Job (33/42)  

1. Joˈcan ut, at Job, chacuabihak li oc cue chixyebal. Chaqˈuehak retal chi us li cˈaˈru tinye a̱cue.
2. Anakcuan oc cue chixyebal li joˈ qˈuial cuan saˈ inchˈo̱l.
3. Chixjunil li tinye a̱cue tzˈakal ya̱l ut tinye chi anchal inchˈo̱l.
4. Li nimajcual Dios, aˈan li quiyi̱ban cue ut aˈan ajcuiˈ xqˈuehoc inyuˈam.
5. China̱sume cui tatru̱k. Cˈoxla chi us cˈaˈru tina̱sume cuiˈ.
6. La̱at ut la̱in juntakˈe̱to chiru li Dios. La̱in chˈochˈ oquenakin joˈ la̱at.
7. Matxucuac chicuu. La̱in ma̱cˈaˈ incuanquil saˈ a̱be̱n.
8. La̱in xcuabi chi tzˈakal li cˈaˈru xaye. Xcuabi nak xaye chi joˈcaˈin,
9. “La̱in ti̱c inchˈo̱l. Incˈaˈ ninba̱nu li incˈaˈ us. Ma̱cˈaˈ inma̱c ut ma̱ jun li ma̱usilal ninba̱nu.
10. Abanan li Dios xqˈue raylal saˈ inbe̱n ut chanchanin chic jun li xicˈ na-iloc re.
11. Chanchan xbacˈ li cuok riqˈuin cadena nak xqˈue li raylal saˈ inbe̱n ut yo̱ chixqˈuebal retal cˈaˈru ninba̱nu,” chancat.
12. Abanan li cˈaˈru xaye moco us ta xban nak li Dios nim xcuanquil chiru li cui̱nk.
13. ¿Cˈaˈut nak yo̱cat chixcuechˈbal rix li Dios? ¿Cˈaˈut nak nacaye nak incˈaˈ naxsume li cˈaˈru nacatzˈa̱ma chiru?
14. Nabal pa̱y ru naxba̱nu li Dios nak nara̱tinaheb li cristian. Aban eb aˈan incˈaˈ nequeˈxqˈue retal lix kˈusbaleb.
15. Cuan nak li Dios nara̱tinaheb li cristian saˈ lix matqˈueb malaj ut saˈ visión chi kˈek nak yo̱queb chi cua̱rc.
16. Naxye reheb cˈaˈru teˈxba̱nu ut naxqˈueheb xnaˈleb.
17. Naxye reheb nak teˈxcanab xba̱nunquil li incˈaˈ us. Ut naxye ajcuiˈ reheb nak incˈaˈ teˈxnimobresi ribeb.
18. Incˈaˈ naxcanabeb chi sachc. Naxcoleb ban chiru li ca̱mc.
19. Cuan nak naxkˈuseb riqˈuin yajel ut riqˈuin xrahil lix tibeleb.
20. Nequeˈxcanab tzaca̱nc usta cha̱bil tzacae̱mk naqˈueheˈ reheb.
21. Ma̱cˈaˈ chic xtibeleb ut nacˈutun chic lix bakeleb.
22. Incˈaˈ chic nequeˈxcuy. Ca̱mqueb re.
23. Abanan cui cuan ta junak xtakl li Dios naxnau a̱tinac, ta̱cha̱lk raj ut tixchˈolob raj chiru li cui̱nk cˈaˈru us tixba̱nu.
24. Tixye raj re li cui̱nk, “Li Dios xril xtokˈoba̱l a̱cuu. Aˈan xcoloc a̱cue chiru li ca̱mc. Ac xtau ani ta̱tojok rix la̱ ma̱c.”
25. Ta̱qˈuira̱k lix tibel li cui̱nk ut ta̱cua̱nk cuiˈchic xcacuilal joˈ nak quicuan chak saˈ lix sa̱jilal.
26. Ta̱tijok chiru li Dios ut li Dios ta̱rabi li cˈaˈru tixtzˈa̱ma. Chi sa saˈ xchˈo̱l tixlokˈoni cuiˈchic li Dios ut ta̱cua̱nk cuiˈchic chi sum a̱tin riqˈuin.
27. Tixye, “La̱in xinma̱cob. La̱in xinba̱nu li incˈaˈ us. Abanan li Dios incˈaˈ xinixqˈue chixtojbal lin ma̱c joˈ incˈulub.
28. Aban li Dios xcoloc cue chiru li ca̱mc. Joˈcan nak toj yoˈyo̱quin”, chaˈak.
29. Nabal sut naxba̱nu li Dios chi joˈcaˈin riqˈuineb li cui̱nk re xcolbaleb.
30. Joˈcaˈin nak naxcoleb chiru li ca̱mc ut naxqˈueheb chi cua̱nc saˈ ruchichˈochˈ chi saheb saˈ xchˈo̱leb.
31. At Job, canab a̱cuib chirabinquil li cˈaˈru yo̱quin chixyebal a̱cue. Qˈue retal li cua̱tin.
32. Cui cuan li cˈaˈru ta̱ye re xcˈutbal nak ma̱cˈaˈ a̱ma̱c, a̱tinan chi ma̱cˈaˈ a̱cˈaˈux. La̱in nacuaj nak teˈxqˈue retal nak ma̱cˈaˈ a̱ma̱c.
33. Abanan, cui ma̱cˈaˈ cˈaˈru ta̱ye, canab a̱cuib chirabinquil li cˈaˈru tinye. La̱in tinye a̱cue chanru naru ta̱cua̱nk a̱naˈleb.

  Job (33/42)