←  Joshua (22/24)  →
1. Laj Josué quixbokeb li ralal xcˈajol laj Rubén ut eb li ralal xcˈajol laj Gad joˈ eb ajcuiˈ li yijach li ralal xcˈajol laj Manasés.
2. Ut quixye reheb: —La̱ex xex-abin chiru laj Moisés laj cˈanjel chiru li Dios ut xeba̱nu li cˈaˈru quinye la̱in.
3. Chalen chak junxil ut toj chalen anakcuan ma̱ jun sut xecanabeb xjuneseb laj Israel le̱ rech tenamitil. Xeba̱nu ban chi tzˈakal re ru le̱ chakˈrabinquil xban li Ka̱cuaˈ li kaDios.
4. Anakcuan ac xqˈue ke li Ka̱cuaˈ li cˈaˈru quixyechiˈi ut eb le̱ rech tenamitil cuanqueb saˈ xya̱lal. Anakcuan tintzˈa̱ma che̱ru nak texsukˈi̱k saˈ le̱ naˈaj aran jun pacˈal li nimaˈ Jordán, li quiqˈueheˈ e̱re xban laj Moisés laj cˈanjel chiru li Ka̱cuaˈ.
5. Caˈaj cuiˈ li cˈaˈru nintzˈa̱ma che̱ru, aˈan nak te̱ba̱nu chi anchal e̱chˈo̱l li cˈaˈru naxye saˈ lix chakˈrab li Ka̱cuaˈ li quixqˈue e̱re laj Moisés laj cˈanjel chiru. La̱in nacuaj nak te̱ra li Ka̱cuaˈ li kaDios. Ut texcua̱nk joˈ naraj aˈan. Chexocak saˈ le̱ chˈo̱l lix chakˈrab. Chexpa̱ba̱nk ut chexcˈanjelak chiru chi anchal e̱chˈo̱l, chan laj Josué.
6. Ut chirix aˈan laj Josué quixtzˈa̱ma chiru li Dios nak ta̱rosobtesiheb, tojoˈnak quixtaklaheb saˈ lix muheba̱leb.
7. Yijach li ralal xcˈajol laj Manasés quiqˈueheˈ xnaˈajeb aran Basán saˈ li este xban laj Moisés. Ut li yijach chic li ralal xcˈajol laj Manasés quiqˈueheˈ xnaˈajeb xban laj Josué saˈ xya̱nkeb laj Israel, li xeˈcana chi cua̱nc aran jun pacˈal li nimaˈ Jordán saˈ li oeste. Ut eb li yijach li ralal xcˈajol laj Manasés, li quiqˈueheˈ xnaˈajeb saˈ li este, laj Josué quixtaklaheb saˈ rochocheb nak acak xtzˈa̱ma rosobtesinquileb chiru li Ka̱cuaˈ.
8. Ut quixye ajcuiˈ reheb: —Ayukex saˈ le̱ muheba̱l ut yalomak xsahil li biomal li xere̱chani riqˈuineb li xicˈ nequeˈiloc ke. Nabaleb li queto̱mk, li plata, li oro, ut li bronce ut nabal li akˈej re te̱jeqˈui che̱rix la̱ex, joˈ ajcuiˈ chirixeb le̱ rech tenamitil, chan.
9. Joˈcaˈin nak queˈxjach ribeb li ralal xcˈajol laj Rubén ut eb li ralal xcˈajol laj Gad, joˈ ajcuiˈ li yijach li ralal xcˈajol laj Manasés riqˈuineb li jun chˈol chic laj Israel. Queˈxjach ribeb aran Silo saˈ li naˈajej Canaán ut queˈco̱eb saˈ li naˈajej Galaad, li naˈajej li quiqˈueheˈ reheb joˈ quixye li Ka̱cuaˈ re laj Moisés.
10. Nak queˈcuulac saˈ li nuba̱l cuan cuiˈ li nimaˈ Jordán, queˈxyi̱b jun nimla artal saˈ li naˈajej Canaán eb li ralal xcˈajol laj Rubén ut eb li ralal xcˈajol laj Gad, joˈ ajcuiˈ li yijach li ralal xcˈajol laj Manasés.
11. Ut eb laj Israel queˈrabi resil nak eb li ralal xcˈajol laj Rubén ut eb li ralal xcˈajol laj Gad, joˈ ajcuiˈ li yijach li ralal xcˈajol laj Manasés queˈxyi̱b jun li artal saˈ li nuba̱l re lix chˈochˈeb laj Israel chire li nimaˈ Jordán.
