←  Jeremiah (7/52)  →
1. Li Ka̱cuaˈ Dios quia̱tinac riqˈuin laj Jeremías ut quixye re:
2. —Xaklin chire lix puertil lin templo ut ta̱ye li a̱tin aˈin reheb li cristian: Abihomak li cˈaˈru xye li Dios e̱re che̱junilex la̱ex aj Judá. Abihomak che̱junilex la̱ex li nequex-oc chixlokˈoninquil li Ka̱cuaˈ Dios.
3. Joˈcaˈin xye e̱re li nimajcual Dios, lix Dioseb laj Israel: —Jalomak le̱ cˈaˈux ut jalomak le̱ naˈleb re nak naru texincanab chi cua̱nc saˈ li naˈajej aˈin.
4. Me̱pa̱b li nequeˈxye laj balakˈ. Eb aˈan nequeˈxye, “Ma̱cˈaˈ takacˈul xban nak arin cuan lix templo li Dios,” chanqueb.
5. Jalomak le̱ cˈaˈux ut canabomak xba̱nunquil li incˈaˈ us, ut cua̱nkex saˈ ti̱quilal riqˈuineb le̱ ras e̱ri̱tzˈin.
6. Incˈaˈ te̱rahobtesi li jalan xtenamiteb, chi moco li ma̱cˈaˈ xnaˈ xyucuaˈeb ut li xma̱lcaˈan, chi moco te̱qˈue chi camsi̱c li ma̱cˈaˈ xma̱queb ut incˈaˈ te̱bok raylal saˈ e̱be̱n riqˈuin nak nequelokˈoni li yi̱banbil dios.
7. Cui te̱canab xba̱nunquil li ma̱usilal, texincanab chi cua̱nc saˈ li naˈajej aˈin li quinqˈue chi junaj cua reheb le̱ xeˈto̱nil yucuaˈ.
8. Cheqˈue retal li yo̱quex chixba̱nunquil. La̱ex nequecˈojob e̱chˈo̱l saˈ xbe̱n li ticˈtiˈ, li ma̱cˈaˈ na-oc cuiˈ.
9. La̱ex nequex-elkˈac, nequexcamsin, nequemux ru le̱ sumlajic, nequepatzˈ xcˈabaˈ li Dios chi ma̱cˈaˈ rajbal, nequecˈat li pom chiru li yi̱banbil dios Baal ut nequelokˈoniheb li yi̱banbil dios li incˈaˈ quenau chak ru junxil.
10. Ut chirix aˈan nequexcˈulun saˈ li templo bar ninlokˈoni̱c cuiˈ ut nequeye chi joˈcaˈin, “Cueˈco, colbilo,” chanquex, ut toj yo̱quex ajcuiˈ chixba̱nunquil li ma̱usilal.
11. ¿Ma xsukˈi ta biˈ lin templo li ninlokˈoni̱c cuiˈ chokˈ xnaˈajeb aj e̱lkˈ nak nequecˈoxla la̱ex? ¿Ma incˈaˈ ta biˈ ninnau cˈaˈru yo̱quex chixba̱nunquil? chan li Ka̱cuaˈ.
12. Ayukex anakcuan Silo saˈ li naˈajej li quinsicˈ chak ru junxil re tinlokˈoni̱k cuiˈ. Qˈuehomak retal cˈaˈru quinba̱nu re xban li ma̱c li queˈxba̱nu lin tenamit Israel.
13. Anakcuan ut cˈajoˈ li ma̱usilal xeba̱nu. La̱in qˈuila sut xinye e̱re nak te̱jal e̱cˈaˈux, abanan la̱ex incˈaˈ nequeraj rabinquil li cua̱tin. La̱in xexinbok re nak texsukˈi̱k cuiqˈuin, abanan incˈaˈ xeraj.
14. Joˈcan nak tinba̱nu re lin templo joˈ quinba̱nu re li naˈajej Silo. Tinba̱nu aˈan re lin templo li cau cuiˈ e̱chˈo̱l, li quinqˈue re le̱ xeˈto̱nil yucuaˈ ut e̱re ajcuiˈ la̱ex.
15. Texintzˈekta̱na joˈ nak quintzˈekta̱naheb chixjunileb le̱ rechˈalal, li ralal xcˈajol laj Efraín. La̱in li Ka̱cuaˈ ninyehoc re aˈin.—
16. Li Ka̱cuaˈ quixye re laj Jeremías: —Mattijoc chirixeb li tenamit aˈin chi moco tat-oque̱nk chirixeb chicuu. Ma̱tzˈa̱ma chicuu nak tintenkˈaheb xban nak la̱in incˈaˈ tincuabi la̱ tij.
17. ¿Ma incˈaˈ nacacuil cˈaˈru yo̱queb saˈ eb li tenamit li cuanqueb Judá? ¿Ma incˈaˈ nacacuil cˈaˈru yo̱queb saˈ eb li be aran Jerusalén?
18. Eb li cocˈal nequeˈxcˈam chak li siˈ. Ut eb li cui̱nk nequeˈxloch li xam. Ut eb li ixk nequeˈxyi̱b li caxlan cua re xlokˈoninquil li jalanil dios li nequeˈxye re “Reina re li choxa”. Nequeˈxmayeja li vino chiruheb li jalanil dios re xqˈuebal injoskˈil.
19. Abanan, ¿ma cue ta biˈ la̱in yo̱queb chixba̱nunquil li raylal? ¿Ma ma̱cuaˈ ta biˈ aˈaneb li teˈxsach ribeb riqˈuin li cˈaˈru nequeˈxba̱nu?
