Ezekiel (36/48)  

1. Li Ka̱cuaˈ quixye cue: —At ralal cui̱nk, tat-a̱tinak riqˈuineb li cuanqueb Israel saˈ li naˈajej tzu̱l ru, ut ta̱ye reheb nak cheˈrabihak li ra̱tin li Ka̱cuaˈ.
2. Aˈan aˈin li ninye la̱in li nimajcual Dios. Eb li xicˈ nequeˈiloc e̱re queˈsahoˈ saˈ xchˈo̱leb ut queˈxye, “Anakcuan eb li tzu̱l li queˈyi̱ba̱c najter kˈe cutan ke la̱o,” chanqueb.
3. Ta̱ye resil li cˈaˈru ta̱cˈulma̱nk ut ta̱ye chi joˈcaˈin: Aˈan aˈin li naxye li nimajcual Dios. Eb li xni̱nkal ru tenamit li cuanqueb che̱jun sutam queˈnumta saˈ e̱be̱n ut queˈxsach e̱ru ut xeˈrelkˈa li cˈaˈru e̱re. Joˈcan nak quexhobeˈ ut quexseˈe̱c xbaneb li jalan xtenamiteb.
4. Joˈcan nak te̱rabi li cˈaˈru tinye la̱in li nimajcual Dios chirixeb li tzu̱l ut eb li nimaˈ ut eb li ru takˈa li ma̱cˈaˈ chic cuan chi saˈ. Te̱rabi li cˈaˈru tinye chirixeb li tenamit li poˈinbileb ru, li qui-elkˈa̱c cˈaˈru reheb ut chirixeb li queˈqˈueheˈ chi hobecˈ ut chi seˈe̱c xbaneb li xni̱nkal ru tenamit li cuanqueb chixjun sutam.
5. Nak yo̱ injoskˈil la̱in li nimajcual Dios quina̱tinac chirix li tenamit Edom joˈ eb ajcuiˈ li jun chˈol chic tenamit li cuanqueb che̱jun sutam. Kˈaxal sa saˈ xchˈo̱leb nak queˈrelkˈa li cˈaˈru e̱re la̱ex lin tenamit ut queˈxcˈam chokˈ reheb.
6. La̱in quina̱tinac chi yo̱ injoskˈil chirixeb laj Edom li xicˈ nequeˈiloc e̱re xban nak eb aˈan queˈxcˈut e̱xuta̱n nak queˈxchap chokˈ reheb le̱ naˈaj. Queˈxmakˈ che̱ru li tzu̱l, li nimaˈ, li ru takˈa, ut eb li xbe̱n bol.
7. La̱in li nimajcual Dios ninye riqˈuin juramento nak relic chi ya̱l teˈcˈutekˈ xxuta̱neb li xni̱nkal ru tenamit li cuanqueb che̱jun sutam.
8. Ut teˈtuxmek cuiˈchic li cheˈ li cuanqueb saˈ li tzu̱l Israel ut teˈu̱chi̱nk. Ut eb laj Israel teˈxtzaca li ru xban nak chi se̱b teˈsukˈi̱k cuiˈchic saˈ lix tenamiteb.
9. La̱in tincol rix lix naˈajeb. La̱in tintenkˈa̱nk reheb chixcˈanjelanquil li chˈochˈ ut chiraubal xsaˈ.
10. La̱in tebinqˈue cuiˈchic chi ta̱mc laj Israel. Ta̱tenamitokˈ cuiˈchic li naˈajej. Ut teˈxyi̱b cuiˈchic li tenamit li queˈjuqˈui̱c junxil.
11. La̱in tinqˈue chi nabalocˈ li cristian joˈ eb ajcuiˈ li xul. Kˈaxal cuiˈchic nabal teˈqˈuia̱nk ut teˈta̱mk. Tebinqˈue chi cua̱nc saˈ lix naˈajeb joˈ nak queˈcuan junxil. Ut kˈaxal cuiˈchic tintenkˈaheb re nak ta̱cua̱nk nabal cˈaˈru reheb. Ut riqˈuin aˈin teˈxqˈue retal nak la̱in li Ka̱cuaˈ.