12. Queˈxchˈutub ribeb chixjunileb laj Israel li cuanqueb saˈ li oeste re teˈxic chi pletic riqˈuineb.
13. Eb laj Israel queˈxtaklaheb saˈ li naˈajej Galaad laj Finees li ralal laj Eleazar laj tij riqˈuineb li ralal xcˈajol laj Rubén, li ralal xcˈajol laj Gad ut li yijach li ralal xcˈajol laj Manasés.
14. Queˈxtakla ajcuiˈ laje̱b li nequeˈcˈamoc be saˈ xya̱nkeb li junju̱nk te̱p. Queˈco̱eb saˈ xcˈabaˈ li junju̱nk chˈu̱tal li ralal xcˈajol laj Israel.
15. Eb aˈan queˈtakla̱c saˈ li naˈajej Galaad chi a̱tinac riqˈuineb li ralal xcˈajol laj Rubén, li ralal xcˈajol laj Gad, ut li yijach li ralal xcˈajol laj Manasés.
16. Ut queˈxye reheb: —La̱o xochal chi a̱tinac e̱riqˈuin saˈ xcˈabaˈeb laj Israel, le̱ rech tenamitil. ¿Cˈaˈut nak xeba̱nu li ma̱c aˈin chiru li kaDios? ¿Cˈaˈut nak xex-oc chixyi̱banquil li artal aˈin? ¿Cˈaˈut nak yo̱quex chixkˈetbal lix chakˈrab li Ka̱cuaˈ Dios?
17. ¿Ma incˈaˈ ta biˈ nabal li ma̱c xkaba̱nu nak xkalokˈoni li yi̱banbil dios saˈ li naˈajej Peor? Li ma̱c aˈan toj cuan ajcuiˈ saˈ kabe̱n chalen anakcuan. Xban li ma̱c aˈan, nabaleb lix tenamit li Dios queˈcam.
18. Ut la̱ex yo̱quex chixcanabanquil li Ka̱cuaˈ Dios ut yo̱quex chixkˈetkˈetinquil e̱rib chiru. Cui joˈcan yo̱quex, ta̱cha̱lk xjoskˈil li Dios saˈ kabe̱n la̱o aj Israel.
19. Cui la̱ex nequecˈoxla nak le̱ naˈaj muxbil ru naru nequexnumeˈ saˈ kaya̱nk ut naru nequexcuan saˈ li naˈajej cuan cuiˈ lix tabernáculo li Ka̱cuaˈ Dios. La̱o incˈaˈ nakaj nak te̱kˈetkˈeti e̱rib chiru li Ka̱cuaˈ, chi moco te̱kˈetkˈeti e̱rib chiku la̱o riqˈuin xyi̱banquil jalan chic artal chiru lix artal li Ka̱cuaˈ Dios.
20. Chijulticokˈ e̱re nak laj Acán li ralal laj Zera quima̱cob riqˈuin xchapbal li ta̱cˈanjelak chiru li Dios ut riqˈuin xchapbal li ac kˈaxtesinbil re sachecˈ. Xban li ma̱c li quixba̱nu, li Ka̱cuaˈ quijoskˈoˈ saˈ kabe̱n chikajunilo ut moco caˈaj cuiˈ ta aˈan quicam xban li ma̱c li quixba̱nu, chanqueb.
21. Eb li ralal xcˈajol laj Rubén ut eb li ralal xcˈajol laj Gad, joˈ eb ajcuiˈ yijach li ralal xcˈajol laj Manasés queˈchakˈoc ut queˈxye reheb laj cˈamol be saˈ xya̱nkeb laj Israel:
22. —Li Ka̱cuaˈ li nimajcual Dios, aˈan naxnau chixjunil. Aˈan naxnau cˈaˈru aj e nak xkayi̱b li artal aˈin. Ut aˈan ta̱cˈutuk re li xya̱lal che̱ru. Cui la̱o xkayi̱b li artal aˈin re takakˈetkˈeti kib chiru, malaj ut re xtzˈekta̱nanquil li Dios, choxqˈuehak ta chi ca̱mc.
23. Aˈ ta li Ka̱cuaˈ chiqˈuehok ke chixtojbal li kama̱c cui la̱o xkayi̱b li artal aˈin re xtzˈekta̱nanquil li Dios malaj ut re li mayej re xcˈambal kib saˈ usilal, malaj ut re xqˈuebal li cˈatbil mayej.
24. La̱o xkayi̱b li artal aˈin xban nak xkacˈoxla nak mokon eb le̱ ralal e̱cˈajol ma̱re teˈxye ke: “La̱ex incˈaˈ naru nequexchal arin chixlokˈoninquil li Ka̱cuaˈ li kaDios la̱o aj Israel.”
