Ezekiel (37/48)  

1. Quicuecˈa lix cuanquilal li Dios cuiqˈuin nak quicuil jun li visión. Ut lix musikˈ li nimajcual Dios quicˈamoc cue saˈ jun li ru takˈa nujenak chi bak.
2. Quinixqˈue chixsutinquil li ru takˈa ut quinqˈue retal nak kˈaxal nabal li bak cuan aran ut chakiheb chi us.
3. Ut li Ka̱cuaˈ quixye cue: —At ralal cui̱nk, ¿ma nacapa̱b nak teˈyoˈla̱k cuiˈchic eb a bak aˈin? chan. Ut la̱in quinchakˈoc ut quinye re: —At Ka̱cuaˈ Dios, caˈaj cuiˈ la̱at nacatnaˈoc re.—
4. Tojoˈnak li Ka̱cuaˈ quixye cue: —A̱tinan riqˈuineb a bak aˈin saˈ incˈabaˈ la̱in. Ta̱ye reheb: Ex chaki bak, abihomak li ra̱tin li Ka̱cuaˈ li oc cue chixyebal e̱re.
5. Joˈcaˈin xye li Ka̱cuaˈ: —La̱in tinqˈue cuiˈchic le̱ musikˈ e̱re re nak texcuacli̱k cuiˈchic chi yoˈyo.
6. La̱in tinqˈue cuiˈchic le̱ richˈ mul ut tinqˈue cuiˈchic le̱ tibel ut le̱ tzˈu̱mal. Ut tinqˈue cuiˈchic le̱ musikˈ re nak texcuacli̱k cuiˈchic chi yoˈyo. Ut riqˈuin aˈan te̱qˈue retal nak la̱in li Ka̱cuaˈ, chan.
7. Ut la̱in quina̱tinac joˈ quixye cue li Ka̱cuaˈ Dios. Nak yo̱quin chi a̱tinac, quicuabi jun choki̱nc. Quixqˈue jun li hi̱c ut eb li bak queˈoc chixchˈutubanquil ribeb ut queˈxtauhi ribeb.
8. Ut nak quicuil, cuanqueb chic li richˈ muleb ut lix tibeleb ut ac cuan chic lix tzˈu̱maleb nak quicuil. Abanan toj ma̱cˈaˈ lix musikˈeb.
9. Ut li Ka̱cuaˈ quixye cue: —At ralal cui̱nk, ye li cˈaˈru xinye a̱cue. A̱tina li musikˈej. Ta̱ye re: At musikˈej, cha̱lkat bar nachal cuiˈ li ikˈ saˈ xca̱ pacˈalil li ruchichˈochˈ. Tola̱cuapuheb li camenak aˈin li queˈcamsi̱c re nak teˈcuacli̱k cuiˈchic chi yoˈyo, chan.
10. Ut quinba̱nu joˈ quixye cue li Ka̱cuaˈ. Ut li musikˈej qui-oc riqˈuineb li camenak ut queˈcuacli cuiˈchic chi yoˈyo. Xban nak kˈaxal nabaleb, chanchan jun tu̱b chi soldado nak queˈxakli.
11. Ut quixye cuiˈchic cue li Ka̱cuaˈ: —At ralal cui̱nk, eb li bak aˈin, aˈan retalileb chixjunileb li ralal xcˈajol laj Israel. Eb aˈan nequeˈxye, “Xchakic li kabakel. Ma̱cˈaˈ chic cˈaˈru nakayoˈoni. Ac xo-osoˈ,” chanqueb.
12. Joˈcan ut nak ta̱ye reheb: Joˈcaˈin xye li Ka̱cuaˈ li nimajcual Dios. Ex intenamit, la̱in tinte li naˈajej li mukmu̱quex cuiˈ ut texcuisi aran. Texincˈam cuiˈchic toj saˈ le̱ naˈaj Israel.
13. Ex intenamit, la̱ex te̱qˈue retal nak la̱in li Ka̱cuaˈ nak tinte li mukleba̱l li mukmu̱quex cuiˈ ut texincuaclesi.
14. Ut la̱in tinqˈue lin musikˈ e̱re re nak yoˈyo̱kex. Texinqˈue chi hila̱nc saˈ le̱ naˈaj. Ut riqˈuin aˈan te̱nau nak la̱in li Ka̱cuaˈ. Xinye nak tinba̱nu aˈan ut tinba̱nu li cˈaˈru xinye, chan li Ka̱cuaˈ.