12. La̱in tincˈameb cuiˈchic laj Israel saˈ lix naˈajeb. Aˈaneb li teˈe̱chani̱nk re li chˈochˈ. Ut eb li ralal xcˈajol junelic teˈxtzaca ru li acui̱mk li ta̱e̱lk saˈ li chˈochˈ aˈin. Ut incˈaˈ chic teˈca̱mk xban cueˈej.
13. Li nimajcual Dios naxye chi joˈcaˈin: Anakcuan li jalaneb xtenamit nequeˈxhob laj Israel ut nequeˈxye nak li chˈochˈ naxtiuheb li ralal xcˈajol ut naxcanab li naˈajej chi ma̱cˈaˈ cristian chi saˈ.
14. Abanan anakcuan incˈaˈ chic teˈxye chi joˈcan xban nak teˈnabalokˈ cuiˈchic li cristian.
15. Incˈaˈ chic tebinqˈue chi hobecˈ xbaneb li xni̱nkal ru tenamit, chi moco teˈnumta̱k chic saˈ xbe̱neb, chi moco teˈca̱mk chic li ralal xcˈajoleb laj Israel, chan li Ka̱cuaˈ.
16. Ut li Ka̱cuaˈ quia̱tinac cuiqˈuin ut quixye:
17. —At ralal cui̱nk, nak eb laj Israel cuanqueb saˈ lix chˈochˈeb queˈxmux ru li naˈajej xban li ma̱usilal queˈxba̱nu. Chanchaneb jun li ixk nak yo̱ chixcˈulbal lix yajel re li po.
18. Xban nak yo̱ injoskˈil saˈ xbe̱neb, la̱in quinqˈueheb chixtojbal xma̱queb xban li camsi̱nc li queˈxba̱nu saˈ li naˈajej ut xban nak queˈxmux ru li naˈajej nak queˈxlokˈoniheb li jalanil dios.
19. La̱in quinjeqˈuiheb ru saˈ eb li xni̱nkal ru tenamit. Quinrakoc a̱tin saˈ xbe̱neb aˈ yal chanru lix yehom xba̱nuhomeb.
20. Nak queˈcuulac saˈ eb li tenamit yalak bar, chixjunileb li tenamit queˈxye nak aˈaneb lin tenamit la̱in li Dios, ut queˈisi̱c saˈ li naˈajej li quiqˈueheˈ reheb, chanqueb. Xma̱c eb aˈan nak quimuxeˈ ru lin santil cˈabaˈ.
21. Ra quicuecˈa nak queˈxhob lin santil cˈabaˈ. Eb laj Israel queˈxcˈut inxuta̱n nak queˈco̱eb yalak bar saˈ jalan tenamit.
22. Joˈcan ut ye reheb li tenamit Israel: Joˈcaˈin ninye la̱in li nimajcual Dios. Ma̱cuaˈ xban nak e̱cˈulub la̱ex aj Israel nak tinba̱nu li us e̱re; re ban xqˈuebal xcuanquil lin santil cˈabaˈ xban nak xemux ru lin cˈabaˈ chiruheb li tenamit bar xexcuan cuiˈ chak.
23. La̱in tinsantobresi lin cˈabaˈ li kˈaxal nim xcuanquil li xemux ru chiruheb li xni̱nkal ru tenamit xban nak xerisi xcuanquil lin cˈabaˈ nak cuanquex saˈ xya̱nkeb. Ut riqˈuin li cˈaˈru tinba̱nu, teˈxqˈue retal nak la̱in li Ka̱cuaˈ Dios.
24. La̱in texcuisi saˈ li xni̱nkal tenamit li cuanquex cuiˈ. Texcuisi saˈ chixjunileb li tenamit ut texincˈam cuiˈchic saˈ le̱ naˈaj.
25. Chanchan nak texinchˈajobresi riqˈuin sak ru haˈ nak tincuisi li ma̱usilal xeba̱nu nak xemux e̱rib riqˈuin xlokˈoninquil li jalanil dios.
