←  Genesis (8/50)  →
1. Li Dios quixtokˈoba ru laj Noé joˈ ajcuiˈ chixjunileb li xul li cuanqueb saˈ li jucub cab. Quixtakla jun nimla ikˈ saˈ xbe̱n li ruchichˈochˈ ut qui-oc chi chakic li haˈ.
2. Quixcanab e̱lc li haˈ saˈ li chˈochˈ ut incˈaˈ chic quixqˈue li hab.
3. Timil timil quichakic li haˈ saˈ ruchichˈochˈ. Chiru jun ciento riqˈuin mero ciento cutan li haˈ yo̱ chi sa̱c.
4. Saˈ li cuuklaju xbe li xcuuk li po re li chihab aˈan, li jucub cab coxhila̱nk saˈ xbe̱n li tzu̱l Ararat xcˈabaˈ.
5. Yo̱ chi chakic li haˈ ut toj saˈ li xbe̱n li cutan re li xlaje li po quilajeˈcˈutun xbe̱n eb li tzu̱l.
6. Nak ac xnumeˈ caˈcˈa̱l cutan chic laj Noé quixte lix ventanil li jucub cab li quixyi̱b.
7. Quirachˈab jun li xul tzˈok xcˈabaˈ. Li xul aˈan yo̱ chi rupupic saˈ xbe̱n li haˈ toj retal nak quichakic li haˈ saˈ xbe̱n li chˈochˈ.
8. Mokon chic laj Noé quirachˈab jun li paloma re nak tixnau ma yo̱ chi chakic li haˈ saˈ xbe̱n li chˈochˈ.
9. Li paloma quisukˈi cuiˈchic saˈ li jucub cab xban nak incˈaˈ quixtau bar tixcˈochob rib xban nak toj cuan li haˈ saˈ xbe̱n li ruchichˈochˈ. Laj Noé quixyeˈ li rukˈ. Quixchap li paloma ut quirocsi cuiˈchic saˈ li jucub cab.
10. Quiroybeni cuukub cutan chic ut quirachˈab cuiˈchic li paloma re nak tixnau ma yo̱ chi chakic li haˈ.
11. Ecuu quisukˈi chak li paloma. Quixcˈam chak saˈ ruch re jun xxak li cheˈ olivo xcˈabaˈ. Chi joˈcan laj Noé quixnau nak ac yo̱ chi sa̱c li haˈ saˈ ruchichˈochˈ.
12. Quiroybeni cuukub cutan chic ut quirachˈab cuiˈchic li paloma. Co̱ li paloma ut incˈaˈ chic quisukˈi chak riqˈuin laj Noé.
13. Cuakib ciento chihab riqˈuin jun (601) chihab cuan re laj Noé nak quichakic li haˈ. Saˈ li xbe̱n cutan re li xbe̱n po laj Noé quixte lix tzˈapbal re li jucub cab ut qui-iloc chirix cab. Quiril nak ac xchakic li haˈ saˈ ruchichˈochˈ.
14. Saˈ li cuukub xcaˈcˈa̱l (27) xbe li xcab po ac xchakic chi us li ruchichˈochˈ.
15. Li Dios quia̱tinac riqˈuin laj Noé ut quixye re:
16. —Anakcuan tat-e̱lk saˈ li jucub cab a̱cuochben la̱ cuixakil. Ut teˈe̱lk ajcuiˈ la̱ cualal rochbeneb li rixakileb.
17. Ta̱cuisiheb ajcuiˈ chixjunileb li xul li joˈ qˈuial li cuanqueb saˈ li jucub cab a̱cuochben. Ta̱cuisiheb li xul li nequeˈrupupic ut eb li xul li nequeˈbe̱c, joˈ ajcuiˈ li xul li nequeˈxjucuqui rib saˈ chˈochˈ. Teˈe̱lk re nak teˈqˈuia̱nk ut teˈpucˈa̱nk saˈ ruchichˈochˈ, chan li Dios.
18. Ut qui-el laj Noé saˈ li jucub cab rochben li rixakil. Ut queˈel ajcuiˈ li ralal rochbeneb li rixakil.
19. Queˈel ajcuiˈ chixjunileb li xul li nequeˈrupupic ut li nequeˈbe̱c, joˈ eb ajcuiˈ li xul li nequeˈxjucuqui rib saˈ chˈochˈ. Quilajeˈel chi ju̱nk chˈu̱tal chixjunileb li xul, aˈ yal cˈaˈru chi xulil.
20. Laj Noé quixyi̱b jun artal riqˈuin tusbil pec re xlokˈoninquil li Ka̱cuaˈ Dios. Ut quixchapeb li xul, li nequeˈbe̱c joˈ ajcuiˈ li nequeˈrupupic, saˈ xya̱nkeb li xul li natiˈeˈ xtibeleb. Ut quixcˈateb saˈ xbe̱n li artal chokˈ xmayej chiru li Ka̱cuaˈ Dios.
21. Lix bo̱c li cˈatbil mayej quicuulac riqˈuin li Dios ut quicuulac chiru lix sununquil. Li Dios quixye saˈ xchˈo̱l: —Ma̱ jun cua chic tintzˈekta̱na li ruchichˈochˈ xbaneb li cristian. Ac reheb li cristian nak aj ma̱queb. Ma̱ jun sut chic tinsach ruheb chixjunileb li cuanqueb saˈ ruchichˈochˈ riqˈuin butˈi haˈ.
22. Joˈ najtil chic ta̱cua̱nk li ruchichˈochˈ junelic ta̱cua̱nk li a̱uc. Ta̱cua̱nk kˈoloc. Ta̱cua̱nk li que ut ta̱cua̱nk li tik. Ta̱cua̱nk li sakˈehil ut ta̱cua̱nk li habalkˈe. Ta̱cua̱nk li cutan ut ta̱cua̱nk li kˈojyi̱n. Incˈaˈ teˈpaltok chiruheb, chan li Dios.
←  Genesis (8/50)  →