20. Joˈcan nak la̱in li Ka̱cuaˈ Dios tincuisi lin joskˈil saˈ xbe̱n li naˈajej aˈin. Tincuisi lin joskˈil saˈ xbe̱neb li cristian ut eb li xul joˈ ajcuiˈ saˈ xbe̱neb li cheˈ ut li acui̱mk. Lin joskˈil chanchanak jun li xam li incˈaˈ naru xchupbal.
21. Ut quixye ajcuiˈ li nimajcual Dios, lix Dioseb laj Israel: —La̱ex lin tenamit, la̱ex yo̱quex chixqˈuebal nabal le̱ cˈatbil mayej joˈ ajcuiˈ le̱ mayej jun chˈol chic. Abanan ma̱cˈaˈ na-oc cuiˈ le̱ mayej. Kˈaxal us raj nak te̱tzaca la̱ex.
22. Nak la̱in quincuisiheb le̱ xeˈto̱nil yucuaˈ aran Egipto, incˈaˈ quinye reheb nak tento teˈxqˈue lix cˈatbil mayej ut li mayej li jun chˈol chic.
23. Li cˈaˈru quinchakˈrabiheb cuiˈ chak junxil, aˈan aˈin: te̱ba̱nu li cˈaˈru ninye ut la̱inak le̱ Dios ut la̱exak lin tenamit. Chexcua̱nk joˈ ninye e̱re re nak us tex-e̱lk, chanquin reheb.
24. Abanan eb aˈan incˈaˈ queˈraj xba̱nunquil li cˈaˈru quinye. Queˈxcacuubresi ban lix chˈo̱leb. Queˈxba̱nu li ma̱usilal li queˈraj xba̱nunquil xjuneseb. Incˈaˈ queˈabin chicuu. Kˈaxal cuiˈchic nabal li ma̱usilal queˈxba̱nu.
25. Chalen saˈ li cutan nak le̱ xeˈto̱nil yucuaˈ queˈel chak Egipto toj chalen anakcuan, rajlal quintaklaheb lin profeta riqˈuineb chixchˈolobanquil li xya̱lal chiruheb.
26. Abanan eb aˈan incˈaˈ queˈraj rabinquil li cˈaˈru quinye reheb. Queˈxcacuubresi ban xchˈo̱leb chixba̱nunquil li ma̱usilal. Kˈaxal nabal li ma̱usilal queˈxba̱nu chiru li queˈxba̱nu lix xeˈto̱nil yucuaˈeb.
27. At Jeremías, la̱at ta̱ye chixjunil aˈin reheb lin tenamit, usta incˈaˈ teˈabi̱nk cha̱cuu. Jap a̱cue chixyebal reheb, usta incˈaˈ tateˈxchakˈbe.
28. La̱at ta̱ye reheb: La̱ex aj Israel, la̱ex jun li tenamit li incˈaˈ xeba̱nu li cˈaˈru xye e̱re li Ka̱cuaˈ. Incˈaˈ xecˈu̱luban le̱ kˈusbal xqˈue e̱re li Ka̱cuaˈ le̱ Dios. Incˈaˈ nequexcuan saˈ xya̱lal, chi moco nequeye li ya̱l.
29. La̱ex aj Jerusalén, besomak li rismal le̱ jolom ut cutumak chi najt. Ut ocankex chi ya̱bac saˈ xbe̱neb li tzu̱l. Li Ka̱cuaˈ xextzˈekta̱na xban nak yo̱ xjoskˈil saˈ e̱be̱n la̱ex lix tenamit.
30. Eb li ralal xcˈajol laj Judá queˈxba̱nu li ma̱usilal. Queˈxmux ru lin templo li niquineˈxlokˈoni cuiˈ nak queˈxqˈue aran li jalanil dios li xicˈ nacuileb.
31. Saˈ li ru takˈa li cuan Ben-hinom queˈxyi̱b li artal li najt xteram saˈ li naˈajej Tofet ut queˈxcˈat chokˈ xmayejeb li ralal xcˈajoleb. La̱in incˈaˈ quinye reheb nak teˈxba̱nu chi joˈcan chi moco quincˈoxla nak joˈcan teˈxba̱nu.
32. Ta̱cuulak xkˈehil nak incˈaˈ chic teˈxye “Tofet” re li naˈajej aˈan, chi moco teˈxye “li ru takˈa re Ben-hinom”. Teˈxye ban re “li ru takˈa re camsi̱nc” xban nak aran teˈxmukeb li camenak toj retal nak ma̱cˈaˈak chic lix naˈajeb aran Tofet.
33. Ut lix tibeleb li teˈca̱mk teˈtiˈekˈ xbaneb li soˈsol ut eb li joskˈ aj xul ut ma̱ ani ta̱seˈbesi̱nk reheb.
34. La̱in tincuisi li sahil chˈo̱lej saˈ eb li tenamit li cuanqueb Judá joˈ ajcuiˈ saˈ li tenamit Jerusalén. Incˈaˈ chic ta̱abi̱k xbicheb li tenamit nak saheb saˈ xchˈo̱leb. Ma̱cˈaˈak chic li ninkˈe saˈ eb li tenamit chi moco ta̱cua̱nk chic sumla̱c. Eb li tenamit teˈcana̱k chi ma̱cˈaˈ chic cuan chi saˈ joˈ li chaki chˈochˈ.—
←  Jeremiah (7/52)  →