26. La̱in tinacˈobresi le̱ ra̱m ut tinjal le̱ cˈaˈux. Tinkˈunobresi le̱ ra̱m ut tincuisi li cacuil chˈo̱lej li cuan e̱riqˈuin, li chanchan pec.
27. Ut la̱in tinqˈue e̱re lin musikˈ. Texinqˈue chixpa̱banquil lin chakˈrab ut te̱ba̱nu li cˈaˈru ninye. Te̱ba̱nu li cˈaˈru texintakla cuiˈ.
28. Texcua̱nk cuiˈchic saˈ li naˈajej li quinqˈue reheb le̱ xeˈto̱nil yucuaˈ. La̱exak chic lin tenamit ut la̱inak chic le̱ Dios.
29. La̱in tintenkˈa̱nk e̱re re nak incˈaˈ chic te̱ba̱nu li ma̱usilal. Ut tinqˈue chi cua̱nc nabal li trigo re nak incˈaˈ ta̱cua̱nk cueˈej.
30. Ut tebinqˈue chi u̱chi̱nc chi nabal eb li cheˈ ut tebinqˈue ajcuiˈ chi u̱chi̱nc chi nabal li acui̱mk saˈ li cˈaleba̱l. Incˈaˈ chic tinqˈue li cueˈej saˈ e̱be̱n re nak incˈaˈ xuta̱nal te̱cˈul chiruheb li xni̱nkal ru tenamit.
31. Nak ta̱julticokˈ e̱re li incˈaˈ us xeba̱nu, texxuta̱na̱k xban le̱ ma̱usilal ut xban le̱ ma̱c.
32. La̱ex aj Israel, chenauhak nak moco xban ta nak e̱cˈulub nak yo̱quin chixba̱nunquil li usilal aˈin. Chexxuta̱na̱k ban ut chisachk e̱chˈo̱l xban li incˈaˈ us xeba̱nu. La̱in li Ka̱cuaˈ ninyehoc re aˈin, chan li Dios.
33. Li nimajcual Dios quixye: —Nak ac xcuisi chixjunil le̱ ma̱c, texinqˈue cuiˈchic chi cua̱nc saˈ eb le̱ tenamit ut te̱yi̱b cuiˈchic li tenamit li queˈjuqˈui̱c.
34. Nak queˈnumeˈ li cristian junxil queˈxqˈue retal nak ma̱cˈaˈ cuan chi saˈ li naˈajej. Abanan ta̱cˈanjelak cuiˈchic li naˈajej.
35. Ut teˈxye, “Li naˈajej aˈin poˈbil nak queˈcuan ut ma̱cˈaˈ cuan chi saˈ. Abanan anakcuan cha̱bil chic. Chanchan li naˈajej Edén. Eb li tenamit poˈbil nak queˈcuan ut ma̱cˈaˈ cristian. Abanan cauresinbil chic li tenamit ut nabal li cristian cuanqueb.”
36. Ut chixjunileb li xni̱nkal ru tenamit li cuanqueb chixjun sutam teˈxqˈue retal nak la̱in li Ka̱cuaˈ quinyi̱ban reheb li tenamit li juqˈuinbil. Quinqˈue cuiˈchic chixjunil li cuan chi saˈ. La̱in li Ka̱cuaˈ ninyehoc re aˈin ut la̱in ninba̱nu li cˈaˈru ninye.
37. Ut tincuabi li cˈaˈru teˈxtzˈa̱ma chicuu eb li ralal xcˈajol laj Israel. Tinqˈueheb cuiˈchic chi qˈuia̱nc joˈ xqˈuial li queto̱mk.
38. Xban xqˈuialeb chanchanakeb li carner li nequeˈmayeja̱c Jerusalén saˈ xkˈehil eb li ninkˈe. Kˈaxal nabalakeb chic li cristian saˈ eb li tenamit li chanchan chaki chˈochˈ nak quicuan. Ut riqˈuin aˈin teˈxnau nak la̱in li Ka̱cuaˈ, chan li Dios.

  Ezekiel (36/48)