15. Ut li Ka̱cuaˈ Dios quixye ajcuiˈ cue:
16. —At ralal cui̱nk, ta̱chap jun li cheˈ ut ta̱tzˈi̱ba chiru li a̱tin aˈin: “Re laj Judá ut reheb li ralal xcˈajol”. Ut ta̱chap jun chic li cheˈ ut ta̱tzˈi̱ba chiru aˈan: “Re laj José ut reheb li ralal xcˈajol laj Efraín”. Li cuib chi cheˈ, aˈan retalileb chixjunileb li ralal xcˈajol laj Israel.
17. Chirix aˈan, ta̱letz li jun riqˈuin li jun chic ut jun aj chic chi cheˈ ta̱cana̱k saˈ a̱cuukˈ.
18. Teˈxpatzˈ a̱cue la̱ cuech tenamitil ut teˈxye, “Chˈolob xya̱lal chiku li yo̱cat chixba̱nunquil.”
19. Ut La̱at ta̱ye reheb: Joˈcaˈin xye li nimajcual Dios: La̱in tinchap lix cheˈ laj José li cuan riqˈuin laj Efraín. Li cheˈ aˈan retalileb li ralal xcˈajol laj Israel. Tinchap ajcuiˈ li cheˈ retalileb li ralal xcˈajol laj Judá. Tinletz chi ribil rib li cheˈ. Ut junak aj chic chi cheˈ ta̱cana̱k saˈ cuukˈ.
20. Ut li cuib chi cheˈ li xattzˈi̱bac cuiˈ cua̱nkeb saˈ a̱cuukˈ chiruheb chixjunileb li cristian.
21. Ut ta̱ye reheb nak la̱in li nimajcual Dios tincuisiheb chak chixjunileb laj Israel saˈ eb li jalan tenamit li cuanqueb cuiˈ chak. Tinchˈutubeb ut tincˈameb cuiˈchic saˈ lix tenamiteb.
22. La̱in tinchˈutubeb ru lin tenamit saˈ eb li tzu̱l li cuanqueb Israel. Jun ajcuiˈ li rey li ta̱takla̱nk saˈ xbe̱neb. Moco cuibakeb ta chic chi tenamit. Jun aj ban chic.
23. Incˈaˈ chic teˈxmux ribeb xlokˈoninquileb li jalanil dios, chi moco teˈxkˈetkˈeti ribeb chicuu, chi moco teˈxba̱nu chic li ma̱usilal. La̱in tincoleb chiru li ma̱usilal aˈan ut tincuisi lix ma̱queb. Aˈanakeb lin tenamit ut la̱inak lix Dioseb.
24. Laj David laj cˈanjel chicuu ta̱cua̱nk chokˈ xreyeb. Jun ajcuiˈ li ta̱ilok reheb. Ut teˈcua̱nk saˈ xya̱lal. Teˈxba̱nu li cˈaˈru naxye saˈ lin chakˈrab.
25. Teˈcua̱nk saˈ li chˈochˈ li quinqˈue re laj Jacob laj cˈanjel chicuu, li queˈcuan cuiˈ lix xeˈto̱nil yucuaˈeb. Eb aˈan ut chixjunileb li ralal xcˈajol li teˈcua̱nk mokon teˈcua̱nk saˈ li naˈajej aˈan chi junelic. Ut li rey David ta̱takla̱nk saˈ xbe̱neb chi junelic.
26. La̱in tinba̱nu jun li contrato riqˈuineb chi junelic re nak teˈcua̱nk saˈ tuktu̱quil usilal. Tinxakabeb saˈ xnaˈajeb ut tebinqˈue chi qˈuia̱nc. Ut tinqˈue lin templo chi cua̱nc saˈ lix naˈajeb chi junelic.
27. Ut la̱in cua̱nkin riqˈuineb. La̱inak lix Dioseb ut aˈanakeb lin tenamit.
28. Ut eb li xni̱nkal ru tenamit teˈxqˈue retal nak la̱in li Ka̱cuaˈ quinsantobresiheb laj Israel nak quinqˈue chi cua̱nc lin templo chi junelic saˈ xya̱nkeb, chan li Ka̱cuaˈ.

  Ezekiel (37/48)