.
11. Cui junak li cui̱nk yo̱ chi e̱lc xyaˈal lix tzˈejcual tixchˈeˈ junak chi incˈaˈ xchˈaj li rukˈ xbe̱n cua, li ani li tixchˈeˈ muxbil chic ru. Tento nak ta̱ati̱nk ut tixpuchˈ li rakˈ. Li jun aˈan muxbil ru ta̱cana̱k toj ta̱oc li kˈojyi̱n.
12. Cui li cui̱nk li yo̱ chi e̱lc xyaˈal lix tzˈejcual tixchˈeˈ junak li chˈochˈ ucˈal, tento nak teˈxjor li chˈochˈ ucˈal ut cui tixchˈeˈ li cˈaˈak re ru yi̱banbil riqˈuin cheˈ tento nak teˈxchˈaj.
13. Nak ac xqˈuira li cui̱nk ut incˈaˈ chic na-el xyaˈal lix tzˈejcual, tento ta̱roybeni cuukub cutan. Tento nak ta̱ati̱nk ut tixpuchˈ li rakˈ riqˈuin haˈ li x-el saˈ junak li yuˈam haˈ re nak incˈaˈ chic muxbilak ru.
14. Saˈ xcuakxak li cutan tixcˈam cuib li mucuy malaj cuib li paloma toj sa̱jeb. Tixcˈam li xul chiru li Ka̱cuaˈ chiru li oqueba̱l re li tabernáculo ut tixkˈaxtesi re laj tij.
15. Ut laj tij tixmayejaheb. Li jun tixmayeja re xtzˈa̱manquil xcuybal xma̱c li cui̱nk. Ut li jun chic tixmayeja re lix cˈatbil mayej. Joˈcaˈin tixba̱nu laj tij re nak li cui̱nk ta̱santobresi̱k chiru li Ka̱cuaˈ riqˈuin lix yajel.
16. Nak junak cui̱nk x-el xyaˈal lix tzˈejcual chi ma̱cuaˈ xban yajel, tento nak ta̱ati̱nk ut muxbil ru ta̱cana̱k toj nak ta̱oc li kˈojyi̱n.
17. Cui li xyaˈal xtzˈejcual nanak chiru tˈicr, malaj ut chiru li yi̱banbil riqˈuin tzˈu̱m, tento xpuchˈbal. Ut muxbil ru ta̱cana̱k toj ta̱oc li kˈojyi̱n.
18. Cui junak cui̱nk xcuan riqˈuin junak ixk, tento nak teˈati̱nk chixcabichaleb ut muxbilakeb chic ruheb toj nak ta̱oc li kˈojyi̱n.
19. Cui junak ixk yo̱k xyajel re lix po, muxbil ru chiru cuukub cutan. Ut li ani ta̱chˈeˈok re li ixk muxbilak ru toj ta̱oc li kˈojyi̱n.
20. Ut muxbilak ru li ta̱yocla̱k cuiˈ li ixk nak yo̱k xyajel re li po. Ut muxbilak ajcuiˈ ru li ta̱cˈojla̱k cuiˈ.
21. Li ani ta̱chˈeˈok re lix cuarib li ixk nak yo̱ xyajel re li po, tento nak ta̱ati̱nk ut tixpuchˈ li rakˈ ut muxbilak ru toj ta̱oc li kˈojyi̱n.
22. Cui junak tixchˈeˈ li cˈaˈru ta̱cˈojla̱k cuiˈ li ixk aˈan, li ani xchˈeˈoc re tento nak ta̱ati̱nk ut tixpuchˈ li rakˈ. Ut muxbil chic ru ta̱cana̱k toj ta̱oc li kˈojyi̱n.
23. Li ani ta̱chˈeˈok re lix cuarib, malaj ut li cˈaˈru ta̱cˈojla̱k cuiˈ li ixk aˈan, muxbil ru ta̱cana̱k toj ta̱oc li kˈojyi̱n.
24. Cui junak cui̱nk ta̱cua̱nk riqˈuin junak ixk nak yo̱ xyajel re li po, muxbilak ru li cui̱nk chiru cuukub cutan ut muxbilak ajcuiˈ li cuarib li ta̱yocla̱k cuiˈ li cui̱nk.
25. Ut cui nachal xyajel re li po junak li ixk chi toj ma̱jiˈ xkˈehil, ut cui nabay, li ixk aˈan muxbilak ru joˈ najtil ta̱ba̱yk lix yajel re li po joˈ naxba̱nu nak naxcˈul lix yajel.
26. Ut muxbilak ru ajcuiˈ li cuarib li naxyocob cuiˈ rib li ixk. Ut muxbil ajcuiˈ ru li nacˈojla cuiˈ, joˈ naxcˈul nak yo̱ xyajel re li po.
27. Ut muxbilak ru li ani ta̱chˈeˈok re li cˈaˈak re ru aˈin. Tento nak ta̱ati̱nk ut tixpuchˈ li rakˈ. Muxbil ru ta̱cana̱k toj ta̱oc li kˈojyi̱n.
28. Nak acak xrakeˈ xcˈulbal lix yajel re li po, li ixk ta̱roybeni cuukub cutan ut chirix aˈan incˈaˈ chic muxbil ru.
29. Saˈ xcuakxak li cutan li ixk tixcˈam cuib li mucuy malaj ut cuib li paloma toj sa̱j ut tixqˈue re laj tij chiru li oqueba̱l re li tabernáculo.
30. Ut laj tij tixmayeja jun re xtzˈa̱manquil xcuybal lix ma̱c li ixk ut li jun chic tixmayeja re lix cˈatbil mayej. Joˈcaˈin nak li ixk ta̱santobresi̱k chiru li Ka̱cuaˈ riqˈuin li yajel li quixcˈul.
31. La̱ex te̱ye reheb laj Israel nak teˈxba̱nu li chakˈrab aˈin re nak incˈaˈ muxbilak ruheb nak teˈcha̱lk saˈ lin tabernáculo li cuan saˈ xya̱nkeb. Cui teˈxmux ru lin tabernáculo teˈca̱mk.
32. Aˈin li chakˈrab reheb li cui̱nk li na-el xyaˈal lix tzˈejcual xban nak cuan xyajel, ut reheb ajcuiˈ li cui̱nk li na-el xyaˈal lix tzˈejcual chi ma̱cˈaˈ xyajel. Eb li cui̱nk aˈin muxbil ruheb.
33. Li chakˈrab aˈin, aˈan reheb li ixk nak nequeˈxcˈul xyajel re li po. Ut reheb ajcuiˈ li na-el xyaˈal lix tzˈejcual, usta cui̱nk usta ixk. Ut re ajcuiˈ li cui̱nk li ta̱cua̱nk riqˈuin junak ixk nak yo̱ xyajel re li po.
←  Leviticus (15/27)  →