25. Ut ma̱re teˈxye: “Li Ka̱cuaˈ Dios quixqˈue li nimaˈ Jordán chokˈ nuba̱l re li kanaˈaj. Ut aˈan najachoc re li kanaˈaj riqˈuin le̱ re la̱ex li ralal xcˈajol laj Rubén, ut li ralal xcˈajol laj Gad,” ma̱re chaˈkeb reheb li kalal kacˈajol. Ut ma̱re teˈxcanab xxucuanquil ru li Ka̱cuaˈ Dios.
26. Joˈcan nak xkacˈu̱b ru nak takayi̱b junak li artal. Ma̱cuaˈ re qˈuehoc mayej chi moco re cˈatoc xul.
27. Xkayi̱b ban joˈ retalil chokˈ ke ut chokˈ e̱re la̱ex ut reheb ajcuiˈ li kalal kacˈajol li teˈcua̱nk mokon. Xkayi̱b re xcˈutbal nak la̱o naru ajcuiˈ nakalokˈoni li Ka̱cuaˈ Dios ut naru ajcuiˈ toxic saˈ li tabernáculo re xqˈuebal li kamayej ut li cˈatbil mayej re xtzˈa̱manquil xcuybal li kama̱c ut re ajcuiˈ xcˈambal kib saˈ usilal riqˈuin li Dios. Chi joˈcan eb le̱ ralal e̱cˈajol incˈaˈ naru teˈxye reheb li kalal kacˈajol nak incˈaˈ naru teˈxic chixlokˈoninquil li Dios.
28. La̱o xkacˈoxla nak cui ani ta̱yehok reheb li kalal kacˈajol chi joˈcan, eb aˈan teˈxye, “Qˈuehomak retal. Eb li kaxeˈto̱nil yucuaˈ queˈxyi̱b li artal aˈin chokˈ re li Ka̱cuaˈ. Ma̱cuaˈ re qˈuehoc mayej chi moco re xcˈatbal li xul. Re ban nak ta̱cˈanjelak chokˈ retalil chiku la̱o ut che̱ru la̱ex.”
29. Incˈaˈ taxak chicˈulma̱nk chi joˈcan. Incˈaˈ taxak takakˈetkˈeti kib chiru li Ka̱cuaˈ chi moco takatzˈekta̱na riqˈuin xyi̱banquil li artal re li cˈatbil mayej, chi moco re qˈuehoc mayej, chi moco re li cˈatbil xul, xban nak ma̱cˈaˈ chic junak artal chiru lix artal li Ka̱cuaˈ Dios li cuan chiru li tabernáculo, chanqueb.
30. Laj Finees laj tij ut eb li nequeˈcˈamoc be, joˈ ajcuiˈ li nequeˈtaklan saˈ xbe̱neb li junju̱nk chˈu̱tal queˈrabi li cˈaˈru queˈxye li ralal xcˈajol laj Rubén, ut eb li ralal xcˈajol laj Gad, ut li yijach li ralal xcˈajol laj Manasés. Ut queˈxcˈul xchˈo̱l li cˈaˈru queˈxye.
31. Ut laj Finees li ralal laj Eleazar laj tij quixye reheb:—Anakcuan nakanau nak li Ka̱cuaˈ Dios cuan kiqˈuin. La̱ex incˈaˈ xekˈet xchakˈrab li Dios nak xeyi̱b li artal aˈin. Anakcuan nakanau nak li Dios incˈaˈ tixqˈue raylal saˈ kabe̱n la̱o aj Israel, chan.
32. Chirix aˈan laj Finees laj tij rochbeneb li queˈco̱eb chirix queˈel riqˈuineb li ralal xcˈajol laj Rubén ut laj Gad saˈ li naˈajej Galaad. Queˈsukˈi Canaán saˈ lix naˈajeb ut queˈxye reheb chixjunileb laj Israel li cˈaˈru quiyeheˈ reheb.
33. Eb laj Israel queˈxcˈul xchˈo̱l li cˈaˈru queˈxye chak. Joˈcan nak eb laj Israel queˈxlokˈoni li Dios ut incˈaˈ chic queˈxcˈoxla xic chi pletic riqˈuineb li ralal xcˈajol laj Rubén, ut li ralal xcˈajol laj Gad chixsachbal ru li naˈajej li cuanqueb cuiˈ.
34. Ut eb li ralal xcˈajol laj Rubén ut eb li ralal xcˈajol laj Gad queˈxqˈue “Ed” chokˈ xcˈabaˈ li artal ut queˈxye: —Li artal aˈin, aˈan retalil chokˈ ke nak li Ka̱cuaˈ, aˈan li tzˈakal Dios, chanqueb.
←  Joshua (22/